Me ren Jon 21:1-25
21 Mwirin ei, Jises a pwal pwáraaló pwisin i ngeni ekkewe chón káé órun ewe Setin Taipirios. Iei ussun napanapen an pwááló.
2 Simon Piter, Tomas (ewe mi iteni ewe Nippwe), Nataniel seni Kana lón Kalili, néún Sepeti kewe, me pwal rúúemén me lein néún kewe chón káé, ra nóm ikena ie.
3 Simon Piter a ereniir: “Úpwele ló attaw.” Ra ereni: “Áúpwe fituk.” Ra feiló me tétá wóón ewe waa, nge lón ena pwinin rese mwo nge liapeni emén.
4 Iwe nge, atun a kerán chék rániló, Jises a útá leppi, nge ekkewe chón káé rese esilla pwe i Jises.
5 Iwe, Jises a ereniir: “Nei kanan, mi wor met* oupwe áni?” Ra pélúweni: “Aapw!”
6 A ereniir: “Oupwe oturatiw ewe epino peliefichin ewe waa me oupwe kúnékún.” Ina minne ra oturatiw, nge rese chúen tongeni pweaatá pún ren chómmóngun ekkewe iik.
7 Iwe, ewe chón káé Jises a kon tongei, a ereni Piter: “Ina i ewe Samol!” Lupwen Simon Piter a rong pwe i ewe Samol, a úféúfolong* úfan we úféúfen lúkún, pún i mi chék seleló,* mwirin a kóturutiw lón ewe sáát.
8 Nge ekkewe ekkóch chón káé ra etilong wóón ewe kúkkún waa, me átekinalong ewe epino mi ur ren iik, pún iir rese towawowu, ina epwe chék 300 fiit* seni fénú.
9 Lupwen ra tikeri leppi, ra kúna eú ekkei mi wor iik wóón, pwal pilawa.
10 Jises a ereniir: “Oupwe wato ekkóch me lein ekkewe iik oua kerán chék liapeni.”
11 Iwe, Simon Piter a tétá wóón ewe waa me átekinalong leppi ewe epino mi ur ren watteen iik, úkúúkún 153. Me ikáámwo ra kon chómmóng, nge ewe epino ese kamw.
12 Jises a ereniir: “Oune etto mwéngéén lesossor.” Ese wor emén me lein ekkewe chón káé epwe pwora le eisini: “En ié?” pokiten ra silei pwe i ewe Samol.
13 Jises a etto me angei ewe pilawa me ngeniir, me pwal ina ussun ren ekkewe iik.
14 A iei aúlúngátin fansoun án Jises pwá ngeni ekkewe chón káé mwirin an manawetá seni máló.
15 Lupwen ra wes le mwéngéén lesossor, Jises a ereni Simon Piter: “Simon néún Jon, ka tongeei lap seni ekkeei?” A pélúweni: “Ewer, Samol, ka silei pwe ngang mi tongeek.” A ereni: “Kopwe amwéngééni nei kewe kúkkún siip.”
16 A erenisefál fán oruuan: “Simon néún Jon, ka tongeei?” A pélúweni: “Ewer, Samol, ka silei pwe ngang mi tongeek.” A ereni: “Kopwe mammasa nei kewe kúkkún siip.”
17 A ereni fán aúlúngátin: “Simon néún Jon, ka tongeei?” Piter a meefi letipeta pwe a iei aúlúngátin fansoun a eisini: “Ka tongeei?” Iwe a ereni: “Samol, en ka silei mettóch meinisin, en ka silei pwe ngang mi tongeek.” Jises a ereni: “Kopwe amwéngééni nei kewe kúkkún siip.
18 Enlet úpwe erenuk, lupwen en mi chék emén alúwél, ka kan pwisin aúféúfok me feilfetál ia ka mochen ló ie. Nge lupwen ka chinnap, kopwe eitiewu poum kewe me emén epwe aúféúfok me uweiukoló ia kese mochen ló ie.”
19 A apasa ei pwe epwe pwáári met sókkun máló i epwe elinga Kot ren. Mwirin an apasa ei, a ereni: “Kopwe sópweeló le tattapwoto mwiri.”
20 Piter a kul me a kúna ewe chón káé Jises a kon tongei pwe mi tattapwoto, ewe emén atun ewe mwéngéén lekuniol mi únnesefál ngeni fán mwárin me apasa: “Samol, ié ena epwe afangemá en?”
21 Iwe, lupwen Piter a kúna átena a ereni Jises: “Samol, ifa ussun ei mwán?”
22 Jises a ereni: “Iká úa mochen pwe i epwe chék nónnóm tori ái feito, pwata ka mochen silei ussun? En kopwe sópweeló le tattapwoto mwiri.”
23 Iwe, ewe pwóróus pwe ei chón káé esap máló a chéú lefilen ekkewe pwipwi. Iwe nge, Jises ese ereni pwe esap máló, nge a erá: “Iká úa mochen pwe i epwe chék nónnóm tori ái feito, pwata ka mochen silei ussun?”
24 Iei i ewe chón káé mi wisen pwáraatá ussun ekkeei mettóch me ewe mi wisen makkeei ekkeei mettóch, me sia silei pwe mi enlet an pwáraatá.
25 Ren enletin, mi pwal wor chómmóng mettóch Jises a féri, iká epwe unusen makketiw meinisin, ái lúkú esap naf leeni lón fénúfan epwe eleenia ekkewe puk* mi makketiw.
