Pwóróus Lón Paipel A Tipeeú Ngeni Pekin Science

“Üa maketiu fän itom . . . kapasen öüröür me silelap. Repwe aiti ngonuk mine a pwüng o let, pwe kopwe tongeni atowu pälüöchün ekewe kapas.”​—ÄN SALOMON FOS 22:20, 21.

IFA USUN EWE PAIPEL A SÓKKÓLÓ? Pekin science a fen ánneta pwe fán chómmóng ekkewe pwóróus lón ekkewe puk minen lóóm ra fókkun mwáál me efeiengaw. Pwal mwo nge ikenái, ekkewe soumak ra siwili néúr kewe puk pwe repwe tipeeú ngeni ekkewe pwóróus ra kerán pwáló. Nge ewe Paipel a apasa pwe ewe Chón Fératá Mettóch Meinisin, i ewe a fératá ewe Paipel me an we Kapas epwe “nonom tori feilfeilachök.”​—1 Petrus 1:25.

PISEKIN ÁNNET: Me ren ewe Allúkún Moses, ekkewe chón Israel repwe ttu pwang me ireeló ar kewe kiten mwéngé ikewe ie mi towau seni leenien aramas. (Tuteronomi 23:12, 13) Ika ra attapa ekkewe man are aramas mi má, iwe repwe eliméchúúr ren konik. (Lifitikos 11:27, 28; Numperis 19:14-16) Lón ena fansoun ekkewe mi úriir keinepan ra kan káimuló tori án emén epwe nennengeniéchú inisiir me kúna pwe ewe semmwen ese chúen efeiengaw.​—Lifitikos 13:1-8.

MET PEKIN PIOING LÓN EI FANSOUN A PWÁRAALÓ: Ireireloon kiten mwéngé, tétélún paw me káimulóón ekkewe mi semmwen ra tongeni álisi eppetin samau. Ika esor leenien ngaseló are kkótun sanitation, ewe Ofesin Eppetin Samau lón Merika a erá: “Mi éch kopwe pinché mwaren 100 fiit towauan seni ekkewe konik me sáát, mwirin ireeló.” Me ren ewe World Health Organization, lupwen chón ekkewe sóópw ra túmúnú le ireeló ar kewe kiten mwéngé, iwe a chókúkkúnúló ekkewe chón úriir semwenin feilseni wóón lap seni eú na aúlúngátin. Lap seni 100 ier ra lo, ekkewe tokter ra kúna pwe pokiten rese télú péúr mwirin ar attapa ekkewe somá, iwe ra ngeni chómmóng patient ewe ménún samau. Ewe ofesin eppetin samau lón Merika a erá pwe téttélún paw, ina eú “al mi fókkun éch seni meinisin ren eppetin chéúlóón samau.” Nge ifa usun káimulóón ekkewe chón úriir keinepan are pwal ekkóch samau? Kukkuto chék, ewe Saudi Medical Journal a erá: “Lepoputáán eú samau mi chéú, ewe chék mettóch epwe tongeni eppeti chéúlóón, ina káimulóón ekkewe mi úriir.”

MET KA EKIEKI? Mei pwal wor eú pukepin minen lóóm epwe tipeeú ngeni pekin science ikenái? Are ewe chék Paipel mi kkóló aúchean?

[Ekis Pwóróus lón pekin taropwe 6]

“Aramas ra ingeiti tichikin ekkewe minen túmúnún liméchún chón Israel lón fansoun [ewe allúkún] Moses.”​—MANUAL OF TROPICAL MEDICINE, ME REN DRS. ALDO CASTELLANI ME ALBERT J. CHALMERS