‘Letipen Kot pwe kopwe pisekisek, wääni chommong waa me win lon om business. Kopwe chök lükü i, fang ngeni nöüm moni meinisin ükükün om tongeni.’

ME REN eü simpung mi fför lon Brazil a erä pwe ekkoch mwichen lamalam ra apöchökküla ena lükü. Chommong ra fokkun lükü ei pworaus. Iei met eü puk a repotei usun ekkewe chon Merika mi erä pwe iir chon Kraist: “Wone me eü percent ra lükü pwe Kot a mochen aramas repwe pisekisek. Me ilik me eü percent . . . ra tipeeü ngeni pwe ika ka fang ngeni Kot noum moni, iwe epwe efeiöchuk me achommongaalo noum moni.”

Ekkeei sokkun lükü ra chöüfetäl äkkäeüin lon Brazil me ekkewe fönü ünükün. Aramas ra mwicheto ren ewe imwen fel pokiten ekkewe nöüwis ra afalafaler pwe Kot epwe episekisekiir. Nge Kot a wesewesen pwonei pwe epwe awöüöchü ekkewe ra angang ngeni? Meinisin nöün Kot kewe chon angang me loom iir mi pisekisek?

A enlet pwe me ren ewe Tesin Ipru sia älleani pwe chokkewe Kot a efeiöchüür ra pwal pisekisekilo. Ren chök äwewe, iei met a mak lon Tuteronomi 8:18: “Nge oupwe chechemeni ewe Samol mi Lapalap ämi we Kot, pun i a ngenikemi pöchökül pwe oupwe pisekisek.” Iei met a alükülükü chon Israel pwe ika ra älleasochisi Kot, epwe awöüöchür.

Nge ifa usun ren emön me emön nöün Kot chon angang? Ewe mwän mi tuppwöl Hiop a fokkun pisekisek nge mwirin än Setan awöüngawalo i, Jiowa a eliwinisefäli wöün “fän ruu.” (Hiop 1:3; 42:10) Apraham pwal i emön mi pisekisek. Keneses 13:2 a apasa pwe a “fokun chomong folenian man pwal an silifer me an kolt.” Lupwen ekkewe fömön king me nöür kewe sounfiu ra maunei ewe fönü me liapeni nöün pwin Apraham we itan Lot, Apraham “a körifengeni ülüpükü engol me walüman nöün chon angang mi uputiu lon imwan.” (Keneses 14:14) Iwe ei pworaus usun ekkewe ülüpükü engol me walimön mwän mi “sipeöch le maun,” a pwäratä pwe chon le imwen Apraham ra fokkun chommong. Ren än Apraham atufichi eü famili mi watte a ännetatä pwe i emön mwän mi fokkun wöüöch, ren chommongun nöün pwiin man.

Pwüngün pwe chommong lein nöün Kot kewe chon angang mi tuppwöl loom usun choweän Apraham, Isaak, Jakop, Tafit, Salomon, me pwal ekkewe ekkoch, iir ra pisekisek. Nge weween pwe Kot epwe awöüöchü meinisin mi angang ngeni? Iwe nge, ika emön nöün Kot chon angang a wöüngaw, weween pwe Kot ese efeiöchü? Ewe lesen mwirin ei epwe äweweei ekkeei kapas eis.