Minne Ekkewe Aposel Ra Féri 21:1-40
21 Mwirin ám ló seniir fán osenimu me sáiló wóón mataw, áúa sái weneweneló me tikeri Kos, iwe lón ewe rán mwirin Rotes, me seni ikena, ngeni Patara.
2 Lupwen áúa kúna efóch siip epwele sáiló ngeni Finisia, áúa tétá wóón me ló.
3 Áúa kúna ewe fénú Saipros me lepelieméngúm, nge áúa chék onuchchang seni me sáiló ngeni Siria me ineiti Tair, ikewe ia ewe siip epwe etiwaatiw osan kewe ie.
4 Áúa kútta me kúna ekkewe chón káé me áúa nómotiw ikena úkúúkún fisu rán. Nge me ren ewe ngún mi fel ra ekkereni Paul an esap ipwelong lón Jerusalem.
5 Iwe, lupwen a tori fansoun ám áúpwele feiló, áúa poputá le sái, nge meinisin iir fitifengen me ekkewe fefin me semirit, ra fitikemiló tori lúkún ewe telinimw. Iwe, mwirin ám fótopwúkútiw wóón ewe ppi, áúa iótek.
6 Áúa kapwongfengen, mwirin áúa tétá wóón ewe siip, nge iir ra liwiniti imwer.
7 Iwe, áúa ló seni Tair wóón ewe siip me ineiti Ptolemais. Áúa kapwong ngeni chienem kewe chón lúkú me áúa nómotiw rer eú rán.
8 Lón ewe rán mwirin, áúa ló me tori Seseria. Iwe, áúa tolong lón imwen Filip, ewe chón esilefeili pwóróus allim, i emén me lein ekkewe fúmén mwán, me áúa nómoló ren.
9 Ei mwán, a wor fémén néún fépwúl rese pwúpwúlú,* ra kan osuni.
10 Nge mwirin ám nónnóm ikena ren chómmóng rán, emén soufós itan Akapus a feitiw seni Jutia.
11 Iwe, a feito rem me angei án Paul we penit me fééti ngeni pwisin pechen me péún me apasa: “Iei met ewe ngún mi fel a apasa, ‘Epwe iei ussun án ekkewe chón Jus lón Jerusalem repwe fééti ewe mwán minne ká an ei penit, me repwe atolonga i lepéún aramasen ekkewe ekkóch mwú.’ ”
12 Iwe, lupwen áúa rong ei, ám me chókkewe mi nóm ikena áúa poputá le tingormaw ngeni an esap feitá Jerusalem.
13 Mwirin, Paul a pélúweni: “Met ei oua féri ren ámi kechiw me sótun apwangapwangaaló letipei? Ngang úa fen mmólnetá esap chék ái úpwe féfé nge ái úpwe pwal máló lón Jerusalem fán ásengesin iten ewe Samol Jises.”
14 Lupwen áúa kúna pwe áúse tongeni siwili ekiekin, áúa úkútiw le eppeti* me áúa apasa: “Letipen Jiowa* epwe fis.”
15 Iwe, mwirin minne a fis, áúa ammólnatá ám sái me poputá le feiló ngeni Jerusalem.
16 Ekkóch me lein ekkewe chón káé seni Seseria ra pwal fitikem, ra uweikemiló ren Manason seni Saipros, emén chón káé lóóm minne imwan ewe áúpwe waséla lón.
17 Lupwen áúa tori Jerusalem, pwiim kewe ra etiwakem fán pwapwa.
18 Nge lón ewe rán mwirin, Paul a fitikem le ló ren Jemes, me meinisin ekkewe mwán mi ásimaw ra nóm.
19 Iwe, a kapwong ngeniir me apwóróusa ngeniir meinisin ekkewe mettóch Kot a féri lein aramasen ekkewe ekkóch mwú me ren an angangen afalafal.
20 Mwirin ar rong ei, ra poputá le elingaaló Kot, nge ra apasa ngeni i: “Pwii, ka kúna pwe mi wor fitengeréú chón lúkú lein ekkewe chón Jus, me iir meinisin ra tinikken fán iten ewe Allúk.
21 Nge ra rong án aramas fósum pwe ka asukula ngeni meinisin ekkewe chón Jus lein ekkewe ekkóch mwú pwe repwe ú ngeni ekkewe allúkún Moses, ka ereniir ar resap sirikomsaisi néúr kewe are fiti pwúngún ekkewe ééreni.
22 Iwe met sipwe féri? Repwe chék fókkun rong pwe ka war.
23 Ina minne, kopwe féri met áúpwe erenuk: A wor rem fémén mwán ra onómu pwisin iir fán eú pwon.
24 Kopwe uwei ekkeei mwán me fitiir le féri angangen elimelim me ren ewe Allúk me méénatiw liiwiniir, pwe repwe tongeni ráisénaaló mékúrer. Mwirin, meinisin repwe silei pwe ese pwúng ewe pwóróus ra apwóróusa ussumw, nge óm féffér a múrinné me ka pwal álleasochisi ewe Allúk.
25 Nge ren ekkewe chón lúkú mi nóm lein aramasen ekkewe ekkóch mwú, sia tiinaaló ngeniir lón taropwe minne sia apwúngaló, ussun ar repwe atowauereló seni met mi piin asor ngeni uluulun, pwal seni chcha, seni man mi máán ffór,* me seni lisowumwáál.”*
26 Iwe, lón ewe rán mwirin, Paul a uwei ekkewe mwán me a etiir le féri ewe angangen elimelim me ren ewe Allúk, me a feiló lón ewe imwenfel pwe epwe esileló ineet ránin ewe angangen elimelim epwe wesiló pwe ewe souasor a tongeni isettá eú asor fán iten emén me emén leir lón ena rán.
27 Lupwen epwele muchúló ekkewe fisu rán, iwe ekkewe chón Jus seni Eisia mi kúna i me lón ewe imwenfel ra asongaatá unusen ewe mwichen aramas, me ra turufi i,
28 ra púchér me apasa: “Ámi re Israel, oupwe álillis! Iei i ewe mwán mi asukula aramas meinisin ekis meinisin ar repwe ésúfélúngawa néúch aramas me ach we Allúk me ei leeni. Nge pwal och, a pwal mwo nge uweato chón Krik lón ei imwenfel me elimengawaaló ei leeni mi pin.”
29 Pún me akkomwan, ra kúna Trofimus ewe re Efisus an fiti Paul me lón ewe telinimw, iwe ra ekiekieló pwe i a uweato lón ewe imwenfel.
30 Lón unusen ewe telinimw a fókkun osukosuk, me ekkewe aramas ra ssáppékúto me turufi Paul me átekinawu lúkún ewe imwenfel, me mwittir chék ra éppúngaaló ekkewe asam.
31 Atun ra sótuni le nieló i, ewe meilapen mwichen soufiu a rong pwe unusen Jerusalem a nóm lón watteen fitikoko.
32 Iwe, a mwittir angei ekkewe soufiu me ekkewe meilapen soufiu me ra ssátiw rer. Atun ra kúna ewe meilapen mwichen soufiu me ekkewe soufiu, ra kaúló le awata Paul.
33 Iwe, ewe meilapen mwichen soufiu a feiliiti me aresini me allúkú pwe epwe féfé ngeni ruuofóch sein. Mwirin, a eis iká i ié me met i a féri.
34 Nge ekkóch me lein ekkewe aramas ra poputá le púchérútá me apasa och, nge ekkewe ekkóch pwal och. Iwe, pokiten ese tongeni silei enletin ren ewe fitikoko, i a allúk pwe repwe uwealó i ren ewe imwen soufiu.
35 Nge lupwen a tori ekkewe laté, a lamot ekkewe soufiu repwe eki pokiten ewe féfférún akkachofesá án ekkewe aramas,
36 pún eú mwichemmóngun aramas a tiiniir me lúkúsékúrúr, me apasa fán léúwommóng: “Oupwe nieló i!”
37 Lupwen repwele uwealó Paul lón ewe imwen soufiu, i a ereni ewe meilapen mwichen soufiu: “Mi mumutá ái úpwe erenuk och mettóch?” I a apasa: “Ka tongeni kapas lón kapasen Krik?
38 Esap en ewe chón Isip, ewe mi poputááni eú angangen ú ngeni mwú me emmwenawu ekkewe 4,000 mwán* seni lón ewe fénúapé lón ekkewe fansoun ra ló?”
39 Mwirin, Paul a apasa: “Ren enletin, ngang emén re Jus seni Tarsus lón Silisia, emén chón wiliposun ewe telinimw mi iteféúló. Úa tingormaw ngonuk óm kopwe mut ngeniei ái úpwe kapas ngeni ekkewe aramas.”
40 Mwirin an a mutatá, Paul a útá wóón ewe laté, a pomwe ngeni ekkewe aramas pwe repwe fanafaneló. Atun a fókkun mosonoson, i a kapas ngeniir lón kapasen Ipru, a apasa:
Footnote
^ Krik, “resaamwo tori mwán.”
^ Krik, “áúa fanafaneló.”
^ Are “met mi ninniiló nge ese késúrúló chchaan.”
^ Are “mwán mi uwou ssaar.” Krik, Si·ka′ri·oi.
