Néún Jon Aúlúngátin Taropwe 1:1-14
1 Ngang ewe mwán mi chinnap, úa mak ngonuk áchengicheng Kaius, úa enletin tongeek.
2 En pwii mi áchengicheng, úa iótek pwe kopwe meefi péchékkúl, me mettóch meinisin lón manawom epwe sópwósópwoló múrinnéén.
3 Úa fókkun pwapwa atun pwiich kewe ra etto me erá pwe ka sópweeló óm túppwél lón ewe enlet atun ka feffetál lón ewe enlet.
4 Ese wor och pwapwa epwe lap seni ei pwapwa úa meefi ren ái silei pwe nei kewe ra feffetál lón ewe enlet.
5 En pwii mi áchengicheng, ka pwáári óm túppwél lón minne ka féri ngeni pwiich kewe inaamwo iká kese sissileer.
6 Ra ereni chón ewe mwichefel ussun óm tong. Atun repwe ló, kese mochen kopwe álisiir lón ewe napanap mi fich me ren Kot.
7 Pún ra sáifeil ar repwe afalafal fán ásengesin itan we, nge rese angei och mettóch seni aramasen ekkewe mwú.
8 Ina minne, wisach ach sipwe awasélaéchú ekkena sókkun aramas pwe sipwe tongeni wiliiti chiechier lón ach angang lón ewe enlet.
9 Úa makkeei och mettóch ngeni ewe mwichefel, nge Tiotrefes, ewe mi efich an epwe chék akkomw me leir, ese súfélitikem me ese etiwa minne áúa apasa.
10 Ina minne, iká úpwe etiló remi, úpwe pwáraaló minne a féri, a achéúfetálei ekkewe pwóróus mi ngaw fán item. Ese menemenéch ren ena, a pwal ésúfélúngawa pwiich kewe me ese mochen etiwer. A pwal sótun eppeti chókkewe mi mochen etiwer, me atorowu seni ewe mwichefel.
11 En pwii mi áchengicheng, kosap áppirú minne mi ngaw nge kopwe áppirú minne mi múrinné. Emén mi féri minne mi múrinné a popu seni Kot. Nge emén mi féri minne mi ngaw ese silei Kot.
12 Temetrius, a iteúéch me rer meinisin me an manaweni manawan a tipeeú ngeni ewe enlet. Ren enletin, pwal ám áúa pwáraatá ussun i me ka silei pwe minne áúa pwáraatá mi enlet.
13 A chómmóng met úa mochen mak ngonuk ussun, nge úse mochen makkeetiw lón taropwe.
14 Iwe nge, úa áneán pwe ekiseló chék úpwele kúnók me sipwele pwóppwóróusfengen.
Amwo kinamwe epwe nónnóm reom.
Chienach keei ra tiinaaló ar kapwong ngonuk. Kopwe ngeni emén me emén chienach kana ái kapwong.
