A MMEN fókkun pwúng alon ena wokisin! Manaw wóón fénúfan a ur ren “fitikoko me noninen.” Eli ka fen ekieki: ‘Mi tufich ach sipwe eáni eú sókkun manaw mi wor aúchean lón ei fansoun?’

Áwewe chék, nengeni pwóróusen Maria. Le péchékkúlan a mmen sou angang. Nge iei a 84 ierin, a chék mwenilong lón imwan. A chúen péchékkúl an ekiek nge inisin a apwangapwang. Iwe ifa usun a chúen tongeni meefi pwe mi wor aúchean manawan?

Nge en ifa meefiom? Eli a fen wor eú atun ka eis ika mi wor aúchean manawom. Neman minne ka eáni angang a mmen ápekkus me echchipwang. Ese wor emén a áfánni óm achocho lón óm angang. Me inaamwo ika ka sópwéch lón manawom iei nge eli kese kon meefi núkúnúkéch ren met epwe fis ngonuk lón mwachkkan. Fán ekkóch eli ka pwal tipitipingaw are letipechou. Eli a kan wor osukosuk me fitikoko lón óm famili. Neman emén attongom a máló. Emén mwán itan André a fókkun pacheéch ngeni seman we, nge eú rán a weiweitá án seman we semmwen, mwirin a máló. Andre a rúké me chúpúún me a meefi pwe esap tongeni móló.

Ese lifilifil met ach osukosuk nge mi wor eú mettóch sia fókkun mochen silei: Mi tufich ach sipwe eáni eú sókkun manaw mi wor aúchean? Sia tongeni kúna pélúwen ena kapas eis seni pwóróusen manawen Jesus Kraist, ewe a manaw 2,000 som ier lóóm. Inaamwo ika Jesus a kúna chómmóng osukosuk, nge a wesewesen eáni ewe sókkun manaw mi wor aúchean. Sia pwal tongeni eáni ena sókkun manaw ika sia áppirú i.