Ewe aposel Paulus a erá pwe Jiowa, * i “ewe Kot mi echipakich lon mettoch meinisin. A akachipakich lon ach riaföü meinisin.” (2 Korint 1:3, 4) Ewe Paipel a alúkúlúkú ngenikich pwe Kot a tongeni álisi meinisin aramas ese lifilifil nónnómur. Ese pwal wor och mettóch epwe kon luló áweiresin pwe esap tufich ngeni Semach we lón láng an epwe oururukich.

Ika sia mochen án Kot epwe oururukich, a wor mettóch mi lamot sipwe féri. Pún ifa usun án emén tokter epwe tongeni álisikich ika sise ló pioing pwe sipwe chuuri? Iei met Paipel a pesei ngenikich: “Oupwe arap ngeni Kot, iwe, epwe arap ngenikemi.”​—James 4:8.

Ifa usun sipwe lúkúlúk pwe Kot epwe arap ngenikich? Áeúin, pún i a erenikich fán chómmóng pwe a mochen álisikich. (Ppii ewe  pwóór.) Oruuan, pún  sia fen pwisin kúna chómmóng aramas i a fen oururuur, ekkewe aramas mi manaw lón ei fansoun me pwal lón fansoun lóóm.

Ikenái, chómmóng aramas mi kútta álillis seni Kot ra usun chék King Tafit, ewe emén mi kúna watteen riáfféú. Lón eú atun a sié ngeni Jiowa, a erá: “Kopwe rongorong kapasen ai tüngor, lupwen üa siö ngonuk.” Kot mi pélúweni an na tingor? Ewer. Iei met a pwal erá: “I a alisiei. Iei mine üa fokun pwapwa.”​—Kölfel 28:2, 7.

Kot a mochen an epwe wor wisen Jesus lón ewe angangen awora ourur. Eú me lein ekkewe angang Kot a ewisa ngeni Jesus, ina an epwe oururu are “achipa chon luketatakis” me “meinisin mi letipeta.” (Aisea 61:1, 2) Usun met Paipel a fen oesini, Jesus a fókkun chúngú aramas “mi weiresikis o uwochou.”​—Mateus 11:28-30.

Jesus a oururu letipen aramas ren an ngeniir éúréúr mi múrinné, an kirekiréch ngeniir, me, lón ekkóch atun, pwal mwo nge an echikarer seni ar samau. Lón eú atun, emén mwán mi rupun pwétúr a tingormaú ngeni Jesus. A apasa: “Are ka mochen, ka tongeni alimöchüei.” Jesus a tongei, iwe a ereni: “Üa mochen, kopwe limöch.” (Markus 1:40, 41) Iwe, ena mwán mi rupun pwétúr a chikar.

Inaamwo ika Néún Kot we ese chúen nóm rech wóón fénúfan ren an epwe oururukich, nge Seman we, Jiowa, ewe “Kot mi echipakich lon mettoch meinisin,” a sópweló le álisi chókkewe mi osupwangen ourur. (2 Korint 1:3) Sipwe ppii rúáánú mettóch Kot a áeá pwe epwe oururu aramas.

• Ewe Paipel. “Meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.”​—Rom 15:4.

• Án Kot we Manaman mi Fel. Mwirin málóón Jesus, ewe mwichefelin Chón Kraist a osupwangen ourur. Paipel a pwáraatá pwe Kot a awora ngeniir ourur ren an we manaman mi fel. (Föför 9:31) Án Kot we manaman mi fel a fókkun watte manamanan. Kot a tongeni áeá le oururu meinisin aramas ese lifilifil nónnómur.

• Iótek. Paipel a erenikich ach sisap “lolilenäsini och mettoch.” A pwal erá: “Lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi.”​—Filipi 4:6, 7.

• Pwiich kewe Chón Kraist ra tongeni oururukich, iir chiechiach mi enlet sia tongeni lúkúlúk woor pwe repwe oururukich lón fansoun weires. Ewe aposel Paulus a erá pwe chiechian kewe iir chón ‘aururu letipan’ lón fansoun “weires me riaföü.”​—Kolose 4:11, Testament Mi Fö; 1 Tesalonika 3:7.

Nge neman kopwe ekieki ika ifa usun an a kan pwénútá ekkena mettóch. Sipwe etittina pwóróusen manawen ekkóch aramas mi kúna ekkewe esin weires sia fen pwóróus usun. Ka pwal tongeni chék usur le kúna pwe Kot epwe fókkun apwénúetá ei pwon mi achchúngú letipach: “Usun eman inelap a achipa nöün, iei usun ngang üpwe achipakemi.”​—Aisea 66:13.