Tekateka omuzire oyine rukundo yareba omwana weye muto yaza ah’ishomero. Naba ashemerire kumwoza kandi areba yaba n’ebijwaro byeye byogize. Eco nikituma yaguma ayine amagara marungi, kandi nicereka abandi ku abazire beye bari kumufaho. Ni co kimwe na Tata witu w’omu iguru Yehova nayenda ngu tugire obuyonjo aha mubiri, omu bi turi kutekateka, omu bi turi kugamba n’omu bi turi kukora. Ku turi kuba abayonjo nikitugasira kandi kituma Tata witu w’omu iguru yahimbisibwa.

1. Ni bata oku turi kubasa kuba abayonjo aha mubiri?

Yehova natugambira ngu: ‘Mushemerire kuba abari kwera.’ (1 Petero 1:16) Okuba abari kwera, nikitwariramu okuba abayonjo aha mubiri, omu bi turi kutekateka, omu bi turi kugamba n’omu bi turi kukora. Nitubasa kuba abayonjo aha mubiri turi kunaba burijo, turi koza ebijwaro byitu, turi kuyonja omu maka gitu, n’emotoka zitu. Nambwenu, nitubasa kwekwatanisa omu kuboneza Enju y’Obukama. Ku turi kugira obuyonjo aha mubiri nikituma Yehova yahimbisibwa.—2 Bakorinso 6:3, 4.

2. Ni eha mitwarize eyi tushemerire kwerinda, kugira ngu tube abari kwera?

Bibuli netugambira ngu: ‘Tweyozyeho oburofa bwona obw’aha mubiri n’obw’omu mwika.’ (2 Bakorinso 7:1) Obwe rero, tushemerire kutaho amani kugira ngu twerinde ekintu cona ekiri kubasa kushisha omubiri gwitu n’ebitekateko byitu. Ebitekateko byitu bishemerire kuhisa Yehova ekitinisa; obwe rero nituba tushemerire kukora cona eki turi kubasa kugira ngu twerinde ebitekateko bibi. (Zaaburi 19:14) Nambwenu nituba tushemerire kukoresa ebigambo birungi.—Shoma omu Bakolosai 3:8.

Ni biha bindi bintu ebiri kubasa kutuma twaba abarofa aha mubiri, omu bitekateko, omu bigambo n’omu bikorwa? Hariho ebindi bintu ebiri kubasa kushisha omubiri gwitu. Nitwerinda kuresa etabi, amababi ga kokowa n’okweshemeza turi kukoresa emibazi y’ebitaburabwonko. Ebyo ku turi kubyerinda, nitugira amagara marungi, kandi nituba twayereka ku turi kureba ekiconco c’amagara nk’ec’omuhendo. Nambwenu nitutaho amani kugira ngu tube abari kwera omu by’emicwe, turi kwerinda ebikorwa by’oburofa nk’okwemarisa n’okureba puronogurafi. (Zaaburi 119:37; Abaefeso 5:5) Nikibasa kutugumira kubyerinda; konka Yehova naba ayetegwire kutukwasa.—Shoma omuri Isaaya 41:13.

 YEGA BYINGI

3. Twaba abayonjo aha mubiri nikituma Yehova yahimbisibwa

Ku turi kushwijuma ebiragiro ebi Yehova yahire Isirayeli ya kare, nikituma twashoborocerwa oku ari kureba eby’obuyonjo. Shoma omu Kuruga 19:10 na 30:17-19, rero muganire ahari ebi bibuzo:

• Ni bata oku ezi nyiriri ziri kwereka oku Yehova ari kureba ebikwatirine n’obuyonjo bw’aha mubiri?

• Ni biha bintu birungi ebirije kukukwasa kuguma oyine obuyonjo bw’aha mubiri?

Kugira ngu tugire obuyonjo bw’aha mubiri nikitwara obwire n’amani. Konka nitubasa kuba abayonjo ahu twakuba tutwire hona, twakuba turi aboro ninga shi abagiga. Zana VIDIYO, rero muganire ahari eki kibuzo.

• Ni bata oku kuguma turi abayonjo kandi turi abari kwera kiri kutuma abandi bareba omurimo gwitu g’okuburira nk’og’omuhendo?

4. Reka kukora ebikorwa bibi

Yaba ori kuresa ninga ori kweshemeza okoresize emibazi y’ebitaburabwonko, nomanya oku kigumire kureka ebikorwa bibi. Ni enki ekiri kubasa kukukwasa? Guma otekateke aha ngaruka z’ebyo bikorwa bibi. Shoma omuri Matayo 22:37-39, rero muganire aha ku okuresa etabi ninga kukoresa emibazi y’ebitaburabwonko biri kukwata aha bunywani bwawe . . .

• na Yehova.

• n’abanyabuzare bawe n’abatahi.

Yetereho entego y’okureka ebikorwa bibi. * Zana VIDIYO.

Shoma omu 2 Bakorinso 4:7, rero muganire ahari eki kibuzo:

• Ni bata oku kushaba burijo, kweyegesa Bibuli, n’okuza omu nterane burijo kiri kubasa kukwasa omuntu kureka ebikorwa bibi?

 5. Yerinde ebitekateko bibi n’emitwarize mibi

Shoma omu Bakolosai 3:5, rero muganire ahari ebi bibuzo:

• Nitumanya tuta ku puronogurafi, kohererezanya obutumwa oburi kugamba aha by’obushambani n’okwemarisa biri oburofa omu misho ga Yehova?

• Mbehi noreba kiri ec’obwenge kuba Yehova ari kutushaba kuba abari kwera omu bitekateko, omu bigambo n’omu bikorwa? Ahabw’enki?

Manya oku ori kubasa kurwanisa ebitekateko bibi. Zana VIDIYO.

Yesu akakoresa ecokureberaho ari kwereka ku tushemerire kumarira kuguma turi abari kwera omu bitekateko, omu bigambo n’omu bikorwa. Shoma omu Matayo 5:29, 30, rero muganire ahari eki kibuzo:

• N’obu Yesu ataragambire ku turi kweshisha aha mubiri, akagamba ku tushemerire kugira eki twakora. Ni biha bintu ebi omuntu ari kubasa kukora ebiri kwereka ku ari kwerinda ebitekateko bibi? *

Yaba ori kutaho amani ngu osingure emitekacere mibi, Yehova nakusima ahabw’amani agu ori kutaho. Shoma omuri Zaaburi ya 103:13, 14, rero muganire ahari eki kibuzo:

• Yaba hine omucwe mubi ogu oyine, ni bata oku eki cahandikirwe, kiri kukuhiga kuguma ori kugurwanisa?

 EMPINYE

Ku turi kuba abayonjo aha mubiri, omu bitekateko, omu bigambo n’omu bikorwa nikituma Yehova yahimbisibwa.

Wayega ki?

• Ahabw’enki tushemerire kuba abari kwera?

• Tukakora ki kugira ngu tugire obuyonjo bw’aha mubiri?

• Ni bata oku ori kubasa kuguma oyine ebitekateko n’emicwe mirungi?