Eú Pwáraatá Ngeni Jon 21:1-27
21 Iwe, úa kúna eú láng mi fé me eú fénúfan mi fé, pún ewe láng minen akkomw me ewe fénúfan minen akkomw ra móróló, me ewe mataw ese chúen nóm.
2 Úa pwal kúna ewe telinimw mi pin, ewe Jerusalem mi Fé, a feitiw seni láng me ren Kot me a mmólnetá ussun emén fin apwúpwúlú lón foutan pwe epwe etiwa pwúlúwan we.
3 Mwirin úa rong eú méngúngú mi léúwommóng a feito seni ewe leenien móótun king, a apasa: “Nengeni, ewe imwenfelin Kot a nóm lein aramas. I epwe nónnóm rer me iir repwe néún aramas, me Kot epwe pwisin nónnóm rer.
4 I epwe télúpwásei iteiten chénún maas seni wóón meser, me esap chúen wor máló, are letipeta, are kechiw, are metek. Ekkewe mettóchun lóóm ra móróló.”
5 Iwe, ewe Emén mi móót wóón ewe leenien móótun king a apasa: “Nengeni, ngang úa aséfésefáli mettóch meinisin.” A pwal apasa: “Kopwe makkeetiw ei, pún ekkeei kapas ra alúkúlúk* o enlet.”
6 Iwe a apasa ngeniei: “A wesiló! Ngang ewe Alfa me ewe Omeka,* ewe poputáán me ewe sópwólóón. Ié mi kaka, úpwe éúnú ngeni ewe konik seni lón ewe puwachen konikin manaw nge esap mééni.
7 Ié mi pworacho, epwe álemwiri ekkeei mettóch, me ngang úpwe an Kot me i epwe nei.
8 Nge ren ekkewe mi nissimwa me ekkewe ese wor ar lúkú me ekkewe mi limengaw me annou me ekkewe chón nimanaw me ekkewe chón lisowumwáál* me chón féri angangen roong me chón fel ngeni uluulun me chón chofona meinisin, repwe kóturulong lón ewe nómun ekkei mi ngetenget ren ekkei me primiston. Iei ewe oruuen máló.”
9 Emén me lein ekkewe fúmén chónláng fán ekkewe fisu sepi mi ur ren ekkewe fisu sáingoon feiengaw a feito me apasa ngeniei: “Kopwe feito pwe úpwe áiti ngonuk ewe fin apwúpwúlú, pwúlúwen ewe Laam.”
10 Iwe, ren manamanen ewe ngún mi fel a uweieiló ngeni eú chuuk mi watte me tekia, me a ékúna ngeniei Jerusalem, ewe telinimw mi pin, mi feitiw seni láng me ren Kot
11 me a saramaram ren lingen Kot. Meriweriwan a ussun eféú faw mi fókkun aúchea, ussun ewe faw itan jasper mi meriweriw ussun kúrúffaten kristal.
12 A wor eú ttitin mi fókkun watte me tekia fiti 12 asamalapan, nge a wor emén chónláng ren eú me eú ekkena asamalap, me a mak wóón ekkena asamalap iten ekkewe 12 einang, néún Israel.
13 A wor úlúngát asamalap peliéétiw, úlúngát asamalap peliefeng, úlúngát asamalap peliéér, me úlúngát asamalap me notou.
14 A wor 12 féún lóngólóngun ttitin ena telinimw, me a nóm wóór iten néún ewe Laam kewe 12 aposel.
15 Iwe, ewe emén mi fós ngeniei a kémwéch efóch wok seni kolt ussun efóch minen aúkúk pwe epwe aúkú ewe telinimw me asamalapan kewe me ttitin we.
16 A wor rúáánú pwokukuun ewe telinimw, nge langattaman me chélapan ra chék lélléfengen. Iwe, a aúkú ewe telinimw ren efóch wok, me a kúna pwe langattaman me chélapan me tekian úkúúkún 12,000 stadia,* pún iir meinisin ra chék léllé.
17 A pwal aúkú ewe ttit, 144 sengen paw,* ina án emén aramas aúkúk me pwal ina án emén chónláng aúkúk.
18 Ewe ttit a ffér seni jasper, nge ewe telinimw a ffér seni kolt mi fókkun múrinné ussun kilaas mi kúrúffat.
19 Lóngólóngun ttitin ewe telinimw ra afout ngeni sókkun faw aúchea meinisin. Ewe áeféún lóngólóng jasper, ewe arúúéféún safair, ewe aúlúféún kalsetoni, ewe aféféún emeralt,
20 ewe enifféún sartoniks, ewe awonoféún sartius, ewe afúféún krisolait, ewe awanúféún peril, ewe etiweféún topas, ewe áengolun krisopres, ewe engol me áeféún jasint, ewe engol me arúúéféún ametist.
21 Pwal och, ekkewe 12 asamalap ra ffér seni 12 féún lón pwei. Eú me eú ekkena asamalap ra ffér seni eféú me eféú féún lón pwei. Nge ewe alelap lón ena telinimw, seni kolt mi fókkun múrinné, a kúrúffat ussun kilaas.
22 Úse kúna eú imwenfel me lón na telinimw, pún an imwenfel, ina Jiowa* Kot ewe mi Unusen Manaman, me pwal ewe Laam.
23 Ese lamot án akkar are maram epwe ttinetiw wóón ewe telinimw, pún lingen Kot a asarama, nge ewe Laam ina néún lamp.
24 Iwe, aramas repwe fetál lón saraman, me ekkewe kingen fénúfan repwe elingaaló.
25 Asamalapan kewe resap kesipeló unusen rán, pún esap chúen wor pwiin ikena ie.
26 Me repwe uweato lón ewe telinimw lingen me itéchún ekkewe mwú.
27 Nge esap wor och mettóch mi limengaw are emén mi féri minne mi annou me otuputup epwe tolong lón ena telinimw, chilóón chék chókkewe mi mak iter lón néún ewe Laam we puken manaw.
Footnote
^ Krik, “túppwél.”
