Ewe fénúfan lón ach ei fansoun a uren sasingin me kachitoon kapasingaw. * Ra tongeni nóm lón minen advertise, napanapen fout mi térú, kachito, kél me puk, pwal lón TV prokram, video game, ekkewe phone mi usun computer, Web sites, me sasing wóón internet. Sasingin me kachitoon kapasingaw ra usun itá ese chúen wor ngawan pwe a kon chéúfetál. A chóchchómmóngóló aramas lón chómmóng leeni ra katol sasingin me kachitoon kapasingaw mwen ekkewe fansoun ra ló.​—Ppii ewe pwóór  “Enletin Pwóróus Usun Sasingin me Kachitoon Kapasingaw.”

Napanapen sasingin me kachitoon kapasingaw ra pwal sissiwil. Emén sense itan Gail Dines a makkeei: “Ekkewe sasing lón ei fansoun ra kon lululó ngawer, pwe ekkewe sasing me kachitoon kapasingaw mi fókkun annou me lóóm, iei a chék térúfetál.”

Met meefiom ren chómmóngólóón me án aramas rese chúen meefi ngawen sasingin me kachitoon kapasingaw? Itá sasingin me kachitoon kapasingaw eú chék minen apwapwa are mi efeiengaw usun poison are lefilan? Jesus a apasa: “Efoch irä mi öch a uani ua mi mürina, nge efoch irä mi ngau a uani ua mi ngau.” (Mateus 7:17) Met uwaan sasingin me kachitoon kapasingaw? Ren ach sipwe silei pélúwan, sipwe pwóróus wóón fitu kapas eis mi weneiti sasingin me kachitoon kapasingaw.

ALON EKKEWE SOUTIPACHEM: Sasingin me kachitoon kapasingaw ra kon oumwesiwesaatá emén. Ekkóch soukáé me tokter ra aléllé ngeni kikin cocaine.

Brian, * emén mi umwesin katol sasingin me kachitoon kapasingaw wóón Internet a erá: “Ese wor mettóch a tongeni aúkúeiló. Ua meefi pwe usun itá nge ua ttan. Ua chechchech me metek mékúrei. A fitu ier ra ló ai resin achocho le úkúló nge use tongeni.”

Lap ngeni aramas mi umwesin sasingin me kachitoon kapasingaw ra túkúmaaló féfférúr. Ra túkúmón me otuputup. A ina usun chómmóng, ra meefi pwe iir ra ákkáláeménúló, sáw, aúrek, letipengaw, me song. Nge ekkóch ra pwal ekiekin pwisin nireló. Serge emén mi kapiinawu ekkewe sasingin me kachitoon kapasingaw wóón néún we mobile phone arapakkan iteiten rán, a erá: “Ua chék ekieki pwisin ngang. Ua meefi pwe ua chék áláemén, ese wor lamotei, mengiringir, me fétek lón tipis. Ua fókkun sáw me niwokkus le kútta álillis.”

Inaamwo ika emén a chék seretá wóón sasingin me kachitoon kapasingaw nge a tongeni kúna feiengaw seni. Emén tokter itan Judith Reisman i a nampa eú lón káéén sasingin me kachitoon kapasingaw a pwáraatá mwen ewe kúmiin senetorun Merika pwe “sasingin me kachitoon kapasingaw ra mwéch me siwili tupwuach, a kan pippichitá me a weires are ese tongeni móló me lón ekiekich.” Susan 19 ierin, a sereni sasingin me kachitoon kapasingaw wóón Web sites a apasa: “Ekkena sasing me kachito ra mwéch lón tupwuei. Use ekiekiir nge ra chék pippichitá. Ua meefi pwe use tongeni unusen ménúkiireló.”

A FFAT PWE: Sasingin me kachitoon kapasingaw ra nemeni me eselipato watteen feiengaw ngeni emén.​—2 Petrus 2:19.

ALON EKKEWE SOUTIPACHEM: “Ewe puk The Porn Trap, makkeien Wendy me Larry Maltz, a erá: “Ekkewe pwúpwúlú me famili ra káimufesen pokiten sasingin me kachitoon kapasingaw.”

Sasingin me kachitoon kapasingaw ra atai ekkewe famili me pwúpwúlú ren

• Apwangapwangolóón lúkúlúk, chiechiéch me tong lefilen pwúpwúlú.​—Än Salomon Fos 2:12-17.

• Lapólóón achéchééi pwisin i, ese áfánni meefien pwúlúwan me ese pwapwaiti pwúlúwan.​—Efisos 5:28, 29.

• Lapólóón mocheniangaw me anchang mi limengaw.​—2 Petrus 2:14.

• Tupulóón chókkewe mi pwapwaiti sasingin me kachitoon kapasingaw ren ar aumwesi pwúlúwer kewe pwe repwe féri ekkewe féffér lefiler nge ese fich.​—Efisos 5:3, 4.

• Lapólóón kirikiringaw lón pekin pwúpwúlú.​—Mateus 5:28.

Ewe Paipel a apasa pwe ekkewe pwúpwúlú repwe “nikiitu” lefiler. (Malakai 2:16, Kapasen God)  Kirikiringaw eú sokkun rawangaw mi tongeni atai ririin pwúpwúlú me a tongeni efisi nomfesen are mufesen. Ena sókkun mettóch a efeiengawa ekkewe nau lón ewe famili.

Ekkewe nau ra pwal tongeni pwisin efeiengawer ren ekkewe sasingin me kachitoon kapasingaw. Brian, ewe sia fen pwóróus usun, a áweweei: “Atun a 10 ieri, ua seretá wóón néún semei we kewe puken kapasingaw atun ua nikapop. Ua poputá le katol le monomon nge use weweiti popun ua sani ekkena sasing. Ina poputáán féférui mi efeiengaw mi tori atun ua wattetá.” Ekkewe repot ra affata pwe ekkewe sasingin me kachitoon kapasingaw ra tongeni etipetipa ekkewe sáráfé ar repwe mochen lisowumwáál inaamwo ika iir mi chék kúkkún me ra tongeni eáni manaw mi limengaw, oumwesiwes lón pekin lisowu, eáni memmeef me ekiek mi wiliwilikkis.

A FFAT PWE: Sasingin me kachitoon kapasingaw ra atai ririéch me ló, ló, ló ra atoto riáfféú me letipechou.​—Än Salomon Fos 6:27.

ALON ÁN KOT WE KAPAS: “Oupwe amäloi ekewe . . . mi nom remi: sokopaten föförün lisowu, lüangau, mocheisou, mocheniangau me tipemong. (Pun tipemong och sokun angang ngeni anümwäl.)”​—Kolose 3:5.

A ffat pwe Jiowa * a oput sasingin me kachitoon kapasingaw. Nge esap pokiten ese mochen an epwe pwóróus usun lisou pún i a fen efisi án ekkewe pwúpwúlú memmeefin mochen chufengen me apwapwaai emén me emén leir, ren ar repwe chiechiéch lón pekin memmeef me repwe néúnéú.​—James 1:17.

Pwata sia tongeni apasa pwe Jiowa a fókkun oput sasingin me kachitoon kapasingaw? Ekieki ekkeei fitu popun

• A silei pwe sasingin me kachitoon kapasingaw ra tongeni angawa manawen aramas.​—Efisos 4:17-19.

• A tongekich me a mochen túmúnúkich seni feiengaw.​—Aisea 48:17, 18.

• Jiowa a mochen túmúnú ririin pwúpwúlú me famili.​—Mateus 19:4-6.

• A mochen ach sipwe limeliméch lón manawach me sipwe súféliti an ekkewe ekkóch pwúúng.​—1 Tesalonika 4:3-6.

• A mochen ach sipwe aúcheani me osúfélú ewe tufichin néúnéú.​—Ipru 13:4.

• Jiowa a silei pwe sasingin me kachitoon kapasingaw ra pwári án emén ekieki chék pwisin mochenin, elimengawa lisowu me pwári án Satan ekiek usun lisowu.​—Keneses 6:2; Jutas 6, 7.

A FFAT PWE: Sasingin me kachitoon kapasingaw ra atai án emén riri ngeni Kot.​—Rom 1:24.

Iwe nge, Jiowa a fókkun tongei chókkewe mi mochen ngaseló seni fán nemenien sasingin me kachitoon kapasingaw. Ewe Paipel a apasa: “Ewe Samol mi Lapalap a lukpwetete [“úméúméch,” NW] o kirikiröch, a songomang o wöün tong ellet. Pun a silei sokosokuch, a chemeni pwe kich pwül echök.” (Kölfel 103:8, 14) A etiwa chókkewe mi tipetekison ar repwe seppi ngeni pwe repwe ‘angei tong o küna ümöümöch, pwe epwe alisir lon fansoun ar osupwang.’​—Ipru 4:16; ppii ewe pwóór “ Ngaseló Seni Fétekin Sasingin me Kachitoon Kapasingaw.”

Chómmóng aramas ra fen etiwa án Jiowa álillis. Nge an álillis mi álilliséch? Ekieki alon Paipel keei usun ekkewe ekkóch mi pworacho ngeni féfférúr mi ngaw: “Oua fen küna limöch . . . , oua küna pin, oua küna pwüng fän iten ach Samol Jesus Kraist,” pwal ren án Kot we manaman mi fel. (1 Korint 6:11) Chókkana ra tongeni aloni alon ewe aposel Paulus we mi apasa: “Ngang mi tufich ren mettoch meinisin lon ewe emon mi apochokkulaei.”​—Filipi 4:13, Testament Mi Fö.

Susan, emén mi pworacho ngeni umwesin katol sasingin me kachitoon kapasingaw a apasa: “Jiowa chék a tongeni álisuk óm kopwe úkútiw seni. Ika kopwe tingor an álillis me emmwen, iwe, kopwe tongeni eáni manaw mi liméch me mwen mesan. Esap tongeni likitukoló.”