“Achipa Meinisin mi Letipeta”

“[Jiowa] a awisaei pwe . . . üpwe achipa meinisin mi letipeta.”​—AIS. 61: 1, 2.

1. Met Jises a föri ngeni chokkewe mi letipeta, iwe pwata?

JISES KRAIST a erä: “Anei mongö ai üpwe aleasochisi letipen ewe mi tiniei o awesala ewe angang a awisa ngeniei pwe üpwe föri.” (Jon 4:34) Jiowa a ewisa eü angang ngeni Jises. Lupwen a föri ei angang a pwal pwäratä an tongei aramas usun chök seman we. (1 Jon 4:7-10) Ewe aposel Paul a fos usun eü mettoch Jiowa a pwäraalo an tong lon, lupwen a erä pwe I “Koten sokkun aururu meinisin.” (2 Kor. 1:3) Jises a pwäratä pwal ena esin tong lon an angang woon fönüfan usun met Aisea a oesini. (Älleani Aisea 61:1, 2.) A apasa pwe än Aisea we oesini a weneiti i. (Luk 4:16-21) Atun an afalafal, Jises a aururu chokkewe mi letipeta me apöchökküler me ekinamweer.

2, 3. Pwata a lamot ngeni Chon Kraist ar repwe aururu ekkewe ekkoch?

² Mi lamot meinisin Chon Kraist repwe aururu chokkewe mi letipeta. (1 Kor. 11:1)  Paul a apasa: “Oupwe apöchökülafengenikemi o alilisfengen lefilemi.” (1 Tes. 5:11) Aramas ra osupwangen auruur pokiten kich sia nonnom lon ewe “fansoun weires.” (2 Tim. 3:1) A chochommongolo aramas mi mürinnö ra nom lein chokkewe mi eäni kapas me föfför mi efisatä riäfföü me letipechou.

³ Paipel a oesini pwe lon ekkeei ränin lesopwoloon ei otot mi ngaw, chommong “repwe ekieki chök püsin ir, repwe efich moni, repwe tunomong me lamalamtekia, repwe turunufas o aleasolap ngeni semer me iner, resap sile kilisou, resap meniniti lamalam, resap eäni tong, resap amusala tipisin aramas, ra luapas, resap tongeni püsin nemeni inisir, ra lingeringerikai, ra oput mine a mürina, ra rawangauei aramas, ra rochongau o uren lamalamtekia, ra efich pwapwan fanüfan, nge resap echeni Kot.” Paipel a pwal apasa pwe än aramas ekiek me föfför ra “fokun ngauala.”​—2 Tim. 3:2-4, 13.

4. Lon ei fansoun met a fiffis woon ei fönüfan?

⁴ Sise mäirü ren ena mettoch, än Kot we kapas a apasa pwe “unusen fanüfan a nom fän nemenien Ewe mi Ngau.” (1 Jon 5:19) Ena kapas “unusen fanüfan” a kapachelong nemenemen mwuun, pekin lamalam, pekin sopai me pwal ekkewe mettoch Setan a äeä pwe epwe achöüfetälei an kewe ekiek. Esor tipemwaramwar pwe Setan ewe Tefil, i ewe “samolun ei fanüfan” me “koten ei fanüfan.” (Jon 14:30; 2 Kor. 4:4) A ngangngawolo napanapen fönüfan iei pokiten Setan a kon song. A silei pwe a chök mwochomwoch an we fansoun. (Pwar. 12:12) A fokkun aururukich ach silei pwe Kot esap mut ngeni Setan me an we otot mi ngaw an epwe chök sopwosopwolo me epwe letelo pwüngün än Jiowa nemenem.​—Keneses, sopwun 3; Hiop, sopwun 2.

Ewe Kapas Allim a Esilefeil woon Unusen Fönüfan

5. Ifa usun ewe oesini usun ewe angangen afalafal a pwöpwönüetä lon ekkeei ränin le sopwoloon?

⁵ Jises a oesini: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (Mt. 24:14, TF) Usun met Jises a apasa, nöün Jiowa aramas woon unusen fönüfan ra afalafala ewe kapas allim usun Mwuun Kot. Ikenäi, lap seni 7,500,000 Chon Pwäratä Jiowa lon lap seni 107,000 mwichefel ra föfföri ei angang. Jises a afalafala me asukula aramas usun Mwuun Kot, iwe Chon Pwäratä Jiowa ra pwal föri ena. (Mt. 4:17) Ren ei angang, ra aururu chommong mi letipeta. Lon chök ekkewe ruu ier ra lo, 570,601 ra papatais me wiliti Chon Pwäratä Jiowa!

6. Ifa om ekiek usun lapoloon ach angangen afalafal?

 ⁶ Ikenäi Chon Pwäratä Jiowa ra afföüni me einetifetälei ekkewe puken äweween Paipel lon lap seni 500 fos. Esor a föri ei esin angang me mwan! Inaamwo ika ra nonnom lon ei otot mi nom fän nemenien Setan, nge nöün Jiowa aramas ra chochommongolo me ra tinikken lon an we angang. Esap fokkun fis ena ika än Kot we manaman mi fel ese emmweni. Pokiten ewe kapas allim a esilefeil woon unusen fönüfan, chokkewe mi etiwa ra tongeni küna ewe esin auruur nöün Jiowa aramas ra pwal eäni.

Chon ewe Mwichefel Ra Tongeni Aururukich

7. (a) Pwata sisap ekieki pwe Jiowa epwe amoielo meinisin mettoch mi eletipechoukich ikenäi? (b) Pwata sia silei pwe sia tufichin likiitü atun riäfföü mwääl me weires?

⁷ Pokiten sia nom lon ei otot mi ur ren minne mi ngaw, kich meinisin sipwe küna weires. Sisap ekieki pwe Kot epwe äwesi meinisin mettoch mi eletipechoukich me mwen an ataielo ei otot. Lupwen sia witiwiti ena fansoun, sipwe küna sossotun ach tuppwöl ngeni Jiowa me ach älisatä an we nemenem. (2 Tim. 3:12) Nge ren än Jiowa älillis me auruur, sia tongeni usun ekkewe Chon Kraist mi kepit lon Tesalonika loom, iir kewe ra pwäratä ar ‘likitü me ar lükülük’ atun riäfföü mwääl me weires.​—Älleani 2 Tesalonika 1:3-5.

8. Ifa usun ewe Paipel a pwäratä pwe Jiowa a aururu nöün kewe chon angang?

⁸ Sia tongeni lükülük pwe Jiowa a ngeni nöün kewe chon angang ewe auruur ra osupwangan. Äwewe chök, ewe soufos Elias a niuokkus me sü lupwen Kiwin Jesepel a mochen nielo. A pwal mwo nge apasa pwe a mochen mälo. Nge Jiowa ese epita Elias, a fen aururu me apworai pwe epwe sopwelo le föri wisan wisen soufos. (1 King 19:1-21) Pwal eü atun Jiowa a aururu nöün kewe aramas, ina ewe fansoun a aururu ewe mwichefel le atun ekkewe aposel. Ewe Paipel a apasa pwe ewe mwichefel lon unusen Jutia, Kalili me Sameria a tolong lon eü fansoun kinamwe me a pöppöchökülelo. A “fefetal lon niuokusun ewe Samol pwal lon aururuun [än Kot we manaman mi fel], o ra chommongelo.” (Fof. 9:31) Kich sia pwal kilisou ren ach angei auruur seni än Kot we manaman mi fel!

9. Pwata ach käeö usun Jises a tongeni aururukich?

⁹ Kich Chon Kraist sia fen küna auruur ren ach käkkäeö usun Jises Kraist me äppirü i. Iei alon: “Oupwe feito rei, ami meinisin mi pekus ren choun osemi o ngang upwe asösö kemi. Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno. Pun osei we upwe ngeni kemi mi mecheres o upwe ngeni kemi osemi mi pwas.” (Mt. 11:28-30, Ewe Kapasen God) Lupwen sia käeö usun än Jises kirekiröch me an tongei aramas me äppirü i, iwe, sia tongeni ngaselo seni ach osukosuk.

10, 11. Iö kewe lon ewe mwichefel ra tongeni awora auruur?

¹⁰ Chon ewe mwichefel ra pwal tongeni aururukich. Äwewe chök, ekieki ifa usun ekkewe elter ra tongeni älisi chokkewe mi apwangapwangolo lon ar lükü. Iei alon Jemes: “Iö me leimi a samau? Epwe titi ekewe souakomwen mwichefel, pwe repwe iotek won.” Iwe, met epwe fis mwirin? “Ei iotekin lükülük epwe apöchöküla ewe chon samau. Ach Samol epwe apwäki, nge ekewe tipis a föriir repwe musala.” (Jem. 5:14, 15) Esap chök ekkewe elter lon ewe mwichefel repwe tongeni aururukich.

¹¹ Fän chommong a mecheres ngeni ekkewe fefin ar repwe fosfengen usun ar  osukosuk. Äkkäeüin, pwiich kewe fefin mi mwukolo ra tongeni fönöüöchü ekkewe fin Kraist mi kükkün seniir. Ekkena mi mwukolo ra fen pin küna ekkewe osukosuk a tori ekkewe mi kükkün. Ren ar aüseling me pwäratä tong, ra tongeni älillisöch ngeni pwiir kana. (Älleani Taitos 2:3-5.) Pwüngün, mi lamot ekkewe elter me chon mwichefel repwe “apöchöküla letipen” chokkewe mi letipengaw. (1 Tes. 5:14, 15) Sipwe chechchemeni pwe Kot “a akachipakich lon ach riäföü meinisin, pwe pwal kich sipwe tongeni echipa chokewe mi nom lon sokopaten riäföü meinisin.”​—2 Kor. 1:4.

12. Pwata a lamot ach sipwe fiti ekkewe mwich?

¹² Ach fiti än Chon Kraist kewe mwich, ina ewe mettoch mi fokkun lamot pwe sipwe küna auruur. Ekkewe afalafal seni Paipel ra katowu lon mwich ra apöchökkülakich. Sia küna pwe Jutas me Sailas ra “apöchöküla o anüküchara ekewe chon lükülük” ren ar afalafal. (Fof. 15:32) Chon ekkewe mwichefel ra apöchökkülafengeniir ren ar pworausfengen mwen me mwirin mwich. Inaamwo ika sia riäfföü ren eü osukosuk, a mmen mürinnö ach sipwe chiechi ngeni pwiich kewe Chon Kraist. Ach äläemönülo epwe tongeni alapaalo ach osukosuk. (SalF. 18:1) Nge mi lamot ach sipwe apwönüetä alon aposel Paul ei: “Ousipwe ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen usun ekoch ra föföri. Nge sipwe fokun apöchökülafengenikich lefilach, pun sia silei pwe Ränin ach Samol a arapoto.”​—Ipru 10:24, 25.

Ewe Paipel a Ngenikich Auruur

13, 14. Ifa usun ewe Paipel a tongeni aururukich?

¹³ Inaamwo ika kich Chon Kraist mi fen papatais are sia kerän poputä le käeö usun Kot me an kewe kokkot, sia tongeni angei watteen auruur seni Paipel. Paul a apasa: “Pun meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.” (Rom 15:4) Ewe Paipel a tongeni aururukich me älisikich ach sipwe “fokun tufich o lipwäköch ngeni sokun angang mürina meinisin.” (2 Tim. 3:16, 17) Sia tongeni silei ewe enlet usun än Kot kewe kokkot me ewe äpilükülük allim fän iten mwach kkan, ren ach äkkälleani me käkkäeö ewe Paipel me nöüch kewe puk. Ach föri ei, sipwe tongeni pwapwaiti ewe auruur me ekkewe feiöch ra pop seni ewe äpilükülük lon Paipel.

 ¹⁴ Jises a isetiw eü leenien äppirü mi mürinnö ren an nöünöü än Kot Kapas le asukula me aururu aramas. Mwirin an manausefäl, Jises a pwä ngeni rüüemön nöün kewe chon käeö me äweweöchü ngeniir än Kot Kapas. Ese mwääl a fokkun aururuur. (Luk 24:32) Ewe aposel Paul a äppirü Jises me nöünöü än Kot Kapas le asukula aramas. Lon Perea, chokkewe mi aüseling ngeni “ra etiwa ewe afalafal fän mochenin letiper. Iteiten rän ra kaiö lon ekewe Toropwe mi Pin.” (Fof. 17:2, 10, 11) Ina minne a fokkun lamot sipwe älleani ewe Paipel iteiten rän me mut ngeni ewe Paipel fengen me nöüch kewe puk ar repwe älisikich! Ra aururukich me ngenikich äpilükülüköch lon ekkeei fansoun weires.

Pwal Ekkoch Alen Aururu Aramas

15, 16. Met sia tongeni föri ren ach sipwe älisi me aururu pwiich kewe?

¹⁵ A wor chommong mettoch sia tongeni föri pwe sipwe älisi me aururu pwich kewe. Äwewe chök, sia tongeni älisi ekkewe chinnap are mi samau le feilo lon sitowa. Eli sia tongeni älisi ekkewe ekkoch ren angangen lon imwer. Ach föri ei a pwäratä pwe sia äfänniir. (Fil. 2:4) Sia pwal tongeni apünga pwich kewe ren lipwäköchüür me napanapöchür kewe, usun chök ar tong, pwora me lükü.

¹⁶ Sia tongeni aururu ekkewe chinnap ren ach äämweer me rongorong ngeni pworausen manauer me ekkewe feiöch ra küna lon ar angang ngeni Jiowa. Iwe, a tongeni apöchökkülakich me aururukich! Sia tongeni ällea ngeniir ewe Paipel are nöüch kewe puk. Neman sia tongeni käeöfengen eü lesen lon Ewe Leenien Mas are Än ewe Mwichefel Käeöön Paipel fän iten ewe mwich lon ena wiik. Sipwe tongeni katol fengen eföü nöüch kewe DVD. Sia pwal tongeni älleani are apworausa pworausen ekkoch pwich kewe seni nöüch kewe puk.

17, 18. Pwata sia lükülük pwe Jiowa epwe älisi me aururu nöün kewe chon angang mi tuppwöl?

¹⁷ Ika sia silei pwe pwich kewe ra osupwangen auruur, sipwe iotek fän iter. (Rom 15:30; Kol. 4:12) Lupwen sia küna weires ren ach kewe osukosuk me lupwen sia achocho le aururu ekkewe ekkoch, sia tongeni eäni ewe esin lükü a nom ren Tafit. Iei alon: “Kopwe monätä won ewe Samol mi Lapalap om weires, pwe i epwe tümwünük. Esap fokun mwütätä pwe ewe chon pwüng epwe kuf.” (Kölf. 55:22) Jiowa epwe aururukich me älisikich fansoun meinisin. Esap tongeni elichippüngü nöün kewe chon angang mi tuppwöl.

¹⁸ Kot a ereni nöün kewe chon angang loom: “Ngang ewe üa achipok.” (Ais. 51:12) Jiowa epwe pwal aururukich me epwe efeiöchü ach achocho le aururu ekkewe ekkoch. Kich meinisin sipwe küna auruur seni alon Paul kewe ngeni ekkewe mi kepit lon an we fansoun. A apasa: “Püsin ach Samol Jesus Kraist me Samach Kot, ewe mi echenikich o fang ngenikich chipen letipach fansoun meinisin pwal ach apilükülüköch ren an ümöümöch, epwe echipa letipemi o apöchökülakemi, pwe oupwe föri o apasa mine a mürina fansoun meinisin.”​—2 Tes. 2:16, 17.

Ka Chechchemeni?

• Ifa ükükün chöüloon ewe angangen afalafal?

• Ikkefa ekkewe mettoch sia tongeni föri pwe sipwe aururu aramas?

• Ifa usun ewe Paipel a pwäratä pwe Jiowa a aururu nöün kewe aramas?

[Kapas Eis fán Iten ewe Lesen]

[Sasing lon pekin taropwe 29]

Ka achocho le aururu ekkewe mi letipeta?

[Sasing lon pekin taropwe 31]

Ekkewe kükkün me watte iir ra tongeni minen apöchökkül