Yehova akahanga ensi ngu eturwemu abantu. Ni eka yitu. Ni ahabw’eco, abantu ab’okubanza, Adamu na Eva, tibarahangirwe ngu bazare bature omu iguru; Ruhanga akaba yaherize kuhanga ba marayika ngu bature omu iguru. (Yobu 38:4, 7) Ahobwe, Ruhanga akata omuntu ow’okubanza omuri paradiso eri kwetwa Edeni. (Okutandika 2:15-17) Yehova akamuha omugisha g’okubaho ebiro byona omu nsi, we hamwe n’abijukuru beye.​—Shoma omuri Zaaburi 37:29; 115:16.

Omu kutandika, omusiri gwa Edeni ni go gonka ogwabire guri paradiso. Omukazi n’omushija ab’okubanza bakaba barije kuzara bakijuza ensi. Bakaba barije kuhindura ensi yona paradiso. (Okutandika 1:28) Ensi egi teryahwaho. Eryagumaho kandi etwirwemu abantu.​—Shoma omuri Zaaburi 104:5.

Adamu na Eva bakagomera Yehova Ruhanga, yababinga omuri Edeni. Obwe paradiso ekahika nehwaho kandi tihine omuntu owabasize kugigaruraho. Bibuli negamba ku ensi eri “omu mikono y’ababi.”—Yobu 9:24.​—Shoma omu Kutandika 3:23, 24.

Mbwenu shi Yehova akebwa abantu beye? Ingaha! Ayine amani mingi kandi tari kubasa kuremwa. (Isaaya 45:18) Nayija kugarura abantu omu mbera ezi yabire nayenda ngu babemu.​—Shoma omuri Zaaburi 37:11, 34.

Paradiso neyija kugarurwa ku Yesu aratandike kutegeka ensi ari Omugabe w’Obukama bwa Ruhanga. Aha rugamba rwa Harimagedoni, Yesu nayija kwija na ba marayika bamareho abantu bona abari kurwanisa Ruhanga. Bwanyima Yesu aryasiba Sitaane amare emyaka 1,000. Abahereza ba Ruhanga  baryarokoka ahabw’okuba Yesu aryabaha obuhabuzi kandi abarinde. Nibija kubaho ebiro byona bashemerirwe omuri paradiso omu nsi.​—Shoma omu Kushuuruurwa 20:1-3; 21:3, 4.

Ruhanga aryamaraho ebibi ryari omu nsi? Yesu akagamba ‘ebimanyiso’ ebiri kwereka ngu emperu eri hihi. Ebintu ebiri kubaho omuri obu bwire nibitinisa abantu kandi nibyereka ku twahikire omu biro by’“emperu” y’egi nsi.​—Shoma omuri Matayo 24:3, 7-14, 21, 22.

Omu bwire bw’emyaka 1,000 Yesu ari kutegeka ensi, aryayihiraho kimwe okubonabona kona omu nsi yona. (Isaaya 9:6, 7; 11:9) Orekire kuba Yesu ari Omugabe, nambwenu ni Omutambi Mukuru kandi abantu bari kukunda Ruhanga aryabasasira ebibi. Oko ni ko Ruhanga aryihaho oburwire, okukura n’okufa, akoresize Yesu.​—Shoma omuri Isaaya 25:8; 33:24.

Abantu abari korobera Ruhanga nibija kutura omuri paradiso. (1 Yohaana 2:17) Yesu akatuma abakurasi beye kuronda abantu abari kwecureza bakabegesa eki bashemerire kukora ngu Ruhanga abikirize. Erizoba, Yehova ariyo nayegesa abantu bingi munonga abarije kutura omuri paradiso omu nsi. (Zefania 2:3) Aha Nju za Yehova abantu nibahegera kuba abashija, abakazi n’abazire barungi. Abana n’abazire nibaramiza hamwe kandi bega oku bari kubasa kuhurikiza obutumwa burungi.​—Shoma omuri Miika 4:1-4.