Néún Piter Oruuen Taropwe 1:1-21
1 Ngang Simon Piter, emén néún Jises Kraist aposel me chón angang. Úa mak ngenikemi ámi chókkewe mi angei ewe káit mi enlet me aúchea, ewe áúa pwal angei. Kich meinisin sia angei ena pokiten ewe pwúng án Kot me Jises Kraist ach Chón Amanaw:
2 Amwo epwe lapóló remi ewe kirekiréch mi somwoló me kinamwe ren ámi silei ewe sile mi pwúng ussun Kot me Jises ach Samol,
3 pún án Kot we manaman mi fel a fangoto meinisin met mi lamot ngenikich pwe sipwe eáni eú manaw mi fich ngeni Kot ren ewe sile mi pwúng ussun ewe Emén mi kérikich ren an ling me pwúng.
4 Ren ekkena mettóch, a fang ngenikich ekkewe pwon mi aúchea me fókkun lapalap, pwe ren ekkena mettóch oua tongeni pwal eti Kot lón an ling. A féri ena pokiten sia fen sú seni ei fénúfan mi limengaw ren mocheniangaw.
5 Iei popun, oupwe fókkun achocho le apacha ngeni ámi lúkú pwúng, ngeni ámi pwúng sile,
6 ngeni ámi sile nemeni pwisin mochenimi, ngeni ámi nemeni pwisin mochenimi likiitú, ngeni ámi likiitú manaw mi fich ngeni Kot,
7 ngeni ámi manaw mi fich ngeni Kot tongen pwipwi, ngeni ámi tongen pwipwi tongei aramas meinisin.
8 Iká a wesewesen nóm remi ekkena napanap me ra chék lallapoló, oupwe áeá ámi sile mi pwúng ussun ach Samol Jises Kraist pwe oupwe uwaéch me ousap chipwang.
9 Pún ié ese nóm ren ekkena mettóch, i emén mi chuun, a émméúrú mesan seni saram, me a ménúki pwe a fen liméch seni ekkewe tipis a féri me lóóm.
10 Ina minne, ámi pwii kana, pokiten oua fen ké me kefil me ren Kot, oupwe achocho pwe oupwe chék fich ngeni. Iká oua sópweeló le féri ekkena mettóch, iwe ousap fókkun sópwongaw.
11 Ren enletin, iká oua féri ena, oupwe kúna watteen feiéch me oupwe tolong lón ewe Mwú esemuch, Mwúún ach Samol me Chón Amanaw Jises Kraist.
12 Iei popun, úa mochen ákkáchchema ngenikemi ekkeei mettóch inaamwo iká oua fen sileer me núkúchar lón ewe enlet oua silei.
13 Nge me rei, a pwúng ái úpwe áchchemasefálli ngenikemi ekkeei mettóch atun úa inisini inisin aramas.*
14 Pún úa silei pwe úpwe chék nónnóm lón ei inis* ren ekis fansoun, ussun met ach Samol Jises Kraist a fen affata ngeniei.
15 Úpwe achocho úkúúkún ái tufich fansoun meinisin, pún oupwe tongeni chemeni ekkeei mettóch mwirin ái feiló.
16 Lupwen áúa esile ngenikemi ewe manaman me warotoon ach Samol Jises Kraist, ese lóngólóng wóón pwóróus mi chofona aramas ra chék kefisitá, nge a lóngólóng wóón ám pwisin kúna ren mesem an ling mi amwarar.
17 Pún Kot Seman we a ngeni itéch me ling. A fis ena, atun ewe popun ling mi lapalap a ereni ekkeei kapas: “Iei i nei Át, ewe mi áchengicheng, ewe úa pwapwa ren.”
18 Ewer, áúa rong ekkena kapas seni láng atun áúa nóm ren wóón ewe chuuk mi pin.
19 Ina popun, a lapóló ám lúkúlúk pwe ekkewe oesini repwe pwénúetá. A mmen múrinné ámi aúselingéch ngeni ekkena oesini mi ussun eú lamp mi asarama lón eú leeni mi kiroch, weween lón letipemi, tori tétáán akkar me pwáán fúú rán.
20 Pún oua silei pwe ese wor oesini lón ewe Taropwe mi Pin a feito seni ekiekin aramas.
21 Pún ese wor oesini mi pop seni letipen aramas, nge aramas ra apasa kapas seni Kot atun ra nóm fán emmwenien ewe ngún mi fel.
