Ika ese wor akkar, esap tufich an epwe wor manaw wóón fénúfan. Ewe akkar a atufichi an epwe wor chéén, péniráán, uwaan, féún, me pwikilin ekkewe irá. A pwal atufichi án ekkewe irá repwe tongeni angei konik seni ewe pwúl lón wareer kewe, ássátáái ngeni chéér kewe me atowu lón ásepwál usun chiin konik.

Rán, ina ewe liffang mi aúchea seni Kot mi atufichi án fénúfan epwe awora mwéngé fán itach. Kot a fang ngenikich rán seni láng pwal fansoun ráás fán iten anach mwéngé me an epwe oura lelukach ren pwapwa.

Chómmóng sam ra kan eáni aúrekin an esap naf enen me úfen chón ar famili. Ppii met ei wokisin a apasa: “Oupwe nenengeni ekewe mansüsü: Resap fofot, resap pwal kinikin, esap wor ar lenien iseis, nge Sememi lon läng a fen amongöniir. Ifa usun, ämi ousap kon aüchea seniir?”​—Mateus 6:25, 26.

“Oupwe nenengeni ekewe kiopun lemäl usun ra märitä . . . . Nge ngang üpwe ürenikemi, pwe fen mwo ewe king Salomon lon wöün meinisin esap üföüf üf mi ling usun lingen ekei pön kiop. Are iei usun än Kot aüfa ekewe fetilin lemäl . . . , esap fokun aüföüfakemi lap seniir?”​—Mateus 6:28-30.

Kot a tongeni awora ngenikich anach me úfach, iwe a pwal tongeni álisikich ren met kan sia osupwangan. Ika sia achocho le féri minne a tipeni, a tongeni efeiéchú ach achocho le ffot mwéngé, are álisikich le kúnékún ach angang pwe sipwe tongeni mééni met sia osupwangan.​—Mateus 6:32, 33.

Lupwen sia ekieki usun ewe akkar, rán, ekkewe machchang, me pénirá, mi enlet pwe mi wor popun sipwe tongei Kot. Ewe lesen mwirin ei epwe áiti ngenikich ifa usun ewe Chón Fératá a fós ngeni aramas.