Ngeni Ekkewe Chón Efisus 2:1-22
2 Pwal och, Kot a fen amanawakemi inaamwo iká oua fen máló pokiten ámi pupungaw me tipis,
2 ekkewe oua féfféri me lóóm, atun oua manaweni ewe esin manaw ei fénúfan a eáni.* Oua nóm fán nemenien ewe sounemenemen ásepwál, ewe mi etipetipa aramas, ewe ngún mi angang iei lón ekkewe mi álleasolap.
3 Ewer, me lóóm kich meinisin sia pwal ussun chék iir le manaweni ewe manaw mi tipeeú ngeni mochenin futukach, mi apwénúetá mochenin futukach me ekiekich, me seni leuputiwach a fichiitikich án Kot song ussun chék aramas meinisin.
4 Nge pokiten án Kot úméúméch mi somwoló me watteen an tong ngenikich,
5 a amanawakich me etipeeúfengenikich me ewe Kraist, pwal mwo nge atun sia máló ren ach pupungaw. Iwe, ren an kirekiréch mi somwoló, oua kúna manaw.
6 Pwal och, i a amanawakichetá me ammóttakich lón ekkewe leeni lón láng pwe kich néún Kraist Jises chón káé,
7 pwe lón ewe ótóten fénúfan* epwe feito, epwe pwáári luluulóón an kirekiréch mi somwoló lupwen epwe féri ekkewe mettóch mi múrinné fán itach, kich néún Kraist Jises kewe chón káé.
8 Pokiten ei kirekiréch mi somwoló, oua kúna manaw ren ámi lúkú me esap ren minne oua pwisin féri, nge fen ina án Kot liffang.
9 Esap pokiten ekkewe angang pwe esap wor popun án emén epwe eingeing.
10 Kich férien Kot me pokiten kich néún Kraist Jises chón káé, sia fférútá fán iten angang mi múrinné, ewe Kot a fen efilaaló me mwan fán itach ach sipwe féri.
11 Ina minne, ámi aramasen ekkewe ekkóch mwú seni leuputiwemi,* oupwe chemeni pwe me lóóm oua iteni “rese sirikomsais” me ren chókkewe “mi sirikomsais,” ewe mi fis ren péún aramas.
12 Lón ena fansoun, ouse silei Kraist, oua imuuló seni ewe mwúún Israel, ouse kapachelong lón ekkewe pwonen etipeeú. Ese wor ámi ápilúkúlúk me ouse silei Kot lón ei fénúfan.
13 Nge iei, ámi chókkewe mi piin towawoló, pokiten oua néún Kraist Jises chón káé oua kkanoto ren chchaan ewe Kraist.
14 Pún i ach kinamwe, ewe emén mi féri án ekkewe ruu kúmi repwe chék eú me ataietiw ewe ttit mi refifesenniir.
15 Ren inisin* a áwesaaló ewe tipefesen, weween a amóeló ewe Allúkún Moses mi masou ren ekkewe allúk pwe epwe féri án ekkewe ruu kúmi mi tipeeúfengen lón pwisin i repwe eú chék aramas mi fé me epwe efisi kinamwe,
16 me epwe unusen áchásefálli ekkena ruu kúmiin aramas ngeni Kot ren ewe iráán ninni* pwe ekkena ruu kúmi repwe eú chék inis, pokiten an máló, i a amóeló ewe tipefesen lefiler.
17 Me a feito me afalafala ewe kapas allimen kinamwe ngeni ámi ekkewe ouse silei Kot, me kinamwe ngeni ámi ekkewe oua fen silei I.
18 Pokiten án Kraist we asor, a atufichi meinisin kich lón ekkeei ruu kúmi ach sipwe iótek ngeni ewe Sam lón láng pokiten kich meinisin sia angei ewe eú chék ngún mi fel.
19 Iwe iei, ámi ouse chúen chón ekis, nge oua chón wilipos ussun ekkewe chón pin me oua chón lón án Kot we famili,
20 me ámi oua kaútá wóón eú lóngólóng, weween ekkewe aposel me ekkewe soufós, nge Kraist Jises, i ewe féún lepwokuku mi fókkun aúchea.
21 Ena imw mi kaútá me meinisin kinikinin lón, ra fókkun tipeeúfengen. Me pokiten oua tipeeúfengen me Kraist, a kalapoló ngeni eú imwenfel mi káimuuló fán iten Jiowa.*
22 Pokiten oua tipeeúfengen lón Kraist, Kot a efisi pwe ámi fengen me ekkewe pwal ekkóch oupwe eú imw ikewe ia i epwe nónnóm ie, pokiten an we ngún a nóm ikena.
