Kas-a sa usa ka tuig, ang mga Saksi ni Jehova sa tibuok kalibotan ug ang minilyon nga ilang giimbitar magtigom sa pagsaulog sa Memoryal sa kamatayon ni Jesus, sumala sa iyang gisugo. (Lucas 22:19) Kini nga okasyon motabang nato nga masabtan kon unsa ka importante ang gihimo ni Jesus dihang gihatag niya ang iyang kinabuhi para sa mga tawo. Ipakita sab niini kon sa unsang paagi ang iyang sakripisyo makaapektar sa atong kinabuhi, karon ug sa umaabot.—Juan 3:16.

 Nakatambong man ka sa Memoryal niining tuiga o wala, sa unsang paagi ka makabenepisyo sa kamatayon ni Jesus? Si Jesus nagtudlo nga angay natong buhaton ang duha ka importanteng butang:

1.  1. Mokat-on bahin sa Diyos ug kang Jesus. Dihang miampo si Jesus sa iyang langitnong Amahan, siya miingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos, ug sa imong gipadala, si Jesu-Kristo.”—Juan 17:3.

2.  2. Molihok sumala sa atong nakat-onan. Gipasiugda ni Jesus nga kinahanglan natong ipadapat ang iyang mga pagtulon-an diha sa atong kinabuhi. Pananglitan, gitapos niya ang iyang iladong Wali sa Bukid pinaagi sa pagdayeg niadtong “mamati sa [iyang] mga pulong ug mobuhat niini.” (Lucas 6:46-48) Sa susama, sa laing higayon, siya miingon: “Karon nga nahibalo na mo niini, malipayon mo kon inyo kining himoon.”—Juan 13:17.

 Gusto ba kang makakat-on ug dugang bahin sa Diyos ug kang Jesus? Gusto ba kag praktikal nga tambag kon sa unsang paagi mapadapat nimo ang imong nakat-onan? Niay pipila ka paagi diin makakita kag impormasyon nga makatabang nimo.

 Ang among libreng interactive nga pagtuon sa Bibliya nakatabang sa daghan sa pagsusi sa Bibliya ug sa pagpadapat sa giingon niini diha sa ilang kinabuhi.

•   Ablihi ang web page nga Pagtuon sa Bibliya nga may Instruktor aron mahibalog dugang bahin niini.

•   Tan-awa ang video nga Welcome sa Imong Pagtuon sa Bibliya aron makita kon sa unsang paagi ginahimo ang pagtuon sa Bibliya uban sa mga Saksi ni Jehova.

 Ang mga Saksi ni Jehova magtigom kaduha sa usa ka semana sa ilang dapit sa pagsimba nga gitawag ug Kingdom Hall. Niini nga mga tigom, hisgotan namo ang Bibliya ug kon unsaon namo pagpadapat ang mga pagtulon-an niini diha sa among kinabuhi.

 Dili kinahanglang Saksi ka aron makatambong sa tigom; ang tanan puwedeng motambong niini. Depende sa lokal nga kahimtang, puwede kang motambong in person o pinaagig videoconference.

•   Tan-awa ang video nga Unsay Ginahimo Diha sa Kingdom Hall? aron imong mahibaloan kon unsay imong madahom niini nga mga tigom.

•   Pangitag tigom nga duol sa inyong lugar pinaagi sa pag-abli sa web page nga Mga Tigom sa Kongregasyon sa mga Saksi ni Jehova.

 Daghang artikulo ug video niini nga website ang makatabang nimo nga makakat-on ug dugang bahin sa mga pagtulon-an ni Jesus ug sa bili sa iyang kamatayon.

 Pananglitan, aron makakat-on kon sa unsang paagi ang kamatayon sa usa ka tawo nakahatag ug kaayohan sa minilyon, basaha ang artikulong “Si Jesus Nagluwas Kanato​—Sa Unsang Paagi?” ug “Nganong si Jesus Nag-antos ug Namatay?” o tan-awa ang video nga Nganong Namatay si Jesus?