JESUS a wesewesen eáni ewe sókkun manaw mi wor aúchean? Sia kúna pwe nónnómun manawan a chék tekison, me lón ánein manawan ese pisekisek. Ese pwal mwo nge “wor eu leni ia epwe konola ie o asösö.” (Lukas 9:57, 58) A pwal kúna koput, aramas ra pweni, iwe mwirin chón koputan kewe ra nieló.

Eli kopwe ekieki, ‘Me rei, esap ina ewe sókkun manaw mi wor aúchean!’ Nge mei pwal wor mettóch mi fis lón manawen Jesus sipwe nengeni. Sipwe etittina rúáánú mettóch lón manawen Jesus.

“Anei mongö ai üpwe aleasochisi letipen ewe mi tiniei.”​—Johannes 4:34.

Ren án Jesus kapas me féffér, a pwáraatá an akkomwa lón manawan an apwénúetá letipen Seman we lón láng, Jiowa. * A fókkun meefi pwapwa ren an féri letipen Kot. A alélléfengeni an apwénúetá letipen Kot me anan mwéngé, usun met ena wokisin a erá. Iei sipwele ppii met a fiffis lupwen Jesus a apasa ekkena kapas.

Jesus a apasa ekkena kapas órun leolowas. (Johannes 4:6) Unusen ewe sossoran a fetál wóón panapanen ewe fénú Samaria, ina popun ese mwáál a echik. Néún kewe chón káé ra mwo nge ereni: “Sense, kopwele mongö.” (Johannes 4:31) Minne Jesus a ereni néún kewe chón káé a pwáraatá pwe a wesewesen meefi péchékkúl seni an féri án Kot angang. Esap ina ewe mettóch mi pwáraatá pwe i emén mi eáni ewe sókkun manaw mi wor aúchean?

“Ngang üa echeni Semei.”​—Johannes 14:31.

Jesus a fókkun ririéch ngeni Seman we lón láng. An tong mi alóllóól ngeni Kot a amwékútú le pwáraaló pwóróusen Seman we, ren ifa itan we, minne a tipeni me napanapen kewe. Ren án Jesus kapas, féffér me ekiek, a unusen áppirúfichi Seman we. Ina popun lupwen sia álleani pwóróusen Jesus, usun itá nge sia kúna féfférún me ekiekin Seman we. Ina minne, lupwen Filip a eisini Jesus: “Pwäri ngenikem Semom,” Jesus a pélúweni: “Iö a künaei, a küna Semei.”​—Johannes 14:8, 9.

Jesus a fókkun tongei Seman we, ina minne a tipemecheres le álleasochisi I tori máló. (Filipi 2:7, 8; 1 Johannes 5:3) Án Jesus na úkúkún watteen tong ngeni Kot a atoto an epwe meefi aúchean manawan.

“Esap wor eman a eäni chen mi lapalap seni ei chen, are eman a pölükü manauan fän iten chiechian kana.”​—Johannes 15:13.

Pokiten kich aramas mi tipis ese wor ach ápilúkúlúk. Ewe Paipel a áweweei: “Ren eman mwän [Atam] tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Ren pwisin ach tufich sise tongeni sú seni ewe liwinin tipis, ina máló.​—Rom 6:23.

Kilisou ngeni Jiowa pwe a awora ewe alen an epwe pwákini án aramas osukosuk. A mut ngeni Jesus, Néún we mi unuséch ese wor tipisin, an epwe kúna riáfféú me máló pwe epwe awora ewe méén kepich epwe angasaaló aramas seni fétekin tipis me máló. Ren án Jesus tongei Seman we me aramas, a tipemecheres le álleasochis me fangóló manawan fán ásengesich. (Rom 5:6-8) Ena sókkun tong mi pennúkú pwisin mochenin a atoto án Jesus epwe meefi aúchean manawan. *

“Iei i nei mi achengicheng, üa unusen pwapwa ren.”​—Mateus 3:17.

Seni láng, Jiowa a apasa ekkena kapas lupwen Jesus a papatais. Ina minne, Jiowa a pwáraaló an tong me an pwapwaiti Néún we, Jesus. Ina popun Jesus a tongeni apasa fán lúkúlúk: “Semei a echeniei”! (Johannes 10:17) Jesus a pwora le likiitú fán koput me esiit pún a silei pwe Seman we a tongei i me pwapwaiti. A pwal álisi an epwe tipeppós me kinamwe inaamwo ika epwele ninniiló. (Johannes 10:18) Ese mwáál án Jesus silei pwe Seman we a tongei me pwapwaiti a pwal álisi an epwe meefi lapólóón aúchean manawan.

Pwúngún, Jesus a eáni ewe sókkun manaw mi aúchea. A ffat pwe a watte met sia tongeni káé seni ren ifa usun sipwe tongeni eáni ewe sókkun manaw mi wesewesen wor aúchean. Ewe pwóróus mwirin ei epwe pwóróus usun ekkóch án Jesus kapasen éúréúr mi fataffatéch ngeni néún kewe chón káé ren ifa usun repwe manaweni manawer.