En Mi “Pisekisek Ren Kot”?

EU ME lein ekkewe chommong kapas awewe Jises Kraist a eani a poraus ussun emon mwan mi pisekisek. Pokiten ewe mwan a mochen pwe manauan epwe nukunukochulo, a akkota pwe epwe alapalo an kewe leenien iseis. Nge, lon an Jises kapas awewe, ewe mwan a iteni emon “mi puch.” (Luk 12:16-21) Chommong Paipel ra pwal mwo nge nounou ewe kapas “mi umwes.” Met popun ra nounou ekkeei kapas mi pochokkul?

Iwe, ei mwan pisekisek ese ekieki ussun Kot lupwen a fori an kokkot, me ese pwal alingalo Kot ren uwaochun ewe fonu. (Mattu 5:45) Nge, a chok sikasini pwisin an angang ren an apasa: “Iwe, upwe apasa ngeni nguni, ‘Nguni, a fen wor chommong pisek ngeni chommong ier mi fen iseis ngonuk. Iwe, kopwe kinamwelo, kopwe mongo, o un, o pwapwa.’” Ewer. A ekieki pwe uwan an achocho epwe “usun chok eu tit mi tekia o pochokul a epeti eu telinimw seni feiengau.”​—An Salomon Fos 18:11.

Ewe chon kaeo Jemes a mak ussun ngauen ena esin lamalam tekia. A apasa: “Iwe, ami mi apasa, ‘Ikenai are leesor sipwe feilo ngeni eu telinim, o sipwe nonnom ikewe eu ier; sipwe amomoto o amomolo, o sipwe pisekisekilo.’ Nge ouse mo sinei usun leesor. Pwe meeta chok manauemi? Pun ami oua usun chok atun konik mi pwapwalo ekis chok fansoun, nge mwirin, a morelo.”​—Jemes 4:13, 14.

Ekkena kapas ra pwonueta. Iei sopwosopwolon an Jises kapas awewe: “En mi puch! Lepwinei chok upwe angei ngunum. Iwe, ifa usun ekkeei mettoch ka fen ammolata, io epwe nouni?” Ussun chok konik mi pwapwalo ren ekis chok fansoun, ewe mwan pisekisek epwe malo mwen a kuna pwonuetaan letipan. Sia miritiiti ewe lesen? Jises a apasa: “Iwe, epwe iei usun ekkewe aramas mi iseis pisek fan asengesin pwisin ir, nge resap pisekisek ren Kot.” En mi “pisekisek ren Kot”?