Néún Jon Áeúin Taropwe 1:1-10
1 Áúa mak ngenikemi ussun ewe kapasen manaw, ewe mi nóm seni me lepoputáán, ewe áúa rong ussun, kúna ren mesem, kakkatol, me attapa ren péúm.
2 (Ewer, ewe manaw esemuch a pwááló ngenikem me áúa kúna me pwáraatá ussun o esile ngenikemi ussun. Ena manaw esemuch a feito seni ewe Sam me a pwápwááló ngenikem),
3 me áúa pwal esile ngenikemi minne áúa kúna me rong pwe oupwe pwal tongeni etikem ussun chék ám eti ewe Sam me Néún we Jises Kraist.
4 Me áúa makkeei ekkeei mettóch pwe ach pwapwa epwe unus.
5 Iei ewe pwóróus áúa rong seni Jises me áúa aronga ngenikemi: Kot i ewe saram, me ese fókkun wor kiroch lón i.
6 Iká sia erá, “Sia eti i,” nge sia chúen feffetál lón rochopwak, iwe sia kapas chofona me sise etipeeúfengeni manawach ngeni ewe enlet.
7 Iwe nge, iká sia feffetál lón saram pokiten i a nóm lón saram, iwe kich meinisin ousipwe tipeeúfengen, me chchaan Néún we Jises epwe limetikich seni tipis meinisin.
8 Iká sia erá, “Ese wor tipisich,” iwe sia otupu pwisinkich me ewe enlet ese nóm lón kich.
9 Iká sia pwáraatá tipisich kewe, i epwe omusakicheló me limetikich seni angang mi ngaw meinisin pokiten i mi túppwél me pwúng.
10 Iká sia erá, “Sisaamwo tipis fán eú,” iwe sia achofonaai, me sise lúkú an kewe kapas.
