Eú Pwáraatá Ngeni Jon 17:1-18
17 Emén me lein ekkewe fúmén chónláng mi wor rer ekkewe fisu sepi a etto rei me apasa: “Kopwe feito, úpwe pwáár ngonuk kapwúngún ewe fin lisowu mi iteféúló, ewe mi mómmóót wóón chómmóng konik,
2 ewe ekkewe kingen fénúfan ra lisowumwáál* ngeni, me ekkewe aramasen fénúfan ra sakawoló ren wainen an féfférún lisowumwáál.”*
3 Iwe, ren manamanen ewe ngún mi fel, ewe chónláng a uweieiló ngeni ewe fénúpéén. Me úa kúna emén fefin mi móót wóón emén manmwacho mi parochól mi ur ren sókkun it mi turunufasa Kot me a wor fisu mékúran me engol mecháán.
4 Ewe fefin a úféúf eché úf mi forket me parochól, me a foutei ngeni kolt me faw aúchea me féún lón pwei, me a kémwéch eú kap kolt mi ur ren ekkewe mettóch mi ánnioput me limengawen an féfférún lisowumwáál.
5 Nge wóón chamwan, a mak eú it mi monomon: “Papilon mi Lapalap, inelapen ekkewe fin lisowu me ekkewe mettóch mi ánnioput wóón fénúfan.”
6 Me úa kúna pwe ewe fefin a sakawoló ren chchaan ekkewe chón pin me chchaan ekkewe chón pwáraatá ussun Jises.
Lupwen úa kúna neminna, úa fókkun máirú.
7 Ina minne, ewe chónláng a ereniei: “Pwata ka máirú? Úpwe áweweei ngonuk weween monomonun ewe fefin me ewe manmwacho a wawa, ewe mi wor fisu mékúran me engol mecháán:
8 Ewe manmwacho ka kúna a fen nóm me mwan, nge iei ese chúen nóm, nge ekiseló chék epwele feitá me lón ewe apis, me epwele feiló ngeni kitetter. Me ekkewe aramas wóón fénúfan, iir kewe ese mak iter lón ewe puken iten chón manaw seni ewe atun aramas ra uputiw wóón fénúfan, repwe máirú atun repwe kúna ifa ussun ewe manmwacho mi nóm me mwan, nge iei ese chúen nóm, nge epwele war.
9 “A lamot emén epwe tipáchem pwe epwe tongeni weweiti ei: Ekkewe fisu mékúr ra wewe ngeni ekkewe fisu chuuk ewe fefin a móót wóór.
10 Me a pwal wor fúmén king: Nimmén me leir ra fen turutiw, emén a chúen nóm, nge ewe pwal emén esaamwo war, nge lupwen epwe war, epwe nónnóm ren ekis chék fansoun.
11 Nge ewe manmwacho mi nóm me mwan nge iei ese chúen nóm, i ewe awaliménún king, nge a feito seni ekkewe fúmén king, me epwe ló ngeni kitetter.
12 “Ekkewe engol mechá ka kúner, ra wewe ngeni engol king resaamwo nemenem, nge repwe angei ar manamanen king le fiti ewe manmwacho le nemenem ren úkúúkún eú awa.
13 Ekkena engol king ra eáni eú chék ekiek, ina minne ra ngeni ewe manmwacho an péchékkúl me an pwúúng le nemenem.
14 Iir repwe maun ngeni ewe Laam, nge pokiten ewe Laam i Samolun ekkewe samol me Kingen ekkewe king, i epwe okkufuur. Pwal och, chókkewe mi fiti, iir kewe mi ké me fil me túppwél repwe pwal okkufuur.”
15 A ereniei: “Ekkewe konik ka kúna, ia ewe fin lisowu a mómmóót ie, ra wewe ngeni mwichen aramas, aramasen ekkewe ekkóch mwú, me kapas.
16 Nge ekkewe engol mechá ka kúna me ewe manmwacho, repwe oputa ewe fin lisowu. Repwe angei seni neminna meinisin mettóchun me likitaaló lón an seleló, me repwe ocheei futukan me unusen kenaaló ren ekkei.
17 Pún Kot a atolonga lón letiper ar repwe apwénúetá an ekiek. Iir meinisin ra eáni eú chék ekiek, ina ar fang ngeni ewe manmwacho an pwúúng le nemenem tori ewe atun epwe pwénúetá minne Kot a apasa.
18 Nge ewe fefin ka kúna, a wewe ngeni ewe telinimw mi lap, ewe a wor an nemenem wóón ekkewe kingen fénúfan.”
