Me ren Jon 15:1-27
15 “Ngang ewe wesewesen irá kreip, me Semei we i ewe chón atake.
2 I a pékúoló meinisin palei kewe rese uwa, me a limeti meinisin ekkewe mi uwa pwe epwe chómmóngoló uwaar.
3 Ámi oua fen liméch pokiten ekkewe kapas úa fen apasa ngenikemi.
4 Oupwe sópweeló le tipeeú ngeniei, me ngang úpwe sópweeló le tipeeú ngenikemi. Ewe palan a chék tongeni uwa iká a nóm wóón ewe irá kreip, pwal ina chék ussumi iká oupwe chék tipeeú ngeniei.
5 Ngang ewe irá kreip, nge ámi ekkewe palan. Ié a sópweeló le tipeeú ngeniei me ngang úa tipeeú ngeni, ei emén epwe chómmóng uwaan, pún me lúkún ngang ousap fókkun tongeni féri och mettóch.
6 Iká emén ese sópweeló le tipeeú ngeniei, i epwe kóturuwu ussun efóch palen irá me epwe pwáseló. Me aramas repwe ionfengeni ekkena palan me otururelong lón ekkei, me repwe kareló.
7 Iká oupwe sópweeló le tipeeú ngeniei me minne úa apasa epwe chék nónnóm lón ámi, oupwe tingor ese lifilifil met oua mochen me epwe fis ngenikemi.
8 Semei we a lingeló ren ei, pwe ámi oua sópwósópwoló le uwaani chómmóng me ánnetatá pwe ámi nei chón káé.
9 Ngang úa tongekemi, ussun chék án ewe Sam tongeei. Oupwe nónnóm lón ái tong.
10 Iká oupwe álleasochisi ái kewe allúk, oupwe nónnóm lón ái tong, ussun chék ngang úa álleasochisi án ewe Sam kewe allúk me nónnóm lón an tong.
11 “Úa apasa ngenikemi ekkeei mettóch pwe ái pwapwa epwe nóm remi me ámi pwapwa epwe unus.
12 Iei ái allúk, oupwe tongfengen lefilemi ussun chék ngang úa tongekemi.
13 Ese wor án emén tong epwe lap seni ei, pwe epwe fangoló manawan fán ásengesin chiechian kewe.
14 Iká oua féri met úa allúkú ngenikemi, ámi chiechiei.
15 Úsapw chúen kér ngenikemi slave, pún emén slave ese silei met néún we masta a féfféri. Nge úa kér ngenikemi chiechiei, pún úa esilei ngenikemi mettóch meinisin úa rong seni Semei we.
16 Ámi ouse filieitá, nge ngang úa filikemiitá. Úa seikikemiitá pwe oupwe feiló me sópweeló le ukkuwa me uwaami epwe chék nónnóm. Iwe, mettóch meinisin oupwe tingor ngeni ewe Sam fán ásengesin itei, i epwe ngenikemi.
17 “Úa allúk ngenikemi ekkeei mettóch, pwe oupwe tongfengen lefilemi.
18 Iká fénúfan a oput ámi, oua silei pwe a fen oput ngang me mwen an oput ámi.
19 Iká ámi oua ussun aramasen fénúfan, iwe aramasen fénúfan repwe efich minne ar. Nge pokiten ouse ussun ekkewe aramasen fénúfan me ngang úa fen filikemiitá seni me leir, ina ewe popun aramasen fénúfan ra oputakemi.
20 Oupwe chechchemeni ewe kapas úa erenikemi: Emén slave esap lap seni néún masta. Iká ra eriáfféúei repwe pwal eriáfféwúkemi. Iká ra álleasochisi ái kapas, repwe pwal álleasochisi ámi kapas.
21 Nge repwe féri ekkeei mettóch meinisin ngenikemi pokiten itei, pún rese silei ewe Emén mi tiinieito.
22 Iká úse feito me kapas ngeniir esap wor ar tipis. Nge iei ese wor ar kúnetipingen ren ar kewe tipis.
23 Ié a oput ngang a pwal oput Semei we.
24 Iká úse féri leir ekkewe angang esaamwo wor emén a féri, iwe esap wor ar tipis. Nge iei ra kúnaei me oputaei pwal Semei we.
25 Nge a fis ei pwe epwe pwénúetá minne a makketiw lón ar we Allúk: ‘Ra oputaei nge ese wor popun.’
26 Atun ewe ngún mi fel ewe epwe álisikemi epwe waroto, epwe pwáár ngenikemi ussui. Ina ewe ngún mi fel mi asukula ewe enlet me a feito seni Semei we,
27 nge ámi oupwe pwal pwáraatá ussui, pún oua fen nónnóm rei seni me lepoputáán.
