Ifa Usun Sipwe Pwári Tong Ngeni Aramas
Kich meinisin eú chék famili pokiten kich mwirimwirin ewe áeménún mwán, Atam. Úrúrún chóchóón eú famili repwe tongfengen me súfélfengen, nge lón ekkeei rán a weires an epwe wor ena esin tong lón ekkewe famili. Nge esap ina met ach we Kot mi tong a mochen.
MET EWE PAIPEL A APASA USUN TONG
“Kopwe echeni chon arum usun püsin om echenuk.”—LIFITIKOS 19:18.
“Oupwe echeni chon oputakemi.”—MATEUS 5:44.
MET WEWEEN ACH SIPWE TONGEI ARAMAS
Ppii ifa usun Kot a áweweei tong lón an we Kapas lón 1 Korint 13:4-7:
“Chen a mosonotam o kirikiröch.”
Ekieki: Met meefiom lupwen ekkóch ra mosonottam me kirekiréch ngonuk, me rese kan song ngonuk atun ka mwáálliló?
“Chen esap lolowo.”
Ekieki: Met meefiom lupwen ekkóch ra kon lúkúlúkúmmang ngonuk are lólówóituk?
Chen “esap kütta püsin an.”
Ekieki: Met meefiom lupwen ekkóch ra súféliti meefiom me rese achéchééi chék pwisin meefier?
Chen “esap ekieki o chechemeni mine eman a mwäl ngeni won.”
Ekieki: Kot a tipemecheres le omusaaló tipisin chókkewe mi tipis ngeni nge ra aier. “Esap apwüngü aramas fansoun meinisin, esap pwal amwöchü an song.” (Kölfel 103:9) Sia kan kilisou lupwen emén si asonga a omusaaló tipisich. Ina minne sipwe pwal omusaaló tipisin ekkewe ekkóch lupwen ra eletipengawakich.—Kölfel 86:5.
“Chen esap pwapwaäsini mine a ngau.”
Ekieki: Lupwen a fis ngenikich mettóch mi ngaw, sise kan sani án ekkóch repwe eáni pwapwaan ach sia riáfféú. Iwe sisap eáni pwapwaan án ekkóch tolong lón osukosuk, inaamwo ika ra kirikiringaw ngenikich.
Ren ach sipwe feiéch seni Kot, a lamot sipwe tongei aramas lón ekkeei napanap, ese lifilifil ika iir ié. Sia tongeni féri ena ren ach álisi chókkewe mi osupwangen álillis.
