Ngeni Chón Ipru 5:1-14
5 Pún emén mi kefilitá an epwe souasor mi lapalap, a angang fán iten aramas lón ekkewe mettóch mi riri ngeni ar fel ngeni Kot, pwe epwe tongeni eáni liffang me asor fán iten ar kewe tipis.
2 Pokiten i a pwal apwangapwang, iwe, a tongeni kirekiréch* ngeni ekkewe mi tipis pokiten rese silei minne mi pwúng,
3 me pokiten ena, a lamot an epwe pwal eáni asor fán iten pwisin tipisin, ussun chék met a féri fán iten ekkena aramas.
4 Ese wor emén a tongeni pwisin seikaatá an epwe souasor mi lapalap, Kot chék a tongeni féri ena, ussun chék met a féri ngeni Aaron.
5 Iwe, pwal ina ussun ren ewe Kraist, i ese elingaaló pwisin i ren an wiliiti emén souasor mi lapalap, nge a lingeló ren ewe Emén mi ereni: “En nei át, ikenái úa wiliiti semom.”
6 Ussun met a pwal erá lón eú ekkewe Taropwe mi Pin, “En emén souasor ussun chék Melkisetek me kopwe souasor tori feilfeiló chék.”
7 Atun Kraist a manaw wóón fénúfan, a eáni iótekin sié o tingormaw fán mwelian mi léúwommóng fiti ssúrún chénún mesan ngeni ewe Emén mi tufichin seláni seni máló, me an tingor a ketiw pokiten a niwokkusiti Kot.
8 Inaamwo iká i néún ena Emén, nge a káé álleasochis seni ekkewe mettóch a riáfféú ren.
9 Nge mwirin an a unuséch, meinisin chókkewe mi álleasochisi ra tongeni kúna manaw me eáni manaw esemuch ren i,
10 pún i a fen kefilitá me ren Kot an epwe emén souasor mi lapalap ussun chék Melkisetek.
11 A chómmóng met áúpwe apasa ussun i, nge a weires ám áúpwe áweweei pokiten iei oua wewemmang.
12 Pún itá iei nge oua fen wiliiti sense, nge iei a pwal lamot án emén epwe asukulasefáli ngenikemi ekkewe mettóch oua fen káé me mwan seni án Kot kapas. Oua wiliiti emén mi lamot ngeni milik, nge esap mwéngé péchékkúl.
13 Pún emén mi chék sópweeló le úkkún milik, ese tongeni weweiti án Kot kapas mi pwúng, pún i emén semirit.
14 Nge mwéngé péchékkúl, fán iten aramas mi ásimaw, chókkewe mi ákkáeá ar tufichin ekiek, iir kewe mi fen silei ifa ussun repwe álefila lefilen minne mi pwúng me minne mi mwáál.
Footnote
^ Are “tipepwetete.”
