Akkapél a wewe ngeni eú sókkun pwon mi chou nge emén mi eáni ena pwon a alúkúlúkú pwe epwe apwénúetá minne a apasa, me fán chómmóng aramas ra paani iten Kot lón ar akkapél. Ena sókkun pwon emén a tongeni apasa are makkeei.

Eli ekkóch repwe ekieki pwe ese pwúng án emén epwe akkapél pokiten alon Jesus ei: “Kosap fokun akapel lupwen ka eäni eu pwon. . . . Kopwe chök apasa, ‘Ewer, ewer,’ ika ‘Apw, apw,’ pun mine a som seni a pop seni ewe mi Ngau.” (Mat. 5:33-37) Pwúngún Jesus a silei pwe ekkóch néún Kot kewe chón angang mi tuppwél ra fen eáni eú akkapél, a pwal silei pwe mi wor ekkóch atun a lamot án aramas repwe eáni eú akkapél me ren ewe Allúkún Moses. (Ken. 14:22, 23; Eks. 22:10, 11) A pwal silei pwe Jiowa pwisin a pwal eáni pwon fán akkapél. (Ipru 6:13-17) Ina minne, alon Jesus kana esap weween pwe sisap fókkun eáni eú akkapél, nge a fen éúréúra aramas ar resap akkapél wóón ekkewe mettóch rese lamot are mi chék lamotkisikis. A lamot fansoun meinisin sipwe apwénúetá ach kewe pwon pún ina met Jiowa a mochen ach sipwe féri.

Iwe, met kopwe féri ika emén a tingoreok óm kopwe eáni eú akkapél? Akkomw, kopwe nochchei ika ka tongeni apwénúetá ena pwon ka ekiekin eáni. Ika ka tipemwaramwar, iwe epwe fen éch óm kosap akkapél. Iei met án Paipel éúréúr: “A mürina om kosap pwon, lap seni om kopwe pwon, nge kosap apwönüetä.” (SalAf. 5:5) Mwirin, ekieki ekkewe kapasen emmwen lón Paipel mi weneiti ewe akkapél emén a tingoreok óm kopwe eáni, me apwúngaló met kopwe féri me ren mwelien letipom. Ikkefa ekkewe kapasen emmwen lón Paipel?

Ekkóch akkapél ra tipeeú ngeni letipen Kot. Áwewe chék, ekkewe chón apwúpwúlú Chón Pwáraatá Jiowa ra pwonfengen lón ránin ar apwúpwúlú. Ekkena pwonen apwúpwúlú, iir eú sókkun akkapél. Emén mwán me emén fefin ra pwonfengen fán mesen Kot me aramas pwe repwe tongfengen, súfélfengen me repwe féri ena “lón unusen ánein manawer.” (Ekkóch chón apwúpwúlú eli rese eáni ena chék itiitin kapas atun ra pwúpwúlú, nge ra chúen eáni akkapél mwen mesen Kot.) Iwe, ra wiliti mwán me fefin pwúpwúlú me repwe pwúpwúlú lón unusen ánein manawer. (Ken. 2:24; 1 Kor. 7:39) Ei pwonen apwúpwúlú a pwúng me tipeeú ngeni letipen Kot.

Ekkóch akkapél ra ú ngeni letipen Kot. Emén Chón Kraist mi enlet esap eáni eú pwon fán akkapél pwe epwe maun fán iten fénúan, are pwon pwe epwe likitaló Kot. An féri ena a atai án Kot kewe allúk. Ekkewe Chón Kraist iir rese “pop seni ei fanüfan,” ina popun resap angolong lón osukosuken ei fénúfan.—Joh. 15:19; Ais. 2:4; Jas. 1:27.

 Ekkóch akkapél ra lóngólóng wóón mwelien letipen emén. Fán ekkóch, eli a lamot ach sipwe etittinafichi eú akkapél me ren án Jesus ei kapasen emmwen “oupwe ngeni Sisar mine än Sisar, nge oupwe ngeni Kot mine än Kot.”​—Luk. 20:25.

Áwewe chék, sipwe erá pwe emén Chón Kraist a mochen an epwe wiliti emén chón wiliposun eú fénú are féri néún passport. Nge me ren allúkún ena mwú, a lamot eménna epwe akkomw eáni eú pwon fán akkapél pwe i epwe tuppwél ngeni ena mwú. Iwe, ika mi kapachelong lón ena pwon án emén Chón Kraist epwe féri eú féffér epwe atai án Kot allúk, iwe mwelien letipan esap mut ngeni an epwe eáni ena pwon. Iwe nge, eli ewe mwú epwe mut ngeni ena Chón Kraist an epwe ekkesiwili kapasen ena akkapél me ren mwelien letipan.

Án emén eáni ena sókkun akkapél mi fen siwil kapasan a tipeeú ngeni ei kapasen emmwen lón Rom 13:1, a erá: “Aramas meinisin repwe aleasochisi nöüwisen ewe mwü mi nemeniir.” Ina popun, emén Chón Kraist epwe tongeni apwúngaló pwe ese wor ngawen an epwe pwonei le féri eú mettóch Kot a fen allúkú ngeni.

A lamot óm kopwe aúseling ngeni mwelien letipom atun aramas ra erenuk óm kopwe áeá och pisek are féri och pwomwen inisum atun ka eáni akkapél. Áwewe chék, án ekkewe chón Rom me Scythia akkapél fán néúr ketilas, weween ra akkapél ngeni ar we koten maun. Ar pwon ngeni ar na kot a affata pwe repwe chék apwénúetá minne ra pwonei. Ekkewe chón Krik ra eitaatá péúr atun ra akkapél, weween pwe me rer mi wor emén kot mi manaman a kúna met ra féri me silei met ra apasa me repwe etittin mwen mesan.

Emén Chón Kraist esap eáni akkapél wóón och liosun ewe mwú mi riri ngeni fel mi chofona. Nge met ika lón kapwúng mi lamot óm kopwe watá poum wóón ewe Paipel me akkapél pwe kopwe pwáraatá minne mi enlet? Lón ena atun, ka tongeni filatá le féri ena pokiten Paipel a pwal apwóróusa usun án ekkóch aramas mi tuppwél eáni eú akkapél fán pwomwen inisiir. (Ken. 24:2, 3, 9; 47:29-31) Mi lamot kopwe chechchemeni pwe ka eáni ena akkapél mwen mesen Kot pwe kopwe apasa minne mi enlet. A lamot óm kopwe mmólnetá le pélúweni ekkewe kapas eis repwe tongeni eisinuk.

Pokiten sia aúcheani ach riri ngeni Jiowa, mi lamot sipwe ikkióteki eú me eú ekkewe akkapél aramas ra apasa pwe sipwe eáni, me sipwe túmúnú pwe esap ú ngeni mwelien letipach are án Paipel kapasen emmwen. Ika ka filatá óm kopwe eáni eú akkapél, mi lamot kopwe apwénúetá.​—1 Pet. 2:12.