Kapas Eis Seni Chon Allea

Epwe ifa ekiekin Chon Kraist ussun nounoun ekkewe fau auchea fan iten an emon maramen uputiu (birthstone)?

Chon ekkoch fonu ra ririfengenni ekkoch fau auchea me maramen ar uputiu. Epwe pwisin filian ika emon Chon Kraist epwe etikalong won autun poun efoch ring mi pacheta efou fau auchea won. (Kalesia 6:5) Iwe, ren ach sipwe filata, mei wor ekkoch mettoch sipwe mochen ekieki ussun.

Encyclopaedia Britannica a apasa pwe efou birthstone, ina “efou fau auchea mi riri ngeni maramen an emon uputiu, iwe, a choufetal ewe luku pwe epwe atoto feioch are pochokkulen inis ngeni emonewe a nounou.” Ena puk a pwal apasa: “Ren langattam fansoun ekkewe soufu ra era pwe ekkoch fau auchea ra eani och manaman.”

Akkaewin lon ekkewe fansoun lom lom, chommong ra luku pwe efou birthstone a atoto feioch ngeni emonewe a nounou. Epwe ina ussun lukuen emon Chon Kraist? Aap, pun a silei pwe Jiowa a apwungu ekkewe mi rikilo seni i me eani lukuluk won “ewe kot a iteni ‘feioch’ [god of good luck].” ​—Aisea 65:11.

Lon ewe fansoun itan Middle Ages, ekkewe sou oesini ra filata eu sokkun fau auchea fan iten eu me eu maram lon eu ier. Ra pesei aramas ar repwe nounou ewe birthstone fan iten maramen ar uputiu, ussun ita nge epwe tumunur seni feiengau. Nge esap pwung me ren Paipel an emon Chon Kraist tipeeu ngeni emmwenien ekkewe sou oesini, pun ewe Paipel a apwungur.​—Tuteronomi 18:9-12.

Esap pwal pwung ren emon Chon Kraist an epwe meefi pwe a sokkolo aucheaan efoch ring pokiten chok a pacheta efou birthstone won. Noun Jiowa kewe Chon Pwarata rese pwapwaesini ekkewe ranin uputiu. A ina ussun pun ekkena ranin apwapwa ra chok atekiata ewe emon, me pwal ekkewe chok poraus ussun ranin uputiu mi mak lon ewe Paipel, ir ranin uputiuen ekkoch sou nemenem, esap ir chon angang ngeni Kot.​—Keneses 40:20; Mattu 14:6-10.

Ekkoch aramas ra ekieki pwe ar etikalong efoch ring won autun pour mi pacheta efou birthstone won epwe nemeni lapalaper kewe. Iwe nge, Chon Kraist mi enlet rese luku ena poraus, pun ra silei pwe ar pwilitalong “ewe lapalap mi fo” a fis pokiten angangen an Kot we ngun mi fel me ar akkapwonueta ekkewe popun alongolongun alluk seni Paipel.​—Efisus 4:22-24.

A fokkun lamot minne a amwokutukich. Ren an epwe filata ika epwe walong won autun poun efoch ring fiti efou birthstone, eni emon Chon Kraist epwe pwisin eisini i: ‘Ua mochen etikalong ei ring pun ua chok efich ewe fau auchea, inaamwo ika a iteni efou birthstone? Are an ekkoch aramas ekiek-mwaal ussun ekkena fau auchea a fen etipetipaei?’

Emon Chon Kraist epwe atittina letipan fan iten an epwe silei wesewesen ekiekin. Ewe Paipel a apasa: “Kopwe fokun tumwunu lelukom lap seni om tumwunu och pisek auchea, pun manau a pop seni lon lelukom.” (An Salomon Fos 4:23) Lon an filita ussun nounoun ekkewe birthstone, epwe murinno ngeni emon me emon Chon Kraist an epwe ekieki ussun minne a amwokutu i me ifa ussun an kewe foffor epwe tongeni kku pwisin manauan me ekkewe ekkoch.​—Rom 14:13.