Ewe Áeúin Taropwe Ngeni Chón Korint 13:1-13
-
Tong—a lap seni meinisin (1-13)
13 Iká úa kapas lón kapasen aramas me kapasen ekkewe chónláng nge ese wor ái tong, úpwe ussun akúrangen nechen eú peel are eú tirom mi péén.
2 Me iká a wor rei ewe tufichin osuni me weweiti meinisin monomonun Kot kewe, me weweiti meinisin sile, me iká a wor ái lúkú mi péchékkúl pwe úa tongeni amwékútú ekkewe chuuk nge ese wor ái tong, met úa féri epwe chék lamotmwáál.
3 Iká úpwe áeá meinisin piseki kewe le túmúnú ekkewe ekkóch, me iká úpwe tipemecheres le asoresini manawei pwe úpwe eingeing ren, nge ese wor ái tong, úsapw fókkun feiéch ren.
4 Tong a mosonottam me kirekiréch. Tong ese lólówó. Ese sikesik, ese lamalamtekia,
5 ese féri minne mi ésúfélúngaw,* ese kútta pwisin mochenin, ese mwittir ngeni song. Ese chechchemeni minne emén a mwáál ngeni wóón.
6 Ese pwapwaesini minne ese pwúng, nge a pwapwaesini minne mi enlet.
7 A engiló fán mettóch meinisin, a lúkú mettóch meinisin, a ápilúkúlúkú mettóch meinisin, a likiitú fán mettóch meinisin.
8 Tong esap fókkun sópwongaw.* Nge iká mi wor tufichin osuni, epwe móróló. Iká mi wor tufichin kapas lón sókkopaten kapas, epwe muchúló. Iká mi wor sile, epwe úkútiw.
9 Pún ach sile ese unus me ach osuni ese pwal unus.
10 Nge lupwen minne mi unus epwe waroto, minne ese unus epwe móróló.
11 Lupwen úa emén semirit, ái kapas a ussun án emén semirit, ái ekiek a ussun án emén semirit, ái áweweei mettóch a ussun án emén semirit. Nge iei úa mwán, úa likitaaló napanapen semirit.
12 Pún iei ese ffat minne sia kúna, ussun sia nelong lón eú kilasen oori mi ffér seni mechá, nge mwirin sipwe kúnaéchú, ussun sia nennefengen me emén. Lón ei fansoun ese unus ái silei Kot, nge mwirin úpwe unusen silefichi i, ussun chék an silefichiei.
13 Iwe nge, ekkeei úlúngát repwe nónnóm: lúkú, ápilúkúlúk, tong. Nge ewe mi lap seniir meinisin, tong.
