Tagda ang mosunod nga komento bahin sa iladong mga lider sa relihiyon ug sa gubat sa Ukraine:

•   “Ang lider sa Russian Orthodox Church nga si Patriarch Kirill, walay gyoy gisulti batok sa pag-atake nga gihimo sa Russia . . . . Ang pagpakaylap sa iyang Relihiyon ug dili tinuod nga impormasyon bahin sa Ukraine gigamit ni Putin aron ipakamatarong ang gubat.”—EUobserver, Marso 7, 2022.

•   “Gipakamatarong pag-ayo ni Patriarch Kirill . . . ang pag-atake sa iyang nasod batok sa Ukraine pinaagi sa pag-ingon nga kini nga gubat maoy bahin sa ilang paningkamot sa pagpakig-away batok sa sala.”—AP News, Marso 8, 2022.

•   “Ang Ukrainian nga lider sa Orthodox Church nga si Metropolitan Epiphanius I sa Kyiv, nagbendisyon sa iyang mga sakop niadtong Lunes aron ‘makiggubat sa mga Russian nga miatake’ . . . Miingon pod [siya] nga dili sala ang pagpatay ug Russian nga mga sundalo.”—Jerusalem Post, Marso 16, 2022.

•   “Kami [ang Ukrainian Council of Churches and Religious Organizations (UCCRO)] nagsuportar sa Armed Forces sa Ukraine ug sa tanan nga nakig-away. Bendisyonan namo ang ilang paningkamot nga depensahan ang Ukraine batok sa kaaway, ug amo silang iampo.”—UCCRO a Statement, Pebrero  24, 2022.

 Unsay imong hunahuna? Sakto ba nga ang mga relihiyon nga nangangkong nagsunod kang Jesu-Kristo magdasig sa ilang mga membro nga makiggubat? Unsay giingon sa Bibliya?

Ang kasaysayan sa pag-apil-apil sa relihiyon sa gubat

 Gipakita sa kasaysayan nga ang relihiyon sagad nagkonsentir, nagpakamatarong, o nagpasiugda pa gani nga kinahanglang makiggubat, samtang nagpakaaron-ingnon nga nagtinguha silag kalinaw. Sulod sa daghang katuigan, ang mga Saksi ni Jehova nagyagyag niini nga pagkasalingkapaw sa relihiyon. Aniay pipila ka pananglitan nga mabasa sa atong mga publikasyon.

•   Gipakita sa artikulong “Ang mga Krusada—Usa ka ‘Makapasubong Panglimbong’” kon sa unsang paagi ang Romano Katoliko sad-an sa mga masaker nga gihimo sa ngalan sa Diyos ug sa Kristo.

•   Ang artikulong “Ang Iglesya Katolika sa Aprika” naghisgot ug pananglitan kon sa unsang paagi ang relihiyon napakyas sa pagpugong sa paggubatay sa mga tribo, ug bisan sa genocide.

•   Ang mga artikulong “Relihiyon ba ang Hinungdan?,” “Ang Papel sa Relihiyon sa mga Gubat sa Tawo,” ug “Ang Relihiyon May Ginadapigan” nagpatin-aw kon sa unsang paagi ang mga lider sa Katoliko, Ortodokso, ug Protestante sagad nagsuportar sa naggubatay nga mga grupo.

Angay bang suportahan sa Kristohanong mga relihiyon ang mga gubat?

 Ang gitudlo ni Jesus: “Higugmaa ang imong isigkatawo sama sa imong kaugalingon.” (Mateo 22:39) “Padayon sa paghigugma sa inyong mga kaaway.”—Mateo 5:44-47.

 Ang giingon ni Jesus: “Ang akong Gingharian dili bahin niining kalibotana. Kon ang akong Gingharian bahin pa niining kalibotana, ang akong mga alagad makig-away na unta aron dili ko ikatugyan.” (Juan 18:36) “Ang tanang mogamit sa espada mamatay sa espada.”—Mateo 26:47-52.

 Hunahunaa: Kon ang mga Kristohanon dili makig-away bisan gani sa pagpanalipod kang Jesus, duna bay laing rason aron makig-away sila? Basaha ang artikulong “Husto Bang Mag-apil-apil sa Gubat ang mga Kristohanon?” aron masayran kon sa unsang paagi ang matinumanong mga Kristohanon kaniadto nagsunod sa panig-ingnan ug mga pagtulon-an ni Jesus.

Unsay mahitabo sa mga relihiyon nga nagsuportar sa gubat?

 Ang Bibliya nagtudlo nga gisalikway sa Diyos ang mga relihiyon nga nangangkong nagrepresentar kang Jesus pero wala magsunod sa iyang mga pagtulon-an.—Mateo 7:21-23; Tito 1:16.

•   Gipakita sa basahon sa Pinadayag nga papanubagon sa Diyos ang maong mga relihiyon sa kamatayon “sa tanang gipamatay sa yuta.” (Pinadayag 18:21, 24) Aron mahibalo sa rason, basaha ang artikulong “Unsa ang Dakong Babilonya?”

•   Gipakita ni Jesus nga ang tanang relihiyon nga gisalikway sa Diyos laglagon tungod sa ilang daotang mga buhat, sama nga ang daot nga kahoy nga namungag daot nga bunga “putlon ug isalibay sa kalayo.” (Mateo 7:15-20) Basaha ang artikulong “Ang Kataposan sa Bakak nga Relihiyon Haduol Na!” aron masayran kon sa unsang paagi kini mahitabo.

Photo credits, wala ngadto sa tuo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images