“Samol, Kopwe Ait Ngenikem Iotek”

“Emon me lein noun kewe chon kaeo a apasa ngeni, ‘Samol, kopwe ait ngenikem iotek.’”​—LUK. 11:1.

1. Met popun emon lein noun Jises kewe chon kaeo a tingor pwe Jises epwe ait ngeni ifa ussun epwe iotek?

 LON 32 C.E., emon noun chon kaeo a kuna Jises lupwen a iotek. Ese tongeni rongorong met Jises a ereni Seman, eli pun Jises a iotek le monomon. Nge lupwen Jises a wes, ewe chon kaeo a ereni i: “Samol, kopwe ait ngenikem iotek.” (Luk 11:1) Met a amwokutu i le tingor ena mettoch? Iotek eu kinikinin manauen chon Jus, kinikinin ar fel. Ewe Tesin Ipru a masou ren chommong iotek lon ewe puken Kol Fel me lon ekkewe ekkoch puk. Ina popun ewe chon kaeo ese tingor pwe Jises epwe aiti ngeni och mettoch ese silei ussun are och mettoch esaamwo fori. Ese mwaal a silei ussun ewe sokkun iotek ekkewe nouwisin lamalamen Jus ra eani. Nge iei a kuna Jises lupwen a iotek, me a miritiiti sokkofesennin ekkewe iotek mi lamalam tekia an ekkewe nouwis me an Jises iotek.​—Mattu 6:5-8.

2. (a) Met a pwarata pwe Jises ese mochen pwe sipwe apiapini an we iotek? (b) Met popun sia mochen silei ifa ussun sipwe iotek?

² Orun 18 maram me mwan, lon an we Afalafal won ewe Chuuk, Jises a awora ewe iotek pwe noun kewe chon kaeo repwe appiru. (Mattu 6:9-13) Eli ei chon kaeo mi tingorei Jises ese nonnom lon ena fansoun, ina popun Jises a enniwili fan tong ekkewe mettoch mi lamot lon ena iotekin appiru. A ffatolo pwe Jises ese apasasefalli eu me eu kapas lon an we iotek, me an ese fori ena a affata pwe ewe iotek esap chok eu kottun lamalam aramas repwe apiapini. (Luk 11:1-4) Ussun chok ena chon kaeo ese ffat itan, sia pwal mochen silei ifa ussun sipwe iotek pwe ach kewe iotek repwe alisikich ach sipwe arap ngeni Jiowa. Iwe, sipwe atittina ewe iotek sipwe appiru lon makkeien ewe aposel Mattu pokiten a ekis unus. Mei wor fisu tingor, ulungat ussun an Kot kewe kokkot me ruaanu ussun osupwangach lon pekin aion me lon pekin ngun. Lon ei lesen, sipwe kaeo ussun ekkewe ulungat tingor akkom.

Emon Sam Mi Tong

3, 4. Met weween ach eita ngeni Jiowa “Semach”?

³ Seni le poputaan, Jises a aitikich pwe ach kewe iotek repwe pwarata ach chiechioch me fiti sufol me Jiowa. Jises a akkaewin kapas ngeni noun kewe chon kaeo mi kito ren lon ena leeni mi kan ngeni ewe chuuk. A ereniir pwe lupwen ra iotek ngeni Jiowa repwe apasa: “Semach mi nonnom lang.” (Mattu 6:9) Me ren emon sou kaeo, ese lifilifil ika Jises a kapas lon fosun Ipru are Aramaic, nge ewe kapas a nounou fan iten “Sam” a ussun chok eu kapas emon semirit epwe nounou, ‘eu kapasen semirit.’ Ach apasa “Semach” ngeni Jiowa a wewe ngeni pwe sia lukuluk won me chiechioch ngeni.

 ⁴ Ren ach apasa ‘Semach,’ sia pwal pwarata pwe kich kinikinin ewe familien mwan me fefin mi watte mi miritiiti pwe Jiowa ewe Chon Awora Manau. (Aisea 64:8; Fofor 17:24, 28) Ekkewe chon Kraist mi upsefal ren ewe ngun ra wiliiti “noun Kot,” me repwe tongeni “apasa ‘Appa, Samach.’” (Rom 8:14, 15) Fite milion ra fen wiliiti chiener kewe mi tuppwol. Chokkei ra fen fangolo manauer ngeni Jiowa me ra papataiselo. Ekkeei “ekkoch siip” meinisin ra tongeni arap ngeni Jiowa lon iten Jises me ra tongeni kor ngeni “Samach.” (Jon 10:16; 14:6) Sipwe tongeni ikkiotek ngeni Semach ren ach sipwe mwareiti i, me kilisou ngeni pokiten an fofforoch meinisin ngenikich, me ren ach sipwe iseta ren osach kewe, ren ach lukuluk pwe a tongeikich.​—Filipai 4:6, 7; 1 Piter 5:6, 7.

Tong Fan Iten Itan Jiowa

5. Ifa ewe aewin tingor lon ewe iotekin appiru, me met popun ei tingor mi fich?

⁵ Ewe aewin tingor a muttir aiti ngenikich ewe mettoch mi lamot seni meinisin. A apasa: “Itom epwe fel.” (Mattu 6:9) Ewer, a lamot ach sipwe ekilapei pwe iten Jiowa epwe pinilo pokiten sia tongei i me pokiten sia oputa ekkewe esiit meinisin mi chukuchukuta a aitengaua itan we. An Setan u ngeni me an etipetipa aewin pean pupulu ar repwe alleasolapa Jiowa Kot a pweni itan we ren kefisitan tipemwaramwar ussun lapalapen an nemenem. (Keneses 3:1-6) Pwal och, seni ena fansoun u ngeni, iten Jiowa a fen itengau ren ekkewe foffor mi asau me aitien chokkewe mi apasa pwe ra tupuni i.

6. Met sisap fori ika sia iotek pwe iten Jiowa epwe pinilo?

⁶ Ach iotek ussun piniloon iten Jiowa a pwarata io sia peni lon ewe popun alongolongun kapwung ussun nemenem​—Jiowa me an pwungun nemeni lang me fonufan. Jiowa a mochen pwe lang me fonufan repwe masou ren chokkewe mi tipatchem mi tipemecheres me pwapwa le anomuur fan an nemenem mi pwung pokiten ra tongei i me tongei mettoch meinisin mi weneiti itan we. (1 Kronika 29:10-13; Kol Fel 8:1; 148:13) Ach tongei iten Jiowa epwe pineikich seni ach fori och mettoch epwe aingaua ena it mi pin. (Isikiel 36:20, 21; Rom 2:21-24) Pokiten kinamween lang me fonufan me chokkewe mi nonnom lon a alongolong won piniloon iten Jiowa me ar anomuur fan an nemenem pokiten ra tongei i, ach tingor “itom epwe fel” a pwarata ach lukuluk pwe an Jiowa kokkot epwe pwonueta ngeni lingan.​—Isikiel 38:23.

Ewe Muu Sia Iotek Ussun

7, 8. (a) Ifa ewe Muu Jises a era pwe sipwe iotek ussun? (b) Met sia kaeo ussun ei Muu lon ekkewe puken Taniel me Pwarata?

⁷ Iei ewe oruuen tingor lon ewe iotekin appiru:  “Muom epwe feito.” (Mattu 6:10) Ei tingor a ririoch ngeni ewe aewin tingor. Jiowa epwe epinalo itan we mi fel ren ewe Muun Messaia, fan nemenien Noun we, Jises Kraist. (Kol Fel 2:1-9) An Taniel oesini a awewei won ewe Muun Messaia ussun chok “efou fau” a turuwu seni eu “chuuk.” (Taniel 2:34, 35, 44, 45) Ewe chuuk a wewe ngeni an Jiowa pwungun nemenem. Ina popun ewe fau are Muu a wewe ngeni eu minefoon kinikinin an Jiowa nemenem won unusen lang me fonufan. Lon ewe oesini, ewe fau, ‘a wiliti eu chukutekia o a amasoua unusen fanufan.’ A pwarata pwe ewe Muun Messaia epwe tupuni an Kot nemenem mi tekia seni meinisin won unusen fonufan.

⁸ Mei wor pwal 144,000 repwe fiti Kraist lon Muun we ir mi “kamoto seni fonufan” pwe repwe fiti i le nemenem ussun chok king me samol fel. (Pwarata 5:9, 10; 14:1-4; 20:6) Taniel a eita ngeniir “chon pin kana noun Ewe mi Fokkun Tekia,” fiti Kraist, Mokurer, chokkewe mi angei “nemenem me ling . . . Iwe, mwur epwe nonom tori feilfeilochok, nge sou nemenem meinisin repwe angang ngeniir o aleasochisiir.” (Taniel 7:13, 14, 18, 27) Ena awewe a fichiiti ewe muun lang Kraist a ait ngeni noun kewe chon kaeo repwe chechchemeni lon iotek.

Met Popun Sipwe Chuen Iotek Pwe Ewe Muu Epwe Feito?

9. Met popun mi fich ach sipwe iotek pwe Muun Kot epwe feito?

⁹ Lon an we iotekin appiru, Kraist a ait ngenikich pwe sipwe iotek fan iten warotoon ewe Muun Kot. Pwonuetaan ekkewe oesini lon Paipel a pwarata pwe ewe Muun Messaia a poputa le nemenem lon lang lon 1914. * Ina popun, epwe chuen och ach sipwe iotek pwe ewe Muu epwe “feito”? Ewer. Lon an Taniel oesini, ewe Muun Messaia, mi liosutiu ren efou fau, a feffeil ngeni an epwe sapefengen me ekkewe muun aramas, mi liosuetiu ren eu uluulun mi watte. Ewe fau epwe chuen ataielo ena uluulun. Epwe amoku me appwulufeseni. An Taniel we oesini a apasa: “Esap pwal wor eu mwu epwe tongeni akufu. Iwe, ei mwu epwe ataela o arosalo ekewe lusun mwu, nge epwe pusin nom tori feilfeilachok.”​—Taniel 2:44.

10. Met popun sia tipeni warotoon Muun Kot?

¹⁰ Sia tipeni an Muun Kot feito me ataielo an Setan otot mi ngau pokiten epwe wewe ngeni piniloon iten Jiowa mi fel me moreloon chon u ngeni an Kot nemenem meinisin. Sia iotek: “Muom epwe feito,” me sia fiti ewe aposel Jon le apasa: “Amen. Kopwe feito, Samol Jises!” (Pwarata 22:20) Ewer, amwo Jises epwe feito me epinalo iten Jiowa me aitochulo pwungun an nemenem, pwe kapasen ewe soumak kol mi fel epwe pwonueta: “Kopwe esinei ngeni ir pwe en, mi iteni ewe SAMOL, [Jiowa, NW] en chok Ewe mi  Fakkun Tekia won fonufan meinisin.”​—Kol Fel 83:18.

“Letipom Epwe Pwonueta”

11, 12. (a) Met sia tingor lupwen sia iotek pwe letipen Kot epwe “pwonueta, won fonufan usun chok lon lang”? (b) Mei pwal wor och weween ach tingor pwe letipen Jiowa epwe pwonueta?

¹¹ Mwirin Jises a aiti ngeni noun kewe chon kaeo ar repwe iotek: “Letipom epwe pwonueta, won fonufan usun chok lon lang.” (Mattu 6:10) Lang me fonufan a fisita pokiten letipen Jiowa. Ekkewe chonlang mi manaman lon lang ra koluwu: “Mi fich ngonuk, ach Samol o ach Kot, pwe kopwe angei ling o iteuoch o manaman, pun ka fen forata mettoch meinisin, o mettoch meinisin a fis o a nom ren letipom.” (Pwarata 4:11) Mei wor an Jiowa kokkot fan iten “mettochun lang pwal mettochun fonufan.” (Efisus 1:8-10) Lupwen sia iotek pwe letipen Kot epwe pwonueta, sia wesewesen tingor pwe Jiowa epwe apwonueta an we kokkot. Pwal och, sia pwarata pwe sia tipeni ach sipwe kuna pwonuetaan letipen Kot won unusen lang me fonufan.

¹² Ren ei iotek sia pwal pwarata ach tipemecheres le atipeeufengenni manauach ngeni letipen Jiowa. Jises a apasa: “Iei anei, pwe upwe fori letipen ewe emon mi tinieito, o upwe pwal efisata an angang.” (Jon 4:34) Ussun chok Jises, pokiten kich chon Kraist mi fen fangolo manauach ngeni Kot, sia pwapwaesini ach fori letipen Kot. Ach tong fan iten Jiowa me Noun we a amwokutukich ach sisap “chuen manau ren mochenian aramas, pwe ren letipen Kot.” (1 Piter 4:1, 2; 2 Korint 5:14, 15) Sia achocho ngeni ach sisap fori ekkewe mettoch sia silei mi u ngeni letipen Kot. (1 Tesalonika 4:3-5) Ren ach akkotaochu ach fansoun fan iten alleaan Paipel me kaeo, sia “wewe ren meeta letipen ewe Samol,” mi kapachelong ach fiffiti ewe angangen afalafala “ewe kapas allim usun ewe mu.”​—Efisus 5:15-17; Mattu 24:14.

Letipen Jiowa Lon Lang

13. Ifa ussun letipen Kot a fen pwoppwonueta fansoun langattam mwen an Setan u ngeni?

¹³ Letipen Jiowa a fen pwoppwonueta lon lang ren fansoun langattam mwen emon noun kewe chonlang a u ngeni me a wiliiti Setan. Ewe puken An Salomon Fos a awewei won Noun Kot we mwanichi ussun chok liosun tipatchem. A pwarata pwe ren langattam fansoun, Noun Kot we alaemon a “meseik me fan mesan fansoun meinisin,” pwapwa le fori letipen Seman. Feil, feil, a wiliiti noun Jiowa “sousile angang” lupwen a forata mettoch meinisin “mettochun lang, pwal mettochun fonufan; ekkewe mettoch sia tongeni kuna, pwal ekkewe mettoch sise tongeni kuna.” (An Salomon Fos 8:22-31; Kolose 1:15-17) Jiowa a nouni Jises ussun noun we ewe Kapas, are Soufos.​—Jon 1:1-3.

14. Met sipwe tongeni kaeo seni Kol Fel 103 ussun an ekkewe chonlang apwonueta letipen Jiowa lon lang?

¹⁴ Ewe soumak kol mi fel a pwarata pwe an Jiowa nemenem a tekia seni meinisin me ekkewe chonlang ra auselinga an kewe kapasen emmwen me alluk. Sia alleaani: “Ewe SAMOL a fen anukatiu an we leenien motun king won ekkewe lang, o an we mu a nemeni mettoch meinisin. Oupwe mwareiti ewe SAMOL, ami noun chonlang kena, ami mi manaman mi chok fori an we kapas, mi rongorong ngingin an we kapas! Ami noun kena mwich meinisin, oupwe mwareiti ewe SAMOL, ami noun kena chon angang mi fori letipan! An ewe SAMOL kewe angang meinisin repwe mwareiti i, lon ekis meinisin ikewe a nemeni ie [pwungun an nemenem].”​—Kol Fel 103:19-22.

15. Ifa ussun poputaan an Jises nemenem a kku pwonuetaan letipen Kot lon lang?

¹⁵ Mwirin an Setan u ngeni Kot, a chuen tongeni feita lang, ussun a mak lon ewe puken Hiop. (Hiop 1:6-12; 2:1-7) Iwe nge, ewe puken Pwarata a oesini pwe ewe fansoun epwe feito lupwen Setan me noun kewe timon repwe katowu seni lang. Ena mettoch a fisita  ekiselo chok mwirin Jises a poputa an nemenem lon 1914. Seni ena fansoun, ese chuen wor leenien ekkena chon u ngeni lon lang. Ra chok nom orun fonufan. (Pwarata 12:7-12) Sisap chuen rongorong leuwen chon u ngeni an Jiowa nemenem lon lang nge leuwen chok chokkewe mi apunga “ewe Lam,” Kraist Jises, me mwareiti Jiowa. (Pwarata 4:9-11) Letipen Jiowa a wesewesen pwonueta lon lang.

Letipen Jiowa Fan Iten Ewe Fonufan

16. Ifa ussun ewe iotekin appiru a u ngeni aitien Kirisentom ussun an aramas apilukuluk?

¹⁶ Me ren ekkewe lamalamen Kirisentom fonufan ese chuen kapachelong lon an Kot kokkot. Ra apasa pwe aramas murinno meinisin repwe feita lang. Nge Jises a aiti ngenikich pwe sipwe iotek: “Muom epwe feito, letipom epwe pwonueta, won fonufan usun chok lon lang.” (Mattu 6:10) Sipwe tongeni apasa pwe letipen Kot a fiffis iei lon ei fonufan mi osukosuk ren mwanesol, pwungungau, semmwen, me malo? Aapwi! Ina popun a lamot ach sipwe iotek pwe letipen Kot epwe pwonueta won fonufan, me ren ewe pwon ewe aposel Piter a fen makkei: “Sia witiwiti lang sefo [ewe Muun Messaia ren Kraist] o pwal fonufan sefo [eu mwichen aramas mi pwung], ikewe pung epwe nonnom ie.”​—2 Piter 3:13.

17. Ifa an Jiowa we kokkot fan iten fonufan?

¹⁷ Mei wor an Jiowa kokkot lupwen a forata ewe fonufan. A amwokutu ewe soufos Aisea le makkei: “Iwe, ewe Samol mi Lapalap a fori lang, i ewe Kot a pwal fori fanufan o anukuchara. Esap fori pwe epwe kotongau, nge a fori pwe lenien aramas. Iwe a apasa, ‘Ngang ewe Samol mi Lapalap, esap wor eman Kot luki.’” (Aisea 45:18) Kot a anomu ewe aewin pean aramas lon eu malamalen paratis me a alluku ngeniir: “Oupwe nounou o achomongakemi pwe fanufan epwe masou remi o nom fan nemeniemi.” (Keneses 1:27, 28; 2:15) A ffat pwe ewe Chon Forata a akkota pwe ewe fonufan epwe masou ren aramas mi unusoch me pwung me aramas repwe pwapwa le anomuur fan an Jiowa nemenem me repwe manau tori feilfeilo lon ewe Paratis Kraist a fen pwonetiu.​—Kol Fel 37:11, 29; Luk 23:43.

18, 19. (a) Met epwe akkom fisita mwen letipen Kot epwe unusen pwonueta won fonufan? (b) Pwal met sokkun mettoch ussun an Jises iotekin appiru sipwe kaeo lon ewe lesen mwirin ei?

¹⁸ Letipen Jiowa fan iten ewe fonufan ese tongeni unusen pwonueta ika ewe fonufan a masou ren mwan me fefin mi u ngeni an nemenem. Kot epwe nounou ekkewe chonlang mi pochokkul fan emmewenien Kraist pwe epwe “atai ekkewe chon atailo fonufan.” Unusen an Setan otot mi ngau, kapachelong ekkewe lamalam chofona, ekkewe muu mi ppwor, sopai mi tipemmong me ese wenechar, me ewe mwichen sounfiu mi efisaata kata, repwe morolo feilfeilo chok. (Pwarata 11:18; 18:21; 19:1, 2, 11-18) An Jiowa pwungun nemenem epwe itochulo me itan we epwe pinilo. Ekkeei mettoch meinisin sia tingor lon iotek lupwen sia apasa: “Semem mi nonnom lang, itom epwe fel, muom epwe feito, letipom epwe pwonueta, won fonufan usun chok lon lang.”​—Mattu 6:9, 10.

¹⁹ Iwe nge, lon an Jises iotek sipwe appiru, a pwarata pwe sipwe tongeni pwal iotek ussun ekkewe mettoch mi weneiti pwisin kich. Sipwe kaeo ussun ei mettoch lon an kewe alluk ussun iotek lon ewe lesen mwirin ei.

[Pwóróus fan]

Sipwe Enniwili

• Met popun mi fich ngenikich ach sipwe eita ngeni Jiowa “Semach”?

• Met popun a lamot ach sipwe akkom iotek pwe epwe pinilo iten Jiowa we?

• Met popun sia iotek pwe Muun Kot epwe feito?

• Met weween ach iotek pwe letipen Kot epwe fis won fonufan ussun chok a fis lon lang?

[Ekkewe Kapas Eis fan Iten ewe Lesen]

[Sasing lon pekin taropwe 19]

An Jises kewe iotek a fokkun sokko seni an ekkewe Farisi kewe iotek mi tipin tipetekison

[Sasing lon pekin taropwe 20]

Ekkewe chon Kraist ra iotek fan iten warotoon Muun Kot, piniloon itan we, me fan iten pwonuetaan letipan