Daghan ang nabalaka sa kadaot nga gipahinabo sa mga tawo sa atong planeta ug sa tanang kinabuhi nga anaa niini. Sumala sa pipila ka eksperto sa kinaiyahan, ang ginahimo sa mga tawo karon nagpahinabog grabeng kadaot sa mga hayop ug tanom ug nagpameligro niini nga mapuo.

 Bug-os bang madaot sa mga tawo ang yuta? O moabot kaha ang panahon nga dili na sila magpahinabog kadaot sa kinaiyahan?

 Daghang eksperto ang nagtuo nga kayang protektahan sa tawo ang yuta ug dili magpahinabog kadaot niini. Ang ubang researcher nag-ingon nga aron molampos ang mga paningkamot sa tawo, kinahanglang dunay himoong mga kausaban ug dungan kining iimplementar. Apil niini ang mosunod:

•   Pauswagon ang pag-atiman sa yuta, kalasangan, kalamakan (wetlands), ug kadagatan.

•   Mogamit ug lainlaing paagi diha sa agrikultura ug tinubdan sa enerhiya.

•   Usbon ang paagi sa pagsuplay ug pagkaon aron ang pangunang kaonon sa mga tawo maoy mga pagkaon gikan sa tanom ug diyutay lang ang kaonon nga karne ug isda. Dayon menosan ang pagkonsumo ug pag-usik ug pagkaon.

•   Dawaton ang realidad nga ang maayong kinabuhi wala magdepende sa pagbaton ug daghang materyal nga butang.

 Unsay imong hunahuna? Realistiko ba ang pagdahom nga bug-os magtinabangay ang mga gobyerno, mga negosyante, ug mga indibiduwal? O naghunahuna ka nga imposible kana kay ang ubang tawo hakog kaayo, kaugalingon ray gihunahuna, ug walay pagpakabana sa umaabot?—2 Timoteo 3:1-5.

 Ang Bibliya nagpasalig nato nga dunay maayong kaugmaon ang atong planeta. Gipatin-aw niini kon nganong dili igo ang mga paningkamot sa tawo aron masalbar ang yuta, ug gipakita niini ang mga kausaban nga angayng himoon. Gihisgotan sab niini kon sa unsang paagi kini mahitabo.

 Nganong ang mga paningkamot sa tawo dili igo sa pagsalbar sa planeta? Gilalang ni Jehova a nga Diyos ang yuta, ug iyang gihatag sa mga tawo ang responsibilidad sa pag-atiman niini. (Genesis 1:28; 2:15) Molampos lang sila sa maong buluhaton kon magpagiya ug mosunod sila sa ilang Maglalalang. (Proverbio 20:24) Pero ilang gisalikway si Jehova ug mihimo sa kon unsay ilang gusto. (Ecclesiastes 7:29) Kon silasila lang, ang mga tawo walay katakos sa pag-atiman sa yuta, ug ang ilang mga paningkamot limitado rag mahimo.—Proverbio 21:30; Jeremias 10:23.

 Mga kausaban nga kinahanglang himoon. Gustong hunongon sa Diyos ang pagdaot sa mga tawo sa yuta. (Pinadayag 11:18) Dili niya repormahon ang mga gobyerno ug ang katilingban nga nagdaot sa planeta; pulihan niya sila. (Pinadayag 21:1) Tungod niini, si Jehova miingon: “Tan-awa! Ginabag-o nako ang tanang butang.”—Pinadayag 21:5.

 Sa unsang paagi mahitabo kini nga kausaban? Pulihan ni Jehova ang mga gobyerno sa tawo ug gobyerno sa langit nga gitawag ug Gingharian sa Diyos. Kana nga gobyerno, ubos sa pagmando ni Jesu-Kristo, mao unyay magmando sa tibuok yuta.—Daniel 2:44; Mateo 6:10.

 Ang Gingharian sa Diyos magtudlo sa mga tawo sa pagkinabuhi uyon sa matarong nga mga sukdanan sa Diyos. Kon ilhon sa mga tawo ang ilang Maglalalang ug sundon ang iyang giya, sila magkinabuhi nga dili makadaot sa kinaiyahan. (Isaias 11:9) Gihisgotan sa Bibliya kon unsay himoon sa gobyerno sa Diyos aron ang mga tawo makapahimulos ug maayo kaayong kinabuhi, nga makahatag ug kaayohan sa planeta. Himoon niini ang mosunod:

•   Pagtaganag pagkaon para sa tanan.—Salmo 72:16.

•   Pagpasig-uli sa maayong kondisyon sa kinaiyahan.—Isaias 35:1, 2, 6, 7.

•   Pagseguro nga atimanon sa mga tawo ang mga hayop ug ang mga hayop dili magpahinabog kadaot sa mga tawo.—Isaias 11:6-8; Oseas 2:18.

•   Pagwagtang sa mga katalagman.—Marcos 4:37-41.

 Makalaom ka nga ipahinabo sa Gingharian sa Diyos kini nga mga kausaban sa dili na madugay. Para sa dugang impormasyon, basaha ang artikulong “Kanus-a Magmando sa Yuta ang Gingharian sa Diyos?”