Néún Jon Oruuen Taropwe 1:1-13
1 Ngang ewe mwán mi chinnap me úa mak ngonuk. Úa mak ngonuk, ewe fefin mi fil me ren Kot, me ngeni noum kewe. Úa wesewesen tongekemi, nge esap chék ngang pwe pwal meinisin chókkewe mi silei ewe asukul mi enlet,
2 pokiten ewe enlet a nónnóm lón letipach me epwe nónnóm tori feilfeiló.
3 Epwe nóm rech ewe kirekiréch mi somwoló, úméúméch, me kinamwe, fiti enlet me tong seni Kot ewe Sam me Jises Kraist, Néún we.
4 Úa fókkun pwapwa pokiten úa silei pwe ekkóch me lein noum kewe ra feffetál lón ewe enlet, ussun chék met ewe Sam a allúkú ngenikich.
5 Iwe iei úa tingoreek fefin, pwe sipwe tongfengen. (Esap eú allúk mi fé ei úa makkeei ngonuk, nge ewe chék allúk a nóm rech seni me lepoputáán.)
6 Iwe, iei weween tong, sipwe sópweeló le manaweni manawach me ren an kewe allúk. Iei ewe allúk ussun met oua fen rongorong me lepoputáán, pwe oupwe sópweeló ámi feffetál lón tong.
7 Pún a chómmóng chón otuputup ra pwá wóón fénúfan, chókkewe rese lúkú pwe Jises Kraist a feito lón pekin futuk. Emén mi féri ei, i ewe chón otuputup me ewe chón ú ngeni Kraist.
8 Oupwe túmúnúkemi pwe esap péút senikemi ekkewe mettóch áúa fen anganga. Iká ina, oupwe angei meinisin ekkewe feiéch Kot a ammólnatá fán itemi.
9 Emén ese fiti met Kraist a eáni káit me a eáni asukul minne mi sókko seni, Kot ese tipeeú ngeni. Nge ewe emén mi sópweeló le fiti án Kraist kewe asukul, ewe Sam me ewe Naw ra tipeeú ngeni.
10 Iká emén a etto remi nge an asukul ese tipeeú ngeni minne Kraist a asukula, ousap etiwa lón imwemi are kapwong ngeni.
11 Pún iká emén a kapwong ngeni, i a álisaatá lón an féffér mi ngaw.
12 Ikáámwo mi wor chómmóng met úa mochen erenikemi, nge úse mochen makkeetiw lón taropwe. Úa áneán pwe úpwe ló remi pwe úpwe pwisin kapas ngenikemi nge sipwe nennefengen, pwe epwe unus ámi pwapwa.
13 Néún pwiium we, ewe mi filitá, ra tiinaaló ar kapwong ngonuk.
