Niadtong 2017, dihay 12 ka Saksi nga mibiyahe gikan sa Mosquito (Miskito) Coast, usa ka rehiyon sa Nicaragua, sakay sa ilang pambot nga ginganlag Sturi Yamni. Ang ilang kauban nga si Stephen nahinumdom, “Tumong namo nga dasigon ang gamayng grupo sa mga Saksi nga nagpuyo sa usa ka layong lugar ug tabangan sila sa pagsangyaw sa maayong balita diha sa ilang dakong teritoryo.”

 Gikan sa Pearl Lagoon, gisugdan sa 12 ka Saksi ang ilang 200 kilometros nga biyahe agi sa suba sa Río Grande de Matagalpa. Pero wala sila mahibalo nga ang ngalan sa ilang pambot, nga nagkahulogan ug “Maayong Balita” sa Miskito nga pinulongan, duna unyay espesyal nga kahulogan alang niadtong namuyo daplin sa suba. Human sa mga 12 ka oras nga pagbiyahe, wala pay labot ang usa ka gabii nilang pagpahulay, nakaabot ang mga Saksi sa ilang destinasyon—ang komunidad sa La Cruz de Río Grande. Mahigugmaon silang giabiabi sa unom ka Saksi nga nagpuyo didto.

 Nianang gabhiona, mihapak ang kusog nga bagyo ug mibunok ang ulan didto sa Río Grande de Matagalpa. Human lang sa pipila ka oras, milapaw ang suba ug padayong mitaas ang tubig sulod sa duha ka adlaw. Ang Kingdom Hall ug ang daghang balay sa La Cruz grabeng nabahaan. Gitabangan sa mibisita nga mga igsoon ang mga tawo didto nga makabakwet. Kadaghanan nila nagpalabayg duha ka gabii sa dos andanas nga balay sa usa ka Saksi.

 Sa ikatulong gabii, ang mayor sa La Cruz miduol sa mibisitang mga Saksi aron mangayog tabang. Kay ang Sturi Yamni ra man ang pambot nga makalawig sa nagbaha nga suba, gihangyo sa mayor ang mga Saksi sa paghatod sa relief team ngadto sa ubang komunidad nga apektado sab sa baha. Siyempre, ang mga Saksi andam kaayong motabang.

 Pagkabuntag, gihatod sa tulo ka Saksi ang relief team. “Niadtong higayona, puwerteng kusoga sa bul-og sa tubig, kapig 18 kilometros kada oras ang kakusog,” nahinumdom si Stephen. “Duna pa gyoy dagkong kahoy nga nangaanod ug dagkong lilo nga naporma.” Bisan pa sa lisod nga kahimtang, nakaabot ang pambot sa tulo ka komunidad.

 Gipahimuslan sa tulo ka Saksi ang kahigayonan aron hupayon ang mga residente. Nanagtag sab silag mga kopya sa 2017 nga isyu sa Pagmata! nga may haom nga ulohang “Kon Dunay Kalamidad—Unsay Angayng Himoon?”

 Dako kaayo ang pasalamat sa mga namuyo duol sa suba tungod sa praktikal ug espirituwal nga tabang nga ilang nadawat gikan sa mga Saksi. Ang ubang residente mikomento bahin sa mga Saksi, “Andam silang motabang panahon sa kalisdanan.” Ang uban sab miingon, “Tinud-anay ang ilang gugma sa mga tawo.” Human makita ang paningkamot sa mga Saksi nga tabangan ang ilang isigkamagsisimba ug ang uban, daghang taga-baryo ang mas andam nang mamati sa makapahupay nga mensahe sa Bibliya.