ISHOMO RYA 59
Nobasa kwehanganira okuhiganisibwa
Juba aha Abakristo twena nitwija kubugana okuhiganisibwa. Konka shi eco kishemerire kututinisa?
1. Ahabw’enki tushemerire kwetegurira okuhiganisibwa?
Bibuli negamba ngu: ‘Abamaririre kumara ebiro by’amagara gabo byona omuri Yesu, nibatina Ruhanga baryahiigwa.’ (2 Timoseo 3:12) Yesu akahiganisibwa ahakuba yabire atari ow’egi nsi ya Sitane. N’itwe ahakuba tutari ab’ensi, tikishemerire kututangaza abategeki ninga shi abanyamadini batuhiganisa.—Yohaana 15:18, 19.
2. Ni bata oku turi kubasa kwetegurira okuhiganisibwa?
Tushemerire kukizaho kwesiga Yehova omuri obu bwire. Guma okwate obwire burizoba omushabe kandi oshome Bibuli. Guma oze omu nterane burijo. Ebyo ku orabikore nibyija kukuha amani g’okwehanganira okuhiganisibwa oyine obumanzi n’obu kwakuba kuri kuruga omu banyabuzare bawe. Entumwa Pawulo owahiganisibwe emirundi myingi, akahandika ngu: ‘Yehova ni we muhwezi wange tinditina.’—Abaheburaayo 13:6.
Nambwenu nitubasa kugumya obumanzi bwitu turi kuburira burijo. Omurimo g’okuburira nigutuma twakizaho kwesiga Yehova kandi nigutuma tutatina abantu. (Enfumu 29:25) Yaba omuri obu bwire ori kuguma kuburira oyine obumanzi, nicereka ku orije kuba oyetegwire kuburira n’obu abategeki bakwemereza omurimo gwitu.—1 Abatesalonika 2:2.
3. Ni bata oku turi kugasirwa twayehanganira okuhiganisibwa?
Ni amazima tituri kushemerererwa okuhiganisibwa, konka ku turi kuhiganisibwa tukehangana, okwikiriza kwitu nikukizaho kuguma. Ahabw’okuba twayerebire oku Yehova ari kutukwasa twaba tuhwiremu amani, tukakizaho kumuhika hihi. (Shoma omuri Yakobo 1:2-4.) Yehova nashasha yareba turi kubonabona; konka ku turi kwehangana nikimushemeza. Bibuli negamba ngu: ‘Konka ku muri kukora ge mwabonabonesibwa mukagumisiriza, eco nico ekiri kusimwa ahari Ruhanga.’ (1 Petero 2:20) Ekihembo eki Yehova arije kuha abari kuguma kwehangana omu bwesigwa, ni amagara agatahwaho omu nsi erije kuba etacarimu okuhiganisibwa erimu abari kumuramya bonka.—Matayo 24:13.
YEGA BYINGI
Reba enshonga ahabw’enki kiri kubasika kuguma turi abesigwa ahari Yehova n’obu twakuba turi kuhiganisibwa n’emigisha eyi turije kutunga twakikora.
4. Nobasa kwehanganira okuhiganisibwa
Yesu akatugambira ku ab’omu maka gitu hine obu babire batarije kushagika ensharamu yitu y’okuramya Yehova. Shoma omuri Matayo 10:34-36, rero muganire ahari eki kibuzo:
-
Ni enki ekiri kubasa kubaho omuntu omwe omu ka yasharamu kuhereza Yehova?
Kugira ngu orebe ecokureberaho, zana VIDIYO, rero muganire ahari eki kibuzo.
-
Ni enki eki orije kukora omunyabuzare wawe ninga shi munywani wawe yakuzibira kuhereza Yehova?
Shoma omuri Zaaburi ya 27:10 n’omuri Mako 10:29, 30. Ku muramare kushoma buri runyiriri muganire ahari eki kibuzo:
-
Ni bata oku eki kiraganiso kiri kukukwasa omunyabuzare ninga shi omunywani wawe yakuhiganisa?
5. Gumizamu kuramya Yehova n’obu wakuba ori kuhiganisibwa
Kuramya Yehova nicetengesa obumanzi abandi baba bari kutuzibira kukikora. Zana VIDIYO, rero muganire ahari eki kibuzo.
-
Ni bata oku ebyokureberaho ebiri omuri egi vidiyo byakugaruramu amani?
Shoma omu Byakozirwe 5:27-29 n’omu Baheburaayo 10:24, 25. Ku muramare kushoma buri runyiriri muganire eki kibuzo:
-
Ahabw’enki kiri ec’omugasho kugumizamu kuramya Yehova, n’obu omurimo gwitu g’okuburira ninga shi enterane byakuba byayemerezibwe?
6. Yehova nayija kukukwasa kwehangana
Abahamya ba Yehova abatari kwinganisa emyaka kandi abari kuruga omu tucweka otutari kushushana bakagumizamu kuhereza Yehova bari abesigwa n’obu babire bari kuhiganisibwa. Kugira ngu orebe ecabakwasize kubihikaho, zana VIDIYO. Bwanyima muganire ahari eki kibuzo.
-
Nk’oku wakireba omuri vidiyo, ni enki ecakwasize Abahamya abari kugambwamu kwehangana?
Shoma omu Barooma 8:35, 37-39 n’omu Bafilipi 4:13. Ku muramare kushoma buri runyiriri muganire ahari eki kibuzo:
-
Tukuratize ebi twashoma, ni enki ekiri kubasa kutuma wayesiga otari kubanganisa ku orije kwehanganira ebigezo?
Shoma omuri Matayo 5:10-12, rero muganire ahari eki kibuzo:
-
Ahabw’enki ori kubasa kuguma oyine okushemererwa n’obu wakuba ori kuhiganisibwa?
Abahereza ba Yehova bingi bakehanganira okuhiganisibwa. Kandi n’iwe okabibasa!
ABANTU ABAMWE NIBAGAMBA NGU: “Tindi kubasa kwehanganira okuhiganisibwa.”
-
Ni ziha nyiriri ezi ori kubasa kubashomera eziri kubereka ku bari kubasa kwehanganira okuhiganisibwa?
EMPINYE
Yehova natureba nk’ab’omuhendo ahabw’amani agu turi kutamu kugira ngu tugumizemu kumuhereza n’obu twakuba turi kuhiganisibwa. Yehova yatukwasa nitubasa kugumizamu kwehanganira okuhiganisibwa!
Wayega ki?
-
Ahabw’enki Abakristo bashemerire kwetegurira okuhiganisibwa?
-
Ni enki eki ori kubasa kukora hati kugira ngu okuhiganisibwa kwije kushanga oyetegwire?
-
Ni enki ekiri kubasa kukukwasa kwesiga otari kubanganisa ku ori kubasa kugumizamu kuhereza Yehova n’obu wakubugana ebigezo?
CONDOZA
Reba oku mwenetata ocari muto ari kushoborora oku Yehova yamukwasize kwehangana obu yabire asibirwe ahabw’okutejwanga omu by’obutegeki.
Reba ecakwasize omushija n’omukazi kugumizamu kuhereza Yehova omu bwesigwa n’obu bamazire emyaka myingi bari kuhiganisibwa.
Bakagumizamu kuhereza Yehova n’obu ebintu byahindukire (7:11)
Manya oku ori kubasa kwehanganira okuhiganisibwa oyine obumanzi.
“Yetugurire okugezibwa” (Omunara g’Omurinzi, Okwamushanju 2019)
Ni bata oku tushemerire kureba abanyabuzare bitu abari kutuhiganisa, kandi shi ni bata oku turi kubasa kwehanganira ebizibu ebi turi kubugana batuhiganisa?
“Amazima tigari kureta obusinge ahobwe nigareta rurara” (Omunara g’Omurinzi, Okwikumi 2017)
