Semei we itan John Mills, a papatais lón ewe ier 1913 me New York City lón an ier 25. Pwiich we Russell a wisen eáni afalafalen an we papatais. Mwirin chék ena, a ló Trinidad. Me ikena ie a pwúlúweni Constance Farmer, emén Chón Káé Paipel mi tinikken. Papa a álisi chienan we itan William R. Brown le áiti ngeni aramas ewe “Photo-Drama of Creation.” Ra féri ena tori án William R. Brown we famili ra kefil ar repweló álillis West Africa lón ewe ier 1923. Papa me Mama, ra chék sópweló ar angang lón Trinidad fán ar ápilúkúlúkún manaw lón láng.

Semei kewe me inei ra néúni tiwemén. Ra eita ngeni ewe mwánichi Rutherford , iten ewe presetenin Watch Tower Bible and Tract Society lón ena atun. Nge atun ua uputiw lón December 30, 1922, ra eita ngeniei Woodworth, ina án Clayton J. last name ewe mi kan wisen cheki masouen The Golden Age (iei a iteni Awake!). Semem kewe me inem ra tiinikemiló ngeni elementary nge ra kon alamota met aupwe achocho le tikeri lón pekin lúkú. Inem we a mmen fókkun lipwákéch le pesei aramas seni án Kot Kapas. Semem we a fókkun sani le apwóróusa ekkewe pwóróus lón Paipel, me a kan áeá unusen inisin le pwomweni pwe epwe ámmeseik ekkena pwóróus.

Ar achocho a uwaéch. Úlúmén leim ekkewe nimmén át aua fiti Sukulen Gilead. Úlúmén me lein fefinem kewe ra pioneer ren langattam fansoun lón Trinidad and Tobago. Pokiten án semem kewe me inem asukul me leenien áppirú mi múrinné, ra fótukikemitiw “lon imwen ewe Samol mi Lapalap.” Ar apéchékkúl a álisikem le nónnóm ikena me mámmáár “lon än ach we Kot we imwenfel.”​—Kölf. 92:13.

Imwem we a wiliti ewe base fán iten ewe angangen afalafal. Ekkewe pioneer ra chuto lón imwem we me fóffós usun Pwiich George Young, emén misineri seni Canada mi etto Trinidad. Fán mwasangasang, semei kewe mi inei ra fós usun chiechier  kewe, án William R. Brown we famili, nge lón ena atun ra nóm lón West Africa. Ekkena mettóch meinisin ra amwékútúei ai upwe poputá le fiti ewe angangen afalafal atun a 10 ieri.

Néúch kewe puk lón na fansoun ra pwári meinisin met lamalam chofona ra féri, a pwal pwári tipemmóngun pekin business, me féfféringawen politics. Pokiten ena, lón ewe ier 1936 ekkewe néúwisin lamalam ra amwékútú ewe kepinaan Trinidad lón na fansoun an epwe pinei meinisin ekkewe puk minen Watch Tower. Aua aopa ekkewe puk nge aua chék sópweló le néúnéú tori a it. Aua karis fán esissil, karis wóón wáám kewe pasiken, me anéúnéú taropween etiwetiw. Ren álillisin chón ewe kúmi seni ewe sóópw itan Tunapuna iir mi kan afalafal fán ewe sein ettik afalafal, aua tongeni afalafal lón ekkewe leeni mi fókkun towau lón Trinidad. A mmen apwapwa! Ai nónnóm lein pwiich kewe mi féfféri ekkena mettóch a amwékútúei le papatais atun a 16 ieri.

Uruwoon ai we famili me ekkena angang ua féri lón ewe angangen afalafal lón ena fansoun, a efisi ai mochen upwe wiliti emén misineri. A chúen wor ai mochen le wiliti emén misineri atun ua ló ngeni ewe fénú itan Aruba lón ewe ier 1944 me aua angangfengen me Pwiich Edmund W. Cummings. Aua mmen pwapwa pwe aua tongeni ochufengeni 10 aramas fán iten ewe Áchechchem lón ewe 1945. Nge lón ewe ier mwirin, a poputá ewe áeúin mwichefel lón ena fénú.

Ekiseló mwirin, ua afalafal sereseréch ngeni emén chienei chón angang fefin itan Oris Williams. Oris a mmen péchékkúl lón an peni ekkewe pwóróus usun Paipel a fen káé. Nge seni ám káéfengen ewe Paipel, Oris a káé met án Kot we Kapas a wesewesen apasa, iwe a papatais lón January 5, 1947. Mwirin och fansoun aua pwúpwúlú. A poputá le pioneer lón November 1950. Manawei a fókkun sópwéch ren Oris.

Lón 1955, aua ketiw ngeni ewe Sukulen Gilead. Ren ám aupwe mmólnetá ngeni ena feiéch, ám me Oris aua towu seni ám angang, améméló imwem we me pwal pisekim kewe, me aua ló seni Aruba. Lón July 29, 1956, aua sochungio seni ewe érúwe me fisuwen Sukulen Gilead me ra tiinikemiló Nigeria.

Iei met Oris a erá atun a ekieki usun an angang lón ena fansoun: “Án Jiowa we manaman mi fel a tongeni álisi emén misineri an epwe likiitú fán sissiwilin nónnómun manawan. Ese wor ai mochen le wiliti emén misineri, usun chék án pwúlúwei we mochen. Ua fen mochen an epwe wor imwei, me epwe wor nei. Ua siwili ekieki atun ua mirititi úkúkún atapwalapwalen ach ei fansoun le afalafala ewe pwóróus allim. Seni ewe atun aua sochungio seni Gilead, ua fókkun mmólnetá le afalafal usun chék emén misineri. Iwe atun aua tétá wóón ewe siip itan Queen Mary, Worth Thorton, ewe mi angang lón án Pwiich Knorr ofes, a kapong ngenikem. A erenikem pwe aupwe angang lón Bethel. Nge ua oro lichippúng ren ai rong ena. Nge ua mwittir siwili ekieki, me ua mmen aúcheani ai kewe sókkopaten angang lón Bethel. Ewe angang ua sani seni meinisin, ina ai etiwalóng aramas lón Bethel. Ua mmen sani aramas, me ena angang a atufichiei ai upwe kúkkúna pwiich kewe lón Nigeria. Chómmóng chókkewe mi wareiti Bethel ra kan pekkus, kaka, echik, me ra pwal ekis pwúl. A mmen apwapwa ngeniei ai etiwaéchúúr me éúnúr konik me ekinamwer. Meinisin ekkena angang ra pin me ren Jiowa, me ina met a atoto ngeniei menemenéch me pwapwa.” Ewer meinisin angang aua eáni a álisikem le sópwéch.

Lón eú ám pari me aramasei kewe lón Trinidad lón ewe ier 1961, Pwiich Brown a apwóróusa ngenikem pwóróuseer mi amwarar lón Africa. Mwirin ua pwal apwóróusa mámmááritáán ewe angang lón Nigeria. Fán tong, pwiich Brown a wata péún wóón afarei me ereni semei we: “Johnny, kese mwo tottori Africa, nge Woodworth a fen!” Semei we a erá: “Sópweló chék Worth! Sópweló chék!” Ekkena esin apéchékkúl seni ekkena mwán mi péchékkúl lón pekin lúkú a alapaaló ai mochen apwénúetáfichi wisei lón ewe angangen afalafal.

Lón 1962, ua ketiw le alapaaló ai káit lón ewe ilik me fisuwen Sukulen Gilead, ewe sukul úkúkún ttaman 10 maram. Pwiich Wilfred Gooch, ewe  chónemmweni ewe keangen ofes lón Nigeria lón ena fansoun, me a fiti ewe Ilik me waluwen Sukulen Gilead me a kewis pwe epwe angang lón England. Iwe ua wisen túmúnú ewe keangen ofes lón Nigeria. Ua tapweló mwirin ewe leenien áppirú Pwiich Brown a isetiw, ua sáifetál, me ua alapaaló ai silei me tongei pwiich kewe mi áchengicheng lón Nigeria. Inaamwo ika ra osupwang seni chókkewe mi nóm lón ekkewe fénú mi wéúéch, nge ar pwapwa me menemenéch a affata pwe eú manaw mi aúchea ese lóngólóng wóón moni are pisek. Inaamwo a ina usun nónnómur, nge a mmen amwarar ai kúna ar fiti ekkewe mwich nge ra limeliméch, torotoréch, me ra elingaaló Jiowa. Atun ra feiló ngeni ekkewe mwichelap, chómmóng ra fiti ekkewe watteen tarakú sein uwou pisek me bolekajas * (wáán chón ena fénú bus nge ese wor etiippan). Lape ngeni wóón ekkena bus a kan wor makkan mi ámmeseik. Efóch bus a mak ei wóón: “Chómmóng chiin konik ra fératá mataw mi péchékkúl.”

A ifa me pwúngún ena mak! A mmen lamot án meinisin álillis ese lifilifil úkúkún, me aua pwal álillis. Iwe lón ewe 1974, Nigeria a wiliti ewe áeúin fénú me lúkún ewe United States mi tikeri 100,000 chón afalafal. Ewe angang a mmen sópwéch!

Atun a fis mámmááritáán ewe mwicheich, ewe maun lón Nigeria a lallapóló seni ewe ier 1967 ngeni 1970. Ren fitu maram, ese tour ngeni ewe keangen ofes pwóróusen pwiich kewe mi nóm lepekin ewe Chénúpupu Niger itan Biafran. A mmen lamot ám aupwe awora ngeniir mwéngé lón pekin lúkú. Usun met ua fen apasa me lepoputáán, fán iótek me lúkúlúk wóón Jiowa, aua pwer lón ena chénúpupu fán fite.

Ua mmen chechchemeni ekkena atun mi efeiengaw aua pwerelóng lón ena chénúpupu, aua tongeni ninniiló ren án ekkewe soufiu pekikem, ren semmwen, are pwal och mettóch mi efeiengaw. A fen weires aupwe pásini ekkewe soufiun state rese kon lúkúkem, nge a ifa me fen weiresin me eniwokkusun ám aupwe pásini ekkewe chón mmas wóón alen Biafran. Fán eú, lepwin aua pwerelong lón ewe Chénúpupu Niger mi pupu wóón efóch waafétún seni Asaba ngeni Onitsha pwe aupwe tongeni apéchékkúla ekkewe mwán mi ásimaw lón Enugu . Pwal eú, aua ló ngeni eú telinimw itan Aba pwe aupwe apéchékkúla ekkewe mwán mi ásimaw ikenan nge lón na fansoun ese mumutá néúnéún tengki lón imw lepwin pwe chón oputer resap kúner. Lón Port Harcourt , aua áserakáii ám mwich ren iótek pokiten ekkewe soufiun state ra tolong fán péchékkúl lón kinikinin Biafran lúkún ewe telinimw.

Ekkena mwich ra mmen aúchea pwe a alúkúlúkú pwiich kana mi áchengicheng usun án Jiowa tong me túmún me a pwal awora ngeniir ekkewe kapasen emmwen usun ar resap peni epek me ar repwe tipeeúfengen. Pwiich kewe lón Nigeria ra fen sópwéch lón ekkena esin weires. Ra pwári ewe esin tong mi okkufu koputfengen lefilen einang me ra chék akkamwéchú ar tipeeúin Chón Kraist. A ifa me aúchean ai fitiir lón ar na fansoun weires!

Milton G. Henschel, i ewe chón átettel lón ewe international mwichelap itelapan “Peace on Earth” lón ewe Yankee Stadium lón New York lón ewe ier 1969. Ua káé chómmóng seni ai álisi. A mmen fich ena mwichelap pokiten lón 1970 a fis ewe international mwichelap itelapan “Men of Goodwill” lón Lagos, Nigeria. A fis ena mwichelap mwirin ewe maun me a chék sópwéch ren án Jiowa álillis. A fis ena mwichelap lón 17 fósun fénúfan, me chóchóón chón fiti a tori 121,128. Pwiich Knorr me Henschel me chókkewe mi feito seni Merika me England pwe repwe fiti ena mwichelap, ra rent sepelin me ra kúna án 3,775 wiliti chón tapweló mwirin Jesus ren ar papatais ina eú me lein ekkewe mwichelap a kon chómmóng mi papatais seni ekkewe Chón Kraist lón ewe fansoun Pentikost. Ai awora álillis le akkóta ena mwichelap, a kon watte angangan. Feffeitáán chóchóón chón afalafal lón ena fansoun a mmen lallapóló!

Atun ám nónnóm lón Nigeria lap seni 30 ier, ua pwapwaiti ai eáni angangen mwán mi ásimaw mi wisen sáifetál me ua wisen sáifetál fán iten ewe keangen ofes lón West Africa. A ifa me kilisoun ekkewe misineri pokiten ar angei kapasen apéchékkúl me álillis! A ifa me pwapwaai le alúkúlúkú pwii kewe pwe Jiowa a áfánniir! Ena wis a áitiei úkúkún lamoten ach sipwe áfánni aramas pwe ina  met epwe álisiir le sópwéch me akkamwéchú ar tipeeúfengen lón án Jiowa mwicheich.

Jiowa chék a álisikem le likiitú fán ekkewe osukosuk aua kúna seni ewe maun me seni ám semmwen. Aua chék kúkkúna án Jiowa efeiéchúkem. Oris a erá:

“A úrikem me Worth malaria fán fite. Fán eú Worth a peló lón ewe pioing lón Lagos. Ra ereniei pwe neman epwe máló, nge kilisou pwe ese máló! Atun a nelósefál, a fós usun án Jiowa we Mwú ngeni ewe kangof mi túmúnú. Mwirin och fansoun ám me Worth aua lo chúri ena kangof itan Mr. Nwambiwe , pwe aupwe sópweló an káé Paipel. A tolong lón ewe enlet me a wiliti emén mwán mi ásimaw lón Aba. Ua pwal sópwéch le álisi chómmóng, pwal chókkewe mi péchékkúl lón ar lamalam, le wiliti chón angang ngeni Jiowa mi tuppwél. Aua unusen pwapwaiti ám sissileeló me tongei pwiich kewe lón Nigeria, eérenier, me ar fós.”

Iei pwal eú lesen ua káé: Ika sia mochen sópwéch lón wisach lón pwal eú fénú, a lamot ach sipwe káé le tongei pwiich kewe ese lifilifil úkúkún sókkólóón eérenier seni eéreniach.

Mwirin ám angang lón Bethel lón Nigeria, lón ewe 1987, ua angei eú wis minefé ám aupwe misineri lón ewe leeni mi ling itan St. Lucia lón Caribbean. Ina eú wis mi fókkun múrinné, nge a pwal wor áweiresin. Lón Africa, ekkewe mwán a kan wor ákkáfitemén pwúlúwer, nge ikeei lón St. Lucia, osukosukan pwe ekkewe mwán me fefin ra chék nómfengen nge ese rechister ar pwúpwúlú. Nge án Kot we Kapas mi manaman a amwékútú chómmóng chón káé Paipel ar repwe féri ekkewe siwil mi lamot repwe féri.

Atun aua feffeil ngeni ierin chinnap, ewe Mwichen Soupwúngúpwúng a amwékútúkem ngeni ewe ofesilap lón Brooklyn, New York, U.S.A., lón ewe 2005. Iteiten rán ua chúen kikkilisou ngeni Jiowa fán iten pwúlúwei we. A máló lón ewe 2015, me use tongeni áweweei ámmetekin an má seniei. I chiechiei mi fókkun múrinné me ua mmen tongei. Ua enletin tongei lón ánein ám pwúpwúlú ren 68 ier. Aua kúna pwe kiien pwapwa lón pwúpwúlú me lón ewe mwichefel, ina ach ésúfélú chókkewe sia nóm fán emmwenier, omusaaló tipis seni enletin letipach, tittipetekison, me ach ákkeáni uwaan ewe manaman mi fel.

Atun a ppiitá letipengaw me lichippúng, aua seppiti Jiowa ren an álillis pwe epwe álisikem le silei pwe minne aua fen fangóló fán itan ese lusmwáál. Atun aua sópweló le eérenaaló nónnómun manawem, aua kúna pwe a ékkéchúló met a kan fis me minne mi múrinné a kan sossounikem!​—Ais. 60:17; 2 Kor. 13:11.

Jiowa a efeiéchú ewe angang inei kewe me semei me ekkewe ekkóch ra féri lón Trinidad and Tobago, pwe lón ewe repot kukkuto chék a wor 9,892 ra fen fiti ewe fel mi enlet. Lón Aruba, a chómmóng ekkewe angang mi fen álisatá ewe mwichefel mi akkomw fis ua chóni. A wor 14 mwichefel mi feffeitá lón ena fénú. Nge lón Nigeria, a chóchchómmóngóló chóchóón ekkewe chón afalafal ra tori 381,398. Me a wor 783 iir mi álisatá án Jiowa we Mwú lón ewe fénú St. Lucia.

Iei a lap seni 90 ieri. Iei met Kölfel 92:14 a erá usun chókkewe mi fóffót lón imwen Jiowa we: “Ra chüen ua lon ar chinlap, ra uren pöchökül o wowoöch fansoun meinisin.” Ua fókkun kilisou ren ei manaw ua fen manaweni lón ai angang ngeni Jiowa. Álemwiriei kewe mi chómmóng lón pekin lúkú a apéchékkúlaei le unusen angang ngeni Jiowa. Lón án Jiowa tong mi enlet a fen mut ngeniei ai upwe “aümanauatä me lon än [ai] we Kot we imwenfel.”​—Kölf. 92:13.