PWÓRÓUS LÚKÚNPÉÉNÁN | KA TONGENI ARAP NGENI KOT
Ka Meefi pwe Ka Arap Ngeni Kot?
CHRISTOPHER, EMÉN ALÚWÉL SENI GHANA, a erá: “Án emén ririéch ngeni Kot, ina met epwe ámmeef ngeni núkúnúkéch me kinamwe. Usun nge Kot a kúkkútta met epwe échituk fansoun meinisin.”
HANNAH, SENI ALASKA IERIN 13, a erá: “Kot a kúna meinisin ach kewe riáfféú, a kan ngonuk tong me chen mi somwoló.”
GINA, FIN JAMAICA, IERIN 40 SOM, a erá: “Óm silei pwe ka ririéch ngeni Kot ina met mi fókkun aúchea me ekinamwe.”
Chómmóng aramas wóón unusen fénúfan ra lúkú pwe Kot a ekieki pwe iir chiechian, usun chék Christopher, Hannah me Gina. Nge en met óm ekiek? Óm ekiek pwe ka arap ngeni Kot? Ika kese iwe ka mochen kopwe arap ngeni? Neman ka ekieki: ‘Epwe tufich ngeni án aramas repwe ririéch ngeni ewe Kot mi Unusen Manaman? Ika mi tufich, iwe epwe ifa usun?’
KA TONGENI ARAP NGENI KOT
Me ren ewe Paipel, a tufich ach sipwe ririéch ngeni Kot. A apasa pwe Kot a kér ngeni ewe semelapen chón Ipru Apraham, “chiechiei.” (Aisea 41:8) Nengeni met Kot a apasa lón James 4:8 “Oupwe arap ngeni Kot, iwe, epwe arap ngenikemi.” Iwe a ffat pwe sia tongeni arap ngeni Kot. Nge pokiten sise kúna Kot, ifa usun sipwe “arap ngeni” me pwapwaiti eú riri mi núkúchar?
Ren ach sipwe pélúweni ena kapas eis, ekieki met a fis ren kámááritáán eú riri lefilen aramas. A poputá ren án rúúemén silefengeniir ren iter. Mwirin ra pwóppwóróusfengen me ra fóffós usun ekiekiir me meefier, iwe ewe riri lefiler a mááritá. Ika ra achocho le féri mettóch fán iten emén me emén leir, iwe ar na riri epwe péchékkúleló. A pwal ina usun ach ámááraatá eú riri ngeni Kot. Sipwe ppii ika epwe ifa usun ena.
