Me ren Jon 10:1-42
10 “Enlet úpwe erenikemi, pwe iká emén ese tolong lón ewe ttitin siip me lón asaman we nge a té me lón pwal eú leeni, ena emén i chón solá me mi mwacho.
2 Nge ewe emén mi tolong me lón ewe asam i ewe chón mmasen siip.
3 Ewe chón mmasa ewe asam a suuk ngeni ei emén, me ekkewe siip ra aúseling ngeni léúwan. A kéri néún kewe siip ngeni iter me emmweniirewu lúkún.
4 Lupwen a atowu meinisin néún kewe siip, a akkomwoló mwer, me ra tattapweló mwirin, pún ra esilla léúwan.
5 Resap tongeni tapwei emén rese sissilei, nge repwe fen sú seni pún rese silei léúwen ena emén.”
6 Jises a apasa ngeniir ei kapas áwewe nge rese weweiti met a apasa ngeniir.
7 Iwe, Jises a apasasefálli: “Enlet úpwe erenikemi, ngang ewe asam fán iten ekkewe siip.
8 Meinisin chókkewe mi apasa pwe iir ewe chón mmasen siip mi enlet, iir chón solá me chón mwacho. Nge ekkewe siip rese aúseling ngeniir.
9 Ngang ewe asam. Ié a feito rei pwe epwe tolong lón ewe ttitin siip epwe kúna manaw, me ena emén epwe tolong me towu me kúnékún anan mwéngé.
10 Ewe chón solá esap feito iká esap solá me ninni me kata. Ngang úa feito pwe repwe manaw me eáni manaw mi somwoló.
11 Ngang ewe chón mmasen siip mi múrinné. Ewe chón mmasen siip mi múrinné a pennúkúóló manawan fán iten ekkewe siip.
12 Ewe emén mi mmasa ekkewe siip fán iten chék moni, esap i emén chón mmasen siip me esap néún ekkewe siip, a kúna emén wolif mi feffeito me a likitaaló ekkewe siip me súló—me ewe wolif a turufiir me atoropaseer—
13 pokiten a mmas fán iten chék moni, ese ekieki ekkewe siip.
14 Ngang ewe chón mmasen siip mi múrinné. Ngang úa silei nei kewe siip me nei kewe siip ra sileei,
15 ussun chék ewe Sam a sileei me ngang úa silei ewe Sam. Me úa pennúkúóló manawei fán iten ekkewe siip.
16 “Me a wor pwal ekkóch nei siip, esap iir seni ei ttitin siip. Úpwe pwal atolonga chókkana, me repwe aúseling ngeni léúwei, me repwe wiliiti eú mwichen siip fán emén chón mmasen siip.
17 Iei popun ewe Sam a tongeei, pún úa pennúkúóló manawei pwe úpwe angeisefáli.
18 Ese wor emén a angei seniei, nge úa pwisin pennúkúóló. A wor ái pwúúng* le pennúkúóló, me a wor ái pwúúng* le angeisefáli. Úa angei ei allúk seni Semei we.”
19 A pwal fis tipefesen lefilen ekkewe chón Jus pokiten ekkeei kapas.
20 Chómmóng me leir ra apasa: “A wor timon wóón me a umwes. Pwata oua aúseling ngeni?”
21 Ekkewe ekkóch ra apasa: “Emén mi wor timon wóón ese tongeni apasa ekkeei kapas. Emén timon ese tongeni ánennelóói mesen aramas mi chuun, iká met?”
22 Lón ena atun a fis Chulapen Áchechchemen ewe imwenfel lón Jerusalem. Iei lón fansoun affééú,
23 me Jises a fetálfeil lón ewe imwenfel, lón ewe leenien fetál mi wor imwan itan Alen Salomon.
24 Iwe, ekkewe chón Jus ra rongeeló me poputá le ereni: “Ifa úkúúkún ttamen óm kopwe etipemwárámwárakem? Iká pwe en ewe Kraist, kopwe chék erenikem.”
25 Jises a pélúweniir: “Úa fen erenikemi, nge ouse lúkú. Ekkewe angang úa féfféri lón iten Semei we, ra pwáraatá ussun ngang.
26 Nge ámi ouse lúkú, pún esap ámi nei siip.
27 Nei kewe siip ra aúseling ngeni léúwei, me ngang úa silei iir, me ra tapwoto mwiri.
28 Ngang úa ngeniir manaw esemuch, me iir resap fókkun péútmwááliló, me esap wor emén epwe weitiirewu me lepeei.
29 Met Semei we a ngeniei ra lap seni meinisin ekkewe pwal ekkóch mettóch, me esap wor emén epwe tongeni weitiirewu me lepéún ewe Sam.
30 Ngang me ewe Sam, ám eú.”*
31 Pwal lón ei atun, ekkewe chón Jus ra angetiweei ekkewe faw pwe repwe manei.
32 Jises a ereniir: “Chómmóng angang mi múrinné seni ewe Sam úa pwáári ngenikemi. Menni lein ekkena angang oua maneiei ren?”
33 Ekkewe chón Jus ra pélúweni i: “Áúse maneek ren ekkewe angang mi múrinné, nge ren óm kapasen turunufas. Pún inaamwo iká en emén aramas, nge ka pwisin féri pwe en emén kot.”
34 Jises a pélúweniir: “A makketiw lón ámi we Allúk, ‘Kot a apasa: “Ámi kot,” ’*
35 me sia silei pwe ekkewe Taropwe mi Pin resap tongeni móróló. Iká pwe Kot a kér ngeni ‘kot’ chókkewe mi kapwúng me ren an kapas,
36 mi pwúng ámi ereniei, ‘Ka turunufaseei Kot’ atun úa erá pwe ngang Néún Kot, inaamwo iká ewe Sam a epinieiló me tiinieito ngeni fénúfan?
37 Iká úse féri ekkewe angang án Semei we, ousap lúkúei.
38 Nge iká úa fériir inaamwo iká ouse lúkúei, oupwe lúkú ekkewe angang, pwe oupwe silei me sópweeló le weweéchúti pwe ewe Sam me ngang áúa tipeeúfengen lefilem.”
39 Iwe, ra pwal sótuni ar repwe turufi i, nge i a sú me rese tikeri.
40 Me a feilósefál epek ewe Jortan ngeni ewe leeni ia Jon a féri an angangen papatais ie me mwan, me a nónnóm ikena ie.
41 Me chómmóng aramas ra feito ren me poputá le apasa: “Jon ese mwo nge féri eú manaman* nge meinisin ekkewe mettóch Jon a apasa ussun ei mwán mi enlet.”
42 Iwe, me ikena ie, chómmóng ra lúkú lón i.
Footnote
^ Krik, “a wor ái nemenem.”
^ Krik, “a wor ái nemenem.”
^ Are “mi tipeeú.”
^ Are “ussun chék kot.”
^ Krik, “esissil.”
