Néún Piter Áeúin Taropwe 4:1-19
4 Kraist a kúna riáfféú lón inisin we inisin futuk, iwe ámi oupwe pwal ammólnakemi pwe oupwe eáni ekiekin Kraist. Pún ié a kúna riáfféú, a pwáári pwe a úkútiw le féfféri tipis,
2 pwe atun a chúen manaw, esap chúen apwénúetá mochenin aramas, nge epwe apwénúetá letipen Kot.
3 Pún ekkewe fansoun ra ló a naf ámi féri mochenin ekkewe aramas rese silei Kot atun oua féri féfférún angolossá,* tipeni le féri mettóch mi fókkun ngaw, únnúpuch, fiti pari mi ngaw, fiti pariin únnúmmóng sakaw, me fel ngeni uluulun mi ánnioput.
4 Iwe, ra máirú ren ámi ouse chúen fitiir le eáni ewe manaw mi ngaw, ina minne ra eáni kapas mi ámmetek ussumi.
5 Nge ekkena aramas repwe angei kapwúngún féfférúr me ren ewe emén mi fen mmólnetá an epwe apwúngú ekkewe mi manaw me ekkewe mi máló.
6 Ren enletin, iei ewe popun ewe kapas allim a pwal esilesil ngeni ekkewe mi máló, pwe inaamwo iká aramas ra apwúngúúr pokiten napanaper me lúkún, nge me ren ekiekin Kot ra tongeni manaw fán emmwenien ewe ngún mi fel.
7 Nge sópwólóón mettóch meinisin a arapoto. Ina minne, oupwe mirit me mmólnetá* fansoun meinisin le iótek.
8 Nge lap seni meinisin, oupwe fókkun tongfengen lefilemi, pún tong a pwélúoló chómmóng tipis.
9 Oupwe awasélaéchú emén me emén lefilemi nge ousap ngúnúngúnúngaw.
10 Emén me emén ámi, oua fen angei eú liffang. Iwe, oupwe áeá le angang fán iten emén me emén lefilemi pokiten ámi chón angang mi múrinné mi álisi ekkewe ekkóch le kúna feiéch seni án Kot kirekiréch mi somwoló mi pwá lón sókkopaten napanap.
11 Iká emén a tufichin kapas, epwe kapas pwe epwe ffat pwe minne a apasa ina eú pwóróus seni Kot. Iká emén a angang, epwe angang alóngólóng wóón ewe péchékkúl Kot a fang ngeni, pwe Kot epwe ling lón mettóch meinisin me ren Jises Kraist. Ling me manaman epwe nónnóm ren Kot tori feilfeiló chék. Amen.
12 Ámi mi áchengicheng, ousap máirú ren ekkewe sóssót oua kúkkúna mi ussun ngetengeten ekkei.
13 Nge oupwe fen pwapwa pún oua eti Kraist lón an kewe riáfféú, iwe atun epwe pwááló lingan, oupwe pwapwa me pwal chengel chapur.
14 Iká oua kúna itengaw* pokiten iten Kraist, oupwe pwapwa, pún án Kot manaman mi fel me lingan a nóm wóómi.
15 Iwe nge, úse mochen an epwe wor emén leimi epwe kúna riáfféú pokiten an wiliiti emén chón nimanaw, are chón solá, are chón féfféringaw, are chón angolong lón manawen ekkewe ekkóch.
16 Nge iká emén epwe kúna riáfféú pokiten i emén Chón Kraist, esap sáw ren, nge epwe fen sópweeló le elingaaló Kot ren an manaweni manawen emén Chón Kraist.
17 Pún iei ewe fansoun mi kefililó fán iten ewe kapwúng epwe poputá lón imwen Kot. Iwe, iká epwe akkomw poputá wóóch, epwe met sópwólóón chókkewe rese álleasochisi ewe kapas allimen Kot?
18 “Iká a weires án ekkewe aramas mi pwúng repwe kúna manaw, iwe, epwe ifa ussun ren ekkewe aramas rese silei Kot me ekkewe chón tipis?”
19 Ina minne, chókkewe mi kúna riáfféú pokiten ar féri letipen Kot repwe sópweeló le féfféri minne mi múrinné me onómu pwisin iir lepéún ewe Chón Féraatá mi túppwél.
