Me ren Jon 7:1-52
7 Mwirin ei, Jises a sópweeló le fetálfeil lón Kalili, pún ese mochen fetálfeil lón Jutia pokiten ekkewe chón Jus ra kúkkútta pwe repwe nieló.
2 Iwe nge, ewe ránin Chulapen Likachoch án chón Jus a arapoto.
3 Iwe, pwiin kewe ra ereni: “Kopwe ló me ikeei me feiló ngeni Jutia pún noum kewe chón káé repwe pwal kúna ekkewe angang ka féri.
4 Pún ese wor emén a féri och mettóch lemonomon iká a mochen pwe epwe sill me ren aramas. Iká ka féri ekkeei mettóch, kopwe pwáárukoló ngeni fénúfan.”
5 Ren enletin, ese wor án pwiin kana lúkú lón i.
6 Iwe, Jises a ereniir: “Esaamwo tori ái fansoun, nge ámi oua tongeni féri ena ese lifilifil ineet fansoun.
7 Ese wor popun án fénúfan epwe oput ámi, nge a oput ngang pokiten úa pwáraatá pwe an kewe angang mi fókkun ngaw.
8 Ámi oupwe feitá ngeni ewe chulap. Úsapw mwo feitá ngeni ei chulap pún esaamwo wesewesen tori ái fansoun.”
9 Iwe, mwirin an ereniir ekkeei mettóch, a chék nómotiw Kalili.
10 Nge lupwen pwiin kewe ra feitá ngeni ewe chulap, iwe i a pwal feitá, esap lepwápwáló nge lemonomon.
11 Iwe, ekkewe chón Jus ra poputá le kútta i lón ewe chulap me apasa: “Ifa i ewe mwán?”
12 Iwe, a watte án ekkewe aramas mwéngúnúngúnfengen ussun i. Ekkóch ra apasa: “I emén mwán mi múrinné.” Pwal ekkóch ra apasa: “Aapw, a otupu ekkewe aramas.”
13 Ewer, ese wor emén a pwáraaló an kapas ussun i pún ra niwokkusiti ekkewe chón Jus.
14 Ina epwe arúáánúún ránin ewe chulap, Jises a feitá ngeni ewe imwenfel me poputá le asukul.
15 Iwe, ekkewe chón Jus ra mwaar, ra apasa: “Ifa ussun ei mwán a eáni ei sókkun tipáchem lón ekkewe Taropwe mi Pin* nge ese káé lón ekkewe sukul?”*
16 Mwirin, Jises a pélúweniir me apasa: “Met úa asukula esap ái, nge án ewe mi tiinieito.
17 Iká emén a mochen féri letipan, i epwe silei iká ewe asukul seni Kot are úa kapas seni pwisin ái.
18 Ié a kapas seni pwisin an, a kúkkútta pwisin lingan. Nge ié a kútta lingen ewe emén mi tiinaato i, ei emén a apasa ewe enlet, me ese wor minne mi mwáál ren.
19 Met, esap pwe Moses ewe a ngenikemi ewe Allúk? Nge ese wor emén me leimi a álleasochisi ewe Allúk. Pwata oua kúttaei pwe oupwe nieiló?”
20 Ekkewe aramas ra pélúweni: “Mi wor emén timon wóóm. Ié a kúttók pwe epwe nikoló?”
21 Lón án Jises pélúweni a ereniir: “Úa chék féri eú mettóch, nge ámi meinisin oua máirú ren.
22 Ren ei popun, Moses a ngenikemi ewe allúk ussun sirikomsais, (nge esap seni Moses, pwe seni semelapemi kewe) me oua sirikomsaisini emén lón sapat.
23 Iká emén mwán epwe angei an sirikomsais lón sapat pwe ete atai ewe Allúkún Moses, pwata chék oua fókkun song ngeniei ren ái echikara emén lón sapat?
24 Oupwe úkútiw le apwúngú emén ren napanapan me lúkún, nge oupwe apwúngú ren kapwúng mi pwúng.”
25 Mwirin, ekkóch aramasen Jerusalem ra poputá le apasa: “Esap iei i ewe mwán ra kúkkútta pwe repwe nieló?
26 Nge nengeni! a kapas lein aramas, nge rese apasa och ngeni. Epwe ekkewe sounemenem ra wesewesen silei pwe iei i ewe Kraist?
27 Nge kich, sia silei ia ei mwán a feito me ie. Nge atun ewe Kraist epwe feito, ese wor emén epwe silei iká i seni ia.”
28 Iwe, atun Jises a asukul lón ewe imwenfel, a léúwommóng le apasa: “Oua sileei me oua silei iká ngang seni ia. Me ngang úse feito fán pwisin ái, nge ewe a tiinieito, i wesewesen Emén, me ouse silei i.
29 Úa silei i pún úa feito seni i, me ena Emén a tiinieito.”
30 Iwe, ra poputá le kútta ar repwe turufi i, nge ese wor emén a angetá wóón pún esaamwo tori an fansoun.
31 Nge a chúen chómmóng lein ewe mwichen aramas ra lúkú lón i, me ra apasa: “Lupwen ewe Kraist epwe war, met, esap féri chómmóng esissil lap seni minne ei mwán a féri?”
32 Ekkewe Farisi ra rong án ewe mwichen aramas mwéngúnúngún wóón ekkeei mettóch ussun i, me ekkewe souasor mi lap me ekkewe Farisi ra tiinaaló polis ar repwe aresini i.
33 Mwirin, Jises a apasa: “Úpwe nóm remi pwal ekis fansoun me mwen úpwe feiló ren ewe Emén mi tiinieito.
34 Oupwe kúttaei, nge ousap kúnaei, me ikewe úpwe nóm ia ámi ouse tongeni ló ie.”
35 Iwe, ekkewe chón Jus ra eráfengen lefiler: “Ia ei mwán a ekiekin feiló ie pwe sisap kúna? Met, a ekiekin feiló ren ekkewe chón Jus mi toropasfeil lein ekkewe chón Krik me asukula ekkewe chón Krik?
36 Met weween alon na lupwen a apasa, ‘Oupwe kúttaei, nge ousap kúnaei, me ikewe úpwe nóm ia ámi ouse tongeni ló ie’?”
37 Lón ewe sáingoon rán, ewe rán mi lap lón ewe ránin chulap, Jises a útá me léúwommóng le apasa: “Ié a kaka, epwe feito rei me ún.
38 Ié a lúkú lón ngang, ussun chék met ewe taropwe mi pin a apasa: ‘Seni lealóllóólun i epwe pupuwu ewe pupuun konik mi manaw.’ ”
39 Iwe nge, a apasa ei ussun ewe ngún mi fel. Chókkewe mi lúkú lón i repwele angei ei ngún mi fel. Resaamwo angei pokiten Jises esaamwo feitá láng.
40 Ekkóch me lein ewe mwichen aramas mi rong ekkeei kapas ra poputá le apasa: “Iei i wesewesen ewe Soufós.”
41 Ekkóch ra apasa: “Iei i ewe Kraist.” Nge ekkóch ra apasa: “Ewe Kraist esap feito seni Kalili, iká met?
42 Esap pwe ewe taropwe mi pin a apasa pwe ewe Kraist epwe feito seni mwirimwirin Tafit me seni Petleem, ewe sóópw ikewe Tafit a nóm ie?”
43 Iwe, a wor tipefesen wóón i lein ewe mwichen aramas.
44 Iwe nge, ekkóch me leir ra mochen aresini i, nge ese wor emén a tongeni angetá wóón.
45 Ina minne, lupwen ekkewe polis ra liwinsefál, ekkewe souasor mi lap me Farisi ra eisiniir: “Pwata ouse uweato i?”
46 Ekkewe polis ra pélúweni: “Ese fókkun wor emén aramas a iei ussun an kapas.”
47 Iwe, ekkewe Farisi ra pélúweni: “Met, ámi oua pwal tupuló?
48 Met, mi wor emén me lein ekkewe sounemenem are lein ekkewe Farisi a lúkú lón i?
49 Nge ei mwichen aramas rese silei ewe Allúk, iir aramas mi anúmamaw.”
50 Nikotemus, ewe mi feiló ren i me mwan me i emén leir, a apasa ngeniir:
51 “Ach we Allúk esap apwúngú emén iká pwe ese akkomw aúseling ngeni i me silei minne a féfféri, iká met?”
52 Lón ar pélúweni ra ereni: “Met, ka pwal feito seni Kalili? Kopwe kútta me kúna pwe ese wor soufós epwe feito seni lón Kalili.”*
Footnote
^ Krik, “ekkewe mak.”
^ Ina, asukul seni ekkewe rappai.
^ Seni wokisin 53 ngeni sópwun 8 wokisin 11 rese kapachelong lón chómmóng kapi minen lóóm mi alúkúlúk.
