Minne Ekkewe Aposel Ra Féri 8:1-40
8 Nge Saul a tipeeú ngeni ninniilóón.
Lón ena ránin, a fis watteen eriáfféú ngeni ewe mwichefel lón Jerusalem. Meinisin ra toropasfeil lón unusen ekkewe fénú Jutia me Sameria, lúkún chék ekkewe aposel.
2 Nge ekkewe mwán mi angang ngeni Kot ra uwealó Stifen ar repwe peiásini i, me ra fókkun chúúpwúl fán itan.
3 Iwe nge, Saul a poputá le eriáfféwú ewe mwichefel. A kan tolong lón eú me eú imw, átekinawu ekkewe mwán me fefin me otururelong lón imwen kalapus.
4 Iwe nge, chókkewe mi toropasfeil ra fetálfeil lón ewe fénú me afalafala ewe kapas allim ussun ewe kapasen Kot.
5 Iwe, Filip a feitiw ngeni ewe telinimw* Sameria me poputá le afalafala ngeniir ussun ewe Kraist.
6 Iir meinisin ekkewe aramas ra aúselingéch ngeni met Filip a apasa atun ra aúseling ngeni me katol ekkewe esissil a féri.
7 Pún chómmóng mi wor ngún mi limengaw wóór, me iir ra púchér fán léúwommóng me towu seniir. Pwal och, chómmóng mi peeló inisiir me pechemá ra chikar.
8 Iwe, a wor watteen pwapwa lón ena telinimw.
9 Lón ena telinimw, a wor emén mwán itan Simon, ewe me mwan a kan féfféri angangen roong me aramasen Sameria ra mwaar ren, a kan erá pwe i emén mi tekia.
10 Iir meinisin, seni aramas mi kis tori aramas mi lap, ra aúselingéch ngeni me apasa: “A nóm ren ei mwán ewe manamanen Kot mi lap.”
11 Iei minne, ra aúselingéch ngeni, pún a ttam fansoun an féri ar repwe mwaar ren an angangen roong.
12 Nge lupwen ra lúkú Filip, ewe mi afalafala ewe kapas allim ussun ewe Mwúún Kot me ussun ewe it Jises Kraist, mwán me fefin ra papatais.
13 Simon a pwal wiliiti emén chón lúkú, me mwirin an papatais, a sópweeló le fiti Filip. Iwe, a mwaar atun a kúna ekkewe esissil me manaman mi fiffis.
14 Lupwen ekkewe aposel lón Jerusalem ra rong pwe ekkewe aramas lón Sameria ra etiwa ewe kapasen Kot, ra tiinaaló rer Piter me Jon.
15 Iwe, ra feitiw me iótekiir pwe repwe angei ewe ngún mi fel.
16 Pún ese mwo feitiw wóón emén me leir, nge ra papatais chék lón iten ewe Samol Jises.
17 Iwe, ra isettá péúr wóór, me ra poputá le angei ngún mi fel.
18 Lupwen Simon a kúna pwe chókkewe ekkewe aposel ra isettá péúr wóór ra angei ngún mi fel, iwe, a pwon pwe epwe ngeni ekkewe aposel moni,
19 a apasa: “Oupwe pwal ngeniei ei manaman, pwe ewe emén úpwe isettá pei wóón epwe angei ngún mi fel.”
20 Nge Piter a ereni: “Amwo noum na moni epwe etuk le máló, pokiten ka ekieki pwe ka tongeni angei ren moni án Kot we liffang ese kamé.
21 Esap wor kinikinum are inetum lón ei angang, pún letipom ese wenechar mwen mesen Kot.
22 Ina minne, kopwe áier seni óm ei ekiek mi ngaw, me kopwe tingormaw ngeni Jiowa* pwe epwe omusaaló ekiekin letipom na mi fókkun ngaw, iká pwe mi tufich.
23 Pún úa kúna pwe en ussun poison me emén slave ngeni minne ese pwúng.”
24 Lón án Simon pélúweni, a ereniir: “Oupwe tingormaw ngeni Jiowa* fán itei pwe esap wor och me lein ekkena mettóch oua apasa epwe fis ngeniei.”
25 Iwe, atun ra áweséchúoló ar pwáraatá me afalafala án Jiowa* we kapas, ra poputá le liwin ngeni Jerusalem, me ra afalafala ewe kapas allim lón chómmóng sópwun chón Sameria.
26 Iwe nge, néún Jiowa* we chónláng a fós ngeni Filip, a apasa: “Kopwe útá me feiló ngeni peliéér wóón ewe al mi aletiw seni Jerusalem ngeni Kasa.” (Iei efóch al lón fénúpéén.)
27 Iwe, a útá me feiló, me nengeni! emén iunók* chón Itiopia, emén mwán mi wor an nemenem fán Kandeisia, ewe kiwinen Itiopia, me a wisen túttúmúnú meinisin pisekin neminna kewe mi aúchea. I a feiló fel lón Jerusalem,
28 nge iei a liwin me a móót wóón waan we woken, a léúwommóng le ákkálleani puken ewe soufós Aisea.
29 Iwe, Kot a ereni Filip me ren an we manaman: “Kopwe feiló me kkan ngeni ei woken.”
30 Filip a ssáló únúkkún me a rong an ákkálleani puken ewe soufós Aisea, iwe a ereni: “En mi wesewesen silei* met ena ke álleani?”
31 A apasa: “Ifa ussun úpwe silei iká pwe ese wor emén a emmweniei?” Ina minne, a pesei Filip an epwe tétá me móót ren.
32 Iei ewe kinikin lón ewe Taropwe mi Pin a ákkálleani: “I a ussun emén siip mi kekiiló ngeni ewe leenien ninniiló, me ussun emén nieniféén siip mi chék fanafaneló me mwen ewe chón fichi únan, i ese suuki awan.
33 Atun a kúna ássáwan, i ese kúna apwúng mi pwúng. Pokiten epwe móróló seni fénúfan, ié epwe apwóróusa tichikin pwóróusen manawan?”
34 Iwe, ewe iunók a ereni Filip: “Kese mochen ereniei, ié ewe soufós a kapas ussun? Ussun pwisin i are ussun pwal emén?”
35 Filip a poputá le kapas, me a poputá me wóón ei wokisin le apwóróusa ngeni ewe kapas allim ussun Jises.
36 Iwe, atun ra sássááló wóón ewe al, ra sereni eú watteen konik, me ewe iunók a apasa: “Nengeni! A wor konik ikeei, met a eppetiei ái úpwe papatais?”
37 * ——
38 Iwe, a allúkú pwe ewe woken epwe kaúló, iwe Filip me ewe iunók ra tétiw lón ewe konik, me a papataisi i.
39 Atun ra liwintá me lón ewe konik, án Jiowa* we manaman a mwittir uwealó Filip, me ewe iunók ese chúen kúna i, nge a feiló fán an pwapwa.
40 Iwe nge, Filip a feiló lón Astot me a fetálfeil lón unusen ewe leeni me sópweeló le afalafala ewe kapas allim ngeni meinisin ekkewe telinimw tori an a tikeri Seseria.
