Izina rya Ruhanga ni Yehova kandi nirimanyisa ngu “Natuma byabaho.” Yehova ni Rukirabona, kandi ni we owahangire byona. Ayine amani g’okukora ekintu cona eki ari kwenda kukora.

Omu Ruheburaayo, izina rya Ruhanga rikaba nirihandikwa omu nyuguta ina. Ezo nyuguta ni YHWH ninga JHVH. Omu kihandiko c’okubanza ca Bibuli c’Oruheburaayo, izina rya Ruhanga rikaba ririmu emirundi eri kuhika aha 7,000. Abantu b’omu nsi yona nibagamba izina Yehova omu buryo butari kushushana, bakuratize orurimi rwabo.

▸ Cwek. 1, par. 15

Omuhandiki wa Bibuli ni Ruhanga, konka akakoresa abantu omu kugihandika. Ecokureberaho: Bosi nabasa kugambira omuhandiki weye ngu amuhandikire ebaruha erimu ebitekateko ebi ari kwenda kuhisya aha bandi. Ruhanga na we akakoresa omwika gweye oguri kwera gwayebembera abantu omu kuhandika ebitekateko byeye omuri Bibuli. Omwika oguri kwera gukabebembera omu buryo butari kushushana; hine obu gwatumire bayorekwa ebintu ninga shi babirota rero bwanyima babihandika.

▸ Cwek. 2, par. 5

Emisinge ni enyegesa za Bibuli eziri kutuha obuhabuzi omu mbera zona. Ecokureberaho: Omusinge oguri kugira ngu ‘ekigombe kibi kishisha emicwe mirungi,’ nigutwegesa ku abantu barungi ninga ababi abu turi kwekwatanisa na bo bari kubasa kutuhindura. (1 Abakorinso 15:33) Kandi omusinge oguri  kugira ngu ‘ebi omuntu abiba ni byo agesha,’ nigutwegesa ku tutari kubasa kuhunga akabi k’ebikorwa byitu.—Abagalatia 6:7.

▸ Cwek. 2, par. 12

Obuhanuzi ni obutumwa obwarugire ahari Ruhanga. Nibubasa kuba buri kushoborora ebi Ruhanga ari kwenda, enyegesa aha mitwarize, ekiragiro, ninga shi orubanja. Nibubasa n’okuba obutumwa oburi kugamba aha kintu ekirije kubaho omu biro eby’omu misho. Hariho obuhanuzi bwingi omuri Bibuli obwamazire kuhikirira.

▸ Cwek. 2, par. 13

Yesu ni we owahikirize obuhanuzi bwingi obw’omuri Bibuli oburi kugamba ahari Mesia. Reba akashanduku akari kugira ngu: “ Obuhanuzi oburi kugamba ahari Mesia.”

▸ Cwek. 2, par. 17, obugambo bw’aha nsi.

Yehova akahanga ensi ari kwenda ngu ebe paradiso kandi eturwemu abantu abari kumukunda. Eco kigendererwa ceye tikirahindukire. Juba aha, Ruhanga nayija kwihaho obubi bwona kandi ahe abantu beye amagara agatahwaho.

▸ Cwek. 3, par. 1

Sitaane ni marayika owatandikire obugomi ahari Ruhanga. Nayetwa Sitaane aha kuba narwanisa Yehova. Nambwenu nayetwa “Omuregi,” aha kuba nabeherera Ruhanga kandi ahabisa abantu.

▸ Cwek. 3, par. 4

Yehova akahanga ba marayika kare munonga atakahangire ensi. Bakahangirwa kutura omu iguru. Hariho ba marayika bingi munonga. (Danieli 7:10) Bine amazina n’emitwarize bitari kushushana, kandi ba marayika abari kwesigwa nibecureza banga kwikiriza ngu abantu babaramye. Nibakirakirana kandi bine emirimo etari kushushana. Abamwe nibahereza omu misho g’ekitebe ca Yehova, abandi batwara obutumwa, abandi barinda kandi bebembera abahereza ba Yehova omu nsi, abandi bahikiriza emanja za Yehova, kandi abandi bakwasa omu murimo g’okuburira. (Zaaburi 34:7; Okushuuruurwa 14:6; 22:8, 9) Omu biro by’omu misho, nibija kurwana orutaro rwa Haramagedoni bari na Yesu.—Okushuuruurwa 16:14, 16; 19:14, 15.

▸ Cwek. 3, par. 5; Cwek. 10, par. 1

Ekicumuro ni ekintu cona eki turi kutekateka, ninga tukakora Yehova atari kukikiriza. Ahabw’okugira ngu ekicumuro nikishisha obunywani obu twine na Ruhanga, akatuteraho ebiragiro n’emisinge ebiri kuturinda kucumura tubigenderire. Omu kubanza Yehova akahanga ebintu byona bihikirire, konka obu Adamu na Eve bashaziremu kugomera Yehova bakaba bacumura baba abasisi. Bwanyima bakakura bafa, kandi ahabw’okuba baturagire ekicumuro, n’itwe nitukura kandi tufa.

▸ Cwek. 3, par. 7; Cwek. 5, par. 3

Haramagedoni ni orutaro rwa Ruhanga oru aricwecererezaho ensi ya Sitaane n’ebibi ebirimu.

▸ Cwek. 3, par. 13; Cwek. 8, par. 18

Obukama bwa Ruhanga ni obutegeki obu Yehova yatireho omu iguru. Yesu Kristo ni we Mugabe wabwo. Omu biro by’omu misho, Yehova aryakoresa obwo Bukama ayiheho ebibi byona omu nsi. Obukama bwa Ruhanga buryategeka ensi yona.

▸ Cwek. 3, par. 14

Ruhanga akabanza kuhanga Yesu atakahangire ebindi bintu byona. Yehova akatuma Yesu omu nsi ngu afere abantu bona. Yesu ku yamazire kwitwa, Yehova akamuzora. Hati Yesu ni Omugabe w’Obukama bwa Ruhanga omu iguru.

▸ Cwek. 4, par. 2

Bibuli ekaba yagambire obwire obu Mesia yabire arije kurebeceraho. Eki kikaba kirabeho bwanyima y’obwire oburi kwetwa esande 69, obwatandikire omu mwaka gwa 455 M.Y. kandi bukahwa omu mwaka gwa 29 B.Y.

Nitumanya tuta ku ezo sande zahwire omu mwaka gwa 29 B.Y.? Esande 69 zikatandika omu mwaka gwa 455 M.Y., obu Nehemia yahikire omuri Yerusaalemu rero akatandika kugihunduza. (Danieli 9:25; Nehemia 2:1, 5-8) Nk’oku ekigambo “akadazini” kiri kumanyisa 12, obwe rero ekigambo ‘esande’ nikimanyisa 7. Esande eziri kugambwa omuri obu buhanuzi tiziri kumanyisa esande y’ebiro mushanju, ahobwe ni esande z’emyaka mushanju, eziri kubugana n’obuhanuzi oburi kugira ngu: ‘Ekiro kimwe kiryayingana omwaka.’ (Okubara 14:34; Ezekieli 4:6) Eco nikimanyisa ku buri sande eri kwingana n’emyaka mushanju kandi ku esande 69 ziri kwingana n’emyaka 483 (ekiri kumanyisa 69 x 7). Twabara emyaka 483 kuruga omu mwaka gwa 455 M.Y., nituhika omu mwaka gwa 29 B.Y. Ogo ni go mwaka gwenyine ogu Yesu yabatizibweho, akaba Mesia!—Luka 3:1, 2, 21, 22.

 Obwo buhanuzi bukagamba ku habire harije kubaho endijo sande y’emyaka mushanju. Omuri eyo sande omu mwaka gwa 33 B.Y., Mesia akaba arayitwe, kandi omu ntandikiro y’omwaka gwa 36, obutumwa burungi bw’Obukama bwa Ruhanga bukaba burije kuburirwa omu mahanga gona hatari omu Bayudaya kusha.—Danieli 9:24-27.

▸ Cwek. 4, par. 7

Bibuli neyegesa ku Yehova Ruhanga ari Omuhangi kandi ku yahangire Yesu atakahangire ebindi bintu byona. (Abakolosai 1:15, 16) Yesu ti Ruhanga Owobushoborozi bwona. Taragerizeho kweyinganisa na Ruhanga. Ahobwe, akagamba ngu: “Tata nankira.” (Yohaana 14:28; 1 Abakorinso 15:28) Konka amadini mingi nigegesa Obushatu, gagamba ku Ruhanga arimu ba ruhanga bashatu omuri omwe: Tata, Omwana, n’Omwika oguri kwera. Ekigambo “Obushatu” tikiri kurebeka omuri Bibuli. Eyo ni enyegesa y’ekishuba.

Omwika oguri kwera ni amani ga Ruhanga, ni okumanyisa amani geye agatari kurebwa, agu ari kukoresa omu kuhikiriza ekigendererwa ceye. Omwika oguri kwera ti omuntu. Ecokureberaho: Abakristo b’omu kinyigana ecokubanza ‘bona bakijura [omwika] oguri kwera’ kandi Yehova akaba yagambire ngu: ‘Ndyashuka [omwika] gwange aha bantu bona.’—Ebyakozirwe 2:1-4, 17.

▸ Cwek. 4, par. 12; Cwek. 15, par. 17

Abakristo ab’amazima tibari kukoresa omusharaba omu kushaba kwabo. Ahabw’enki?

1.  Omusharaba gwamara obwire buringwa guri kukoresibwa omu dini ey’ekishuba. Omu bwire bwa kare gukaba nigukoresibwa omu kuramya ebyahangirwe ninga shi omu migenzo y’eby’obushambani. Bwanyima y’emyaka 300 Yesu aherize kufa, Abakristo bakaba batakakoresa omusharaba omu kuramya kwabo. Bwanyima y’emyaka myingi, ni bwo Omutegeki w’Abarooma ori kwetwa Konsitantini yahindwire omusharaba akamanyiso k’Omukristo. Ako kamanyiso kakaba nikakoresibwa kugira ngu Obukristo bukizeho kuranganwa. Konka omusharaba gukaba gutine akakwate na Yesu. Ekitabo kimwe kikashoborora ngu: “Omusharaba gukaba nigukoresibwa mbere ya Yesu n’omu bantu ababire batari Abakristo.”—The New Catholic Encyclopedia.

2.    Yesu taraferire aha musharaba. Ekigambo c’Orugurika ekiri kuhindurwamu “omusharaba” nikimanyisa “ekiti cemerire,” “omukomba” ninga “ekiti.” Ekitabo ekiri kushoborora Bibuli nikira ngu: “Tihariho ekintu na kimwe omu Rugurika c’omu [Ndagano Ensya] kiri kumanyisa ebiti bibiri.” Yesu akafera aha kiti kimwe.

3.  Yehova tari kwenda ngu tukorese ebishashuni n’obumanyiso omu kuramya kwitu.—Okuruga 20:4, 5; 1 Abakorinso 10:14.

▸ Cwek. 5, par. 12

Yesu akaragira abegi beye okuguma nibijuka okufa kweye. Eco nikikorwa buri mwaka aha kiro ca 14 Nisaani, aha kiro kimwe nk’eki Abaisraeri babire nibariraho Pasika. Omugati na vinyo, ebiri kugeranisa omubiri gwa Yesu n’eshagama yeye, nibitambuzibwa ahari buri wena oyizire omu Kijusyo. Abaryategeka hamwe na Yesu omu iguru nibarya aha mugati kandi banywa ahari vinyo. Abine amasiko ag’okutura omu nsi nibija aha Kijusyo konka bo tibari kurya aha mugati ninga ngu banywe ahari vinyo.

▸ Cwek. 5, par. 21

Omuri Bibuli y’Obuhinduzi bw’Ensi Ensya, ekigambo “amagara” nikikoresibwa kiri kumanyisa (1) omuntu, (2) enyamishwa, ninga (3) amagara g’omuntu ninga ag’enyamishwa. Reba ebyokureberaho:

• Omuntu. Omu Kutandika 2:17 nihagamba ngu obu Ruhanga yahangire Adamu, akamuhuhamu omwika gw’amagara rero yaba ‘omuntu ohurire.’

• Enyamishwa. ‘Ruhanga akagira ati: “Amizi gijure ebiri kwegendesa ebine amagara, kandi n’ebiri kuguruka biguruke ah’iguru omu kabunga.”’ Nambwenu ‘Ruhanga akagira ati: “ensi ezare ebine amagara omu miringo yabyo, amatungo n’ebiri  kugendesa enda n’enyamishwa z’omu nsi omu miringo yabyo.” Caba ni ko caba.’—Okutandika 1:20, 24.

• Amagara g’omuntu ninga ag’enyamishwa. Entumwa Paulo akahandika ngu: ‘Muhurire abebembezi banyu, muborobere; aha kuba ni bo barinda amagara ganyu, nk’abari kumanya ngu baryagabuzibwa.’ (Abaheburaayo 13:17) Obu Yesu yabire ari omu nsi, akagamba ngu: ‘Ni inye murisa murungi. Omurisa murungi ahayo amagara ge ahabw’entama zeye.’—Yohaana 10:11.

  Ekindi kandi, omuntu yakora ekintu n’‘amagara geye gona,’ nikiba nikimanyisa ku yakikora abyihire aha mutima kandi ku yataho amani geye gona. (Matayo 22:37; Eky’Ebiragiro 6:5) Ekigambo “amagara” nambwenu nikibasa kumanyisa ecetengo ninga omururu gw’ekintu ekine amagara. Omuntu ofire ninga shi omutumbi nikibasa kumanyisa amagara agafire.—Okubara 6:6; Enfumu 23:2; Isaaya 56:11; Hagai 2:13.

▸ Cwek. 6, par. 5; Cwek. 15, par. 17

Ebigambo by’Oruheburaayo n’Orugurika ebiri kuhindurwamu “omwika” omuri Bibuli y’Obuhinduzi bw’Ensi Ensya nibimanyisa ebintu byingi. Konka nibiba biri kumanyisa ekintu eki omuntu atari kubasa kureba, nk’omuyaga ninga shi omwika ogu abantu n’enyamishwa biri kuhumeka. Nambwenu ebyo bigambo nibimanyisa ebyahangirwe by’omwika, ninga omwika oguri kwera, ni okumanyisa amani agu Ruhanga ari kukoresa. Bibuli terikwegesa ku hine ekicweka ekiri kuruga omu muntu kikagumizamu kubaho yamara kufa.—Okuruga 35:21; Zaaburi 104:29; Matayo 12:43; Luka 11:13.

▸ Cwek. 6, par. 5; Cwek. 15, par. 17

Gehena ni izina ry’oruhanga orwabire ruri hihi ya Yerusaalemu ahu babire nibanaga ebisingwe rero bakabyosya. Tihariho ekiri kuhamya ku omu bwire bwa Yesu enyamishwa  n’abantu byabire biri kwitwa ninga kokibwa bihurire omuri orwo ruhanga. Obwe rero Gehena teri kumanyisa omwanya ogutari kurebwa eyi abantu abafire bari kwitirwa kubi kandi bakokibwa ebiro byona. Obu Yesu yagambire ahari abo abarinagwa omuri Gehena, akaba ari kumanyisa ku barimarwaho.—Matayo 5:22; 10:28.

▸ Cwek. 7, par. 20

Eyo ni eshara eyi Yesu yayegesize abegi beye obu yabire ari kubegesa kushaba. Nambwenu abamwe nibayeta ‘Tata itwe’ ninga shi ‘eshara ya Mukama witu.’ Ecokureberaho: Yesu akatwegesa kushaba tuti:

• ‘Izina ryawe ryezibwe’

  Nitushaba ngu izina Yehova ryezibwe ninga ryihweho ebishuba byona. Eco kishemerire kubaho kugira ngu ebyahangirwe byona eby’omu iguru n’eby’omu nsi bihe ekitinisa izina rya Ruhanga.

• “Obukama bwawe bwije”

  Nitushaba ngu Obukama bwa Ruhanga bumareho ensi ya Sitaane eyasisikire, butegeke ensi yona kandi bugihindure paradiso.

• ‘Ebi okunda bikorwe omu nsi’

  Nitushaba ngu ekigendererwa eki Ruhanga ayinire ensi kihikirizibwe kugira ngu abantu abari kumworobera batunge amagara agahikirire, kandi babeho ebiro byona omuri Paradiso, nk’oku Yehova yabire ari kubyenda acahanga abantu.

▸ Cwek. 8, par. 2

Yehova akatuha ekitambo kugira ngu atwihe omu kicumuro n’okufa. Ekitambo ni obuguzi obwashashwirwe kugira ngu tugarurirwe amagara agahikirire agu omuntu w’okubanza, Adamu, yaburize kandi tugarurirwe obunywani na Yehova.  Ruhanga akohereza Yesu omu nsi kugira ngu afere abantu bona. Ahabw’okufa kwa Yesu, abantu bona, nibabasa kubaho ebiro byona kandi bahikirire.

▸ Cwek. 8, par. 21; Cwek. 9, par. 13

Obuhanuzi bw’omuri Danieli ekicweka ca 4 nibutwereka ku Ruhanga yatireho Obukama bweye omu gwa 1914.

Obuhanuzi: Yehova akereka Omugabe Nebukadeneza omu kiroto ekiti kihango ecatemirwe. Omuri eco kiroto, akareba ekinsinsi kikomirwe n’omuringa n’ebyoma kugira ngu kitagumizamu kukura kandi kimare omwanya guri kwingana n’“emyaka mushanju.” Bwanyima, eco kiti kikaba kirije kusibuka.—Danieli 4:1, 10-16.

Eki obwo buhanuzi buri kumanyisa ahari itwe: Eco kiti nikigeranisa obutegeki bwa Ruhanga. Hakahwa emyaka myingi, Yehova ari kukoresa abagabe b’omuri Yerusaalemu ari kutegeka Israeli. (1 Obusingye 29:23) Konka abo bagabe tibaragumizemu kuba abesigwa, rero obutegeki bwabo bwahwaho. Yerusaalemu ekacwerezibwa omu mwaka gwa 607 M.Y. Eyo ni yo yabire entandikiro y’omwanya gw’“emyaka mushanju.” (2 Abagabe 25:1, 8-10; Ezekieli 21:25-27) Obu Yesu yagambire ku ‘Yerusaalemu yabire erije kuguma neribatirirwa abanyamahanga, okuhisya obu obusinge bw’abanyamahanga burihwaho,’ akaba nagamba aha bwire bw’“emyaka mishanju.” (Luka 21:24) Obwe rero “emyaka mushanju” terahwire obu Yesu yabire ari omu nsi. Yehova akaraganisa ku yabire arije kutaho Omugabe aha muheru gw’“emyaka mushanju.” Obutegeki bw’ogo Mugabe musya, Yesu, bukaba buraretere abahereza ba Ruhanga emigisha omu nsi yona kandi ekaba erije kugumaho ebiro byona.—Luka 1:30-33.

Oburingwa bw’“emyaka mushanju”: “Emyaka mushanju” ekamara emyaka eshangirwe 2,520. Twabara emyaka 2,520  tutandikire omu gwa 607 M.Y., nituhika omu gwa 1914. Omuri ogo mwaka ni bwo Yehova yatireho Yesu ninga Mesiya, akamugira Omugabe w’Obukama bwa Ruhanga omu iguru.

Mbwenu shi emyaka 2,520 nitugiha nkahe? Bibuli negamba ku emyaka ishatu n’ekicweka eri kwingana n’ebiro 1,260. (Okushuuruurwa 12:6, 14) Obwe rero omwanya gw’“emyaka mushanju” nigwingana n’emirundi ibiri, eri kubugana n’ebiro 2,520. Ebiro 2,520 nibyingana n’emyaka 2,520 aha kuba hariho obundi buhanuzi oburi kugamba ku ‘ekiro kimwe kiri kwingana n’omwaka.’—Okubara 14:34; Ezekieli 4:6.

▸ Cwek. 8, par. 23

Bibuli negamba marayika mukuru omwe wenka ori kwetwa Mikaeli.—Danieli 12:1; Yuda 9.

Mikaeli ni omukama w’amahe ga Ruhanga, ni okugamba ba marayika b’abesigwa. Omu Kushuuruurwa 12:7 nihagira ngu: ‘Mikaeli na ba marayika be bakarwanisa ekijoka na ba marayika baco.’ Ekitabo c’Okushuuruurwa nikigamba ku Omukama w’amahe ga Ruhanga ari Yesu. Obwe rero, Mikaeli ni erindi zina rya Yesu.—Okushuuruurwa 19:14-16.

▸ Cwek. 9, par. 4

Ni obwire obwabire burije kubamu ebintu bigumire, bwanyima Obukama bwa Ruhanga bukabona kwihaho ensi ya Sitaane. Hine ebindi bigambo by’omuri Bibuli ebiri kushoborora obwire bw’ebiro by’emperu, nk’‘obunaku obu ensi egi erihweraho’ ninga ‘okwija k’Omwana w’omuntu.’ (Matayo 24:3, 27, 37) ‘Ebiro by’emperu’ bikatandika obu Obukama bwa Ruhanga bwatandikire kutegecera omu iguru omu mwaka gwa 1914, kandi biryahendera obu ensi ya Sitaane eriba eri kucwekerezibwa aha rutaro rwa Haramagedoni.—2 Timoseo 3:1; 2 Petero 3:3.

▸ Cwek. 9, par. 5

Ruhanga yagarura omuntu owabire afire akongera kuba ohurire, obwe naba yamuzora. Bibuli netugambira enkuru mwenda ez’abantu abazokire. Eliya, Elisa, Yesu, Petero, na Paulo bona bakazora abantu. Amani ga Ruhanga ni go agatumire habaho ebyo byokutangaza. Yehova naturaganisa ku arije kuzora ‘abahikirire n’abatahikirire,’ bakongera kubaho omu nsi. (Ebyakozirwe 24:15) Nambwenu Bibuli negamba aha bantu abari kuzoka bakaza kutura omu iguru. Eco nikibaho abu Ruhanga yatorine, ninga abashukirweho omwika, ku bari kuzoka bakaza kuba hamwe na Yesu omu iguru.—Yohaana 5:28, 29; 11:25; Abafilipi 3:11; Okushuuruurwa 20:5, 6.

▸ Cwek. 9, par. 13

Okuragura ni ekikorwa kibi c’okugezaho kugamba n’emyika mibi, obyekorire ninga shi orabire aha mufumu. Abantu nibakora eby’okuragura aha kuba nibaba bari kwikiriza enyegesa y’ekishuba eri kugamba ngu hine omwika oguri kuruga omu muntu yamara kufa, guguma guhurire kandi ngu ni go oguri kurugamu omuzimu. Nambwenu ba dayimoni nibagezaho kuhabya abantu ngu bareke kuhurikiza Ruhanga. Okuragura harimu kwetegereza enyonyozi, kushoborora ebintu byine eki biri kumanyisa, kutera enteteri, okuragurisa enkoko y’ibara rimwe, entama, ebishaju, okushoma omu kiganja c’omuntu, n’ebindi. Ebitabo byingi, za magazini, za tivi na za movi, ebyapa, n’ebyeshongoro nibituma abantu batwara ba dayimoni n’amani agatari ga burijo nk’ebitine enshonga. Emigenzo nyingi eri kukorerwa aha kuzika, nk’okutambira omuntu ofire, okumara ebyosi, okwijuka ebiro by’amazarwa g’abafire, ebi bari kukorera ofisize, n’eyindi migenzo eyi bari kukora omuntu yafa, byona byine akakwate n’okugamba na ba dayimoni. Abantu nibakunda n’okukoresa ebitabura bwonko kugira ngu babone amani baba bari kukorengana na ba dayimoni.—Abagalatia 5:20; Okushuuruurwa 21:8.

▸ Cwek. 10, par. 10; Cwek. 16, par. 4

Yehova ni Rukirabona, kandi ni we yahangire iguru n’ensi n’ebirimu byona. (Okushuuruurwa 15:3) Ni yo nshonga ari we Mukama w’ebintu byona kandi ayine obushoborozi bw’okutegeka ebi yahangire byona. (Zaaburi 24:1; Isaaya 40:21-23; Okushuuruurwa 4:11) Akateraho ebiragiro ebintu byona ebi yahangire. Nambwenu Yehova ayine obushoborozi bw’okutaho abandi abagira abategeki. Nitwereka ku turi kushagika obutegeki bwa Ruhanga Rukirabona turi kumukunda kandi tukorobera biragiro byeye.—1 Obusingye 29:11.

▸ Cwek. 11, par. 10

Okwihamu enda okigenderire ni ekicumuro ahabw’okuba ni okwita omwana otakazirwe. Ti ekikorwa ekiri kubaho ahabw’okuhanuka ninga shi ecayereta ahabw’okwejumbura k’omubiri g’omuzire. Okwiha ihuri ry’omwana ryatandika kubaho, omwana naba ari omuntu ohurire, tari kuba akwatine na nyina.

▸ Cwek. 13, par. 5

Obu ni oburyo bw’okujanjaba bari kuta eshagama ninga ebicweka byayo omu mubiri g’omuntu bagihire omu muntu ondijo ninga shi omu shagama eyi babire babikire. Ebicweka by’eshagama ni: Omushongi, enshoro eziri kutukura, enshoro eziri kwera, n’otukwasi.

▸ Cwek. 13, par. 13

Omuri Bibuli, ekigambo “ekihano” tikiri kumanyisa kutera omuntu. Ahobwe nikimanyisa kwegesa, kuha ebiragiro n’okuhabura. Yehova yaba nahana, tari kuba ensharizi ninga shi ngu ashashe omuntu. (Enfumu 4:1, 2) Yehova naha abazire ecokureberaho kirungi. Ekihano eki ari kuha omuntu nikimugasira kituma yakizaho kukunda ekihano. (Enfumu 12:1) Yehova nakunda abantu beye kandi abegesa. Nabaha obuhabuzi oburi kutuma bahindura ebitekateko byabo ebitahikire kandi butuma bayega kutekateka n’okukora ebiri kumushemeza. Abazire nibahana abana babo bari kubakwasa kushoborocerwa kumanya enshonga bashemerire korobera ebiragiro. Nambwenu, harimu kubegesa kukunda Yehova, ekigambo ceye, Bibuli, n’okushoborocerwa emisinge yayo.

▸ Cwek. 14, par. 13

Ba dayimoni ni ebyahangirwe by’omwika ebibi, ebitari kurebwa n’amisho kandi byine amani agari kukira ag’abantu. Ba dayimoni ni ba marayika babi. Bakahinduka babi obu bayehindwire abangi ba Ruhanga, bari kumugomera. (Okutandika 6:2; Yuda 6) Bakakwatanisa na Sitaane omu kugomera Yehova.—Eky’Ebiragiro 32:17; Luka 8:30; Ebyakozirwe 16:16; Yakobo 2:19.

▸ Cwek. 16, par. 4