Ese wor met lón Paipel mi ú ngeni angangen kek somá.

A wor pwóróus lón Paipel usun an kek inisin me chúún ekkewe somá. (Jos. 7:25; 2 Kron. 34:4, 5) Eli ekkena aramas ese fich ngeniir ar repwe peias. Nge sap minne pwe iteiten an a kek somáán emén a wewe ngeni pwe eménna ese fich ngeni an epwe peias.

Sia tongeni weweiti ena ren pwóróusen málóón King Saul me néún kewe úlúmén mwán. Iir me fémén ra máló atun ar maun ngeni ekkewe chón Filistia. Emén me lein néún Saul kana ina i Jonatan, i emén chiechien Tafit mi múrinné me chón peni mi tuppwél. Atun ekkewe chón Israel mi pwora mi nóm Japes-kiliat ra silei met a fis, ra angei inisin ekkena fémén, keniireló iwe peiasenaló chúúr kewe. Mwirin, Tafit a mwareiti ekkena chón Israel ren met ena ra féri.​—1 Sam. 31:2, 8-13; 2 Sam. 2:4-6.

Ewe manawsefál ina ewe ápilúkúlúk seni Paipel fán iten ekkewe mi máló. Ena a wewe ngeni pwe Kot epwe eliwinisefáliir ngeni manaw fitifengen me sókusókur kewe. Ese kaúk tufichin Jiowa, a tongeni amanawasefáli emén mi máló me fératá eú mineféén inis fán itan, ese lifilifil ika pwe e kek are ese. Atun King Nepukatnesar a allúk pwe ekkewe úlúmén chón Ipru mi tuppwél repwe kóturulong lón ewe leenien ekkei, rese niwokkus pún ra silei pwe Jiowa epwe tongeni amanawasefáliir. (Tan. 3:16-18) Pwal ina usun ren néún Jiowa kewe chón angang mi tuppwél mi kalapus lemwúún ewe Nazi, ekkewe mwirin ar ninniiló a kek inisiir. Ekkóch néún Kot kewe mi tuppwél ra máló ren púngún och mettóch are ren pwal eú napanap pwe inisiir ese chúen pwá. Inaamwo a ina, nge mi chék alúkúlúk pwe repwe manawsefál.​—Pwär. 20:13.

Sap minne a lamot pwe Jiowa epwe apachafengenisefáli ewe minen lóómun inis pwe epwe tufich le amanawasefáli emén. Ena pwóróus a leteló ren án Kot amanawasefáli ekkewe Chón Kraist mi kepit pwe repwe manaw lón láng. Usun chék án Jesus “manausefäl lon ngünün,” ekkewe Chón Kraist mi kepit ra manawsefál lón sókusókur kewe chék nge lón eú inis sokun ngún. Ese wor ákkákis mwo kinikinin kifetin inisiir a fitiireló láng.​—1 Pet. 3:18, TF; 1 Kor. 15:42-53; 1 Joh. 3:2.

Ach ápilúkúlúkún manawsefál ese lóngólóng wóón met sia fér ngeni inisin ekkewe mi má nge a lóngólóng wóón ach lúkú án Kot mochen me tufichin apwénúetá an kewe pwon. (Föf. 24:15) Pwúngún pwe eli sise tongeni unusen weweiti ifa usun Kot a féri manamanen manawsefálin aramas lón ekkewe fansoun lóóm are ifa usun epwe féri ena lón mwachkkan. Iwe nge, sia ónómu ach lúkúlúk wóón Jiowa. I a fen “alletätä” ngenikich ena ápilúkúlúk ren an amanawasefáli Jesus.​—Föf. 17:31; Luk. 24:2, 3.

A múrinné pwe ekkewe Chón Kraist repwe ekieki usun eérenien leenier kewe, meefien aramasen lón fénúer kewe, me allúkún mwúúr kewe ren met repwe fér ngeni somáár. (2 Kor. 6:3, 4) Iwe, ika epwe kek somáár are esap, ena a filien emén me emén are filien ewe famili.