Oesini 4. Nafangawen Tong lon Famili

“Aramas . . . resap eäni tong.”​—2 TIMOTI 3:1-3.

● Kris, i chon eü kümien chon älisi ekkewe ra küna osukosuk seni pwisin chon ar famili lon Britain. Nge iei alon, “Ua chechchemeni emön fefin a fokkun feiengaw use mwo nge chüen esilla seni ewe säingoon fansoun ai küna. A kon ssenük riäfföün letipen ekkoch fefin rese mwo nge tongeni nengeniei.”

MET EKKEEI PWORAUS RA PWÄRATÄ? Lon eü fönüen Afrika, usun emön me lein ülümön fefin a wor a kirikiringaw ngeni lekükkünün. Eü repot lon pwal ena fönü a erä pwe lap seni eü na aülüngätin ekkewe mwän ra meefi pwe ese ngaw ar repwe awata pwülüwer. Nge, sap minne fefin chök ra kükküna kawet seni ar famili. Äwewe chök lon Canada arapakkan ülümön me lein engol mwän ra kükküna kawet me feiengaw seni pwülüwer.

ALON EKKEWE RESE LÜKÜ. Mi chök fiffis föfförün mwänesol lon famili seni loom. Nge pokiten aramas ra kerän chök äteneki, iwe usun itä a lapolo.

MEI PWÜNG ALOR? A lapolo än aramas äteneki föfförün akkachofesä lon famili lon ekkewe ier kkanoto. Nge itä a fen akükkünalo föfförün akkachofesä lon famili? Aapwi ese fen ina usun. Nafangawen tong lon famili a fen kon chöülo iei.

MET MEEFIOM? A pwöppwönütä alon 2 Timoti 3:1-3? Mi chommong rese chüen pwäratä ewe tongen lon famili?

Ewe enimuen oesini a fen pwönütä iei mi weneiti ach ei fönüfan. Nengeni met ewe Paipel a apasa usun ei napanap.

[Ekis Pwóróus lón pekin taropwe 7]

“Ewe föfförün mwänesol lon famili, eü me lein ekkewe föfförmwääl aramas rese kan repotei. Lap ngeni, mwirin fän 35 ükükün än emön fefin kawetengaw ren pwülüwan epwap kerän chuuri polis.”​—ALON EMÖN CHON TUPUNI EWE OFESIN CHON ÄLISI OSUKOSUKEN FAMILI LON WALES.