Ruhanga nayenda ngu abantu babeho omu nsi bashemerirwe. Akahanga ensi n’ebigirimu byona ahabw’okuba nakunda abantu. Juba aha nayija kugira eki yakora ngu abantu b’omu nsi yona babeho bine amagara marungi. Nayija kwihaho ebintu byona ebiri kutuma abantu babonabona.​—Shoma omuri Yeremia 29:11.

Tihariho obutegeki obwabasize kwihaho obugomi, endwara n’okufa. Konka tukwinire obutumwa burungi. Juba aha, Ruhanga nayija kwihaho obutegeki bwona bw’abantu, ateho obutegeki bweye. Abaturage babwo nibija kugira obusinge n’amagara marungi.​—Shoma omuri Isaaya 25:8; 33:24; Danieli 2:44.

Ruhanga ku aramareho abantu babi, okubonabona kuryahwaho. (Zefania 2:3) Eco kiryabaho ryari? Ekigambo ca Ruhanga kikaba cagambire ebintu bibi ebiriho hati omu nsi. Ebintu biri kubaho omuri obu bwire nibyereka ku Ruhanga ari hihi kugira eki yakora.​—Shoma omuri 2 Timoseo 3:1-5.

Tushemerire kwega Bibuli, tukamanya Ruhanga. Bibuli ni nk’ebaruha yarugire ahari tata ori kutukunda munonga. Netugambira oku turi kubasa kugira okushemererwa hati, n’oku turije kubaho ebiro byona omu nsi. Obu watandika kwega Bibuli, abantu bamwe tibarashemererwe. Konka otayikiriza ngu bakuzibire kwega ebintu birungi ebi Ruhanga ari kuturaganisa.​—Shoma omu Nfumu 29:25; Okushuuruurwa 14:6, 7.