Dili. Ang mga Saksi ni Jehova nagtuo gayod nga ang Diyos naglalang sa tanang butang. Apan kami dili mouyon sa creationism. Ngano? Kay daghang ideya bahin sa creationism ang supak sa Bibliya. Tagda ang mosunod nga duha ka pananglitan:

1.   Gitas-on sa unom ka adlaw nga paglalang. Ang pipila ka creationist nag-ingon nga ang unom ka adlaw nga paglalang maoy literal nga 24-oras nga mga adlaw. Apan ang pulong nga “adlaw” diha sa Bibliya mahimong magtumong sa taas nga yugto sa panahon.—Genesis 2:4; Salmo 90:4.

2.   Edad sa yuta. Ang ubang creationist nagtudlo nga ang edad sa yuta maoy pipila pa lang ka libo. Apan, sumala sa Bibliya, ang yuta ug ang uniberso naglungtad na una pa sa unom ka adlaw nga paglalang. (Genesis 1:1) Tungod niana, ang mga Saksi ni Jehova mouyon sa kasaligang panukiduki sa mga siyentipiko nga nagpakitang ang yuta mahimong nag-edad ug bilyonbilyon ka katuigan.

 Bisan tuod ang mga Saksi ni Jehova nagtuo sa paglalang, kami dili supak sa siyensiya. Kami nagtuo nga magkauyon ang tinuod nga siyensiya ug ang Bibliya.