Me ren Luk 12:1-59
-
Iisen ekkewe Farisi (1-3)
-
Niwokkusiti Kot, nge esap aramas (4-7)
-
Emén a pwáári pwe i néún Kraist chón káé (8-12)
-
Kapas áwewe ussun emén mwán ese mirit mi wéúéch (13-21)
-
Úkútiw le aúrek (22-34)
-
Mwiich kisikis (32)
-
-
Mammasafichi (35-40)
-
Ewe chón angang mi túppwél me ewe chón angang ese túppwél (41-48)
-
Esap kinamwe, nge kinikinfesen (49-53)
-
Lamoten esilla minne a fiffis (54-56)
-
Ataweei osukosuk (57-59)
12 Lón ena atun, lupwen eú mwichen ngeréún aramas ra chufengen me ra mwo nge ipweri fengeni pecher, i a poputá le akkomw ereni néún kewe chón káé: “Oupwe túmúnúkemi seni iisen ekkewe Farisi, ewe likótuputup.
2 Nge ese wor och mettóch mi pwélúéchúló esap sárifiló, me ese wor mettóch mi monomon esap pwápwááló.
3 Ina minne, ese lifilifil met oua apasa lón kiroch epwe wor chón rong lón saram, me met oua mwéngúnúngúnú lón ruumw epwe afalafalewu seni wóón ungen ekkewe imw.
4 Pwal och, úa erenikemi chiechiei kana, ousap niwokkusiti chókkewe mi nieló ewe inis me mwirin ei rese pwal chúen tongeni féri och.
5 Nge úpwe áiti ngenikemi ié oupwe niwokkusiti: Niwokkusiti ewe Emén mi wor an nemenem wóón ninniiló, pwal mwirin kóturulong lón Keena.* Ewer, úa erenikemi, oupwe niwokkusiti ei Emén.
6 Esap pwe nimmén machchang a améméló ren rúúeféú senis mi kúkkún manamanan?* Iwe nge, ese wor emén me leir Kot epwe ménúkaaló.*
7 Nge pwal mwo meten mékúremi meinisin ra állea. Ousap niwokkus, oua kon aúchea seni meinisin ekkena machchang.
8 “Úa erenikemi pwe meinisin mi pwárieiló mwen mesen aramas, ewe Néún aramas epwe pwal pwáraaló mwen mesen néún Kot kewe chónláng.
9 Nge ié a amamesiniei mwen mesen aramas, ewe Néún aramas epwe amamesini mwen mesen néún Kot kewe chónláng.
10 Nge ié mi apasa eú kapasen ú ngeni ewe Néún aramas, epwe musoló tipisin, nge ié a eáni kapasen turunufas ngeni ewe ngún mi fel, esap musoló.
11 Lupwen repwe uweikemiiló mwen mwicheichen aramas,* néúwisin mwú, me sounemenem, ousap aúreki ifa ussun are met oupwe eáni pélúwan are met oupwe apasa,
12 pún ewe ngún mi fel epwe áiti ngenikemi lón ena chék kulók ekkewe mettóch mi lamot oupwe apasa.”
13 Iwe, emén me lein ewe mwichen aramas a ereni: “Sense, kopwe ereni pwii epwe kini ngeniei ewe álemwir.”
14 A ereni: “Átenan, ié a seikieitá ái úpwe soukapwúng are chón affér lefilemi me rúúemén?”
15 Mwirin a ereniir: “Oupwe mammasa me túmúnúkemi seni iteiten sókkun mochenia,* pún pwal mwo lupwen emén aramas a chómmóng pisekin, manawan esap lóngólóng wóór.”
16 Ren ena a ereniir eú kapas áwewe, a apasa: “Fénúen emén mwán mi pisekisek a fókkun uwaéch.
17 Iwe a poputá le ekkekieki lón letipan, ‘Met úpwe tongeni féri iei, ren an ei ese wor ia úpwe ionaaló ie ái keei uwa?’
18 Mwirin a apasa, ‘Iei met úpwe féri: Úpwe ataietiw ái kewe leenien iseis me aúetá ekkewe mi watte, me ikena úpwe ionaalong meinisin ái kewe féún wiich me meinisin ái kewe pisek,
19 me úpwe pwisin ereniei: “A wor chómmóng óm mettóch mi múrinné ra iseis fán iten fite fite ier, kene chék kinamwe, mwéngé, ún, pwapwaiti manawom.” ’
20 Nge Kot a ereni, ‘En emén ese mirit, lón ei pwinin repwe angei sonuk manawom. Iwe, ié epwe eáni ekkewe mettóch ka iseis?’
21 Iwe, iei met epwe fis ngeni emén mi iseis wéú fán pwisin itan nge ese pisekisek me ren Kot.”
22 Mwirin, a ereni néún kewe chón káé: “Iei popun úa erenikemi, oupwe úkútiw le aúreki manawemi ren met oupwe áni are ussun inisimi ren met oupwe úfeni.
23 Pún ewe manaw a aúchea lap seni mwéngé me ewe inis lap seni úf.
24 Oupwe ekieki ussun ekkewe ángá: Iir rese fótuki féún pwikil are kinikin, ese pwal wor ar leenien iseis, iwe nge Kot a amwéngééniir. Esap pwe oua fókkun aúchea lap seni ekkewe machchang?
25 Ié me leimi a tongeni attamaaló pwal mwo nge ekis* manawan ren an aúrek?
26 Ina minne, iká ouse tongeni féri ena sókkun mettóch mi kisikis, pwata oua aúreki ussun ekkewe lusun mettóch?
27 Ekieki ifa ussun ekkewe péénirá* ra mááritá: Rese angang weires, rese pwal tete úf, nge úa erenikemi pwe pwal mwo Salomon lón an ling ese tongeni éúféúfa ngeni pwisin i úf mi ussun múrinnéén ekkeei péénirá.
28 Iká iei ussun án Kot éúféúfa ekkewe irá lón ewe masies mi nóm ikenái nge lesor ra kóturulong lón umw, epwele fen ifa me lapólóón an aúféúfakemi, ámi kewe mi lúkú kisikis!
29 Iei minne, oupwe úkútiw le aúreki met oupwe áni me met oupwe únúmi, me úkútiw le oluoló ámi aúrek,
30 pún ikkena ekkewe mettóch meinisin ekkewe mwúún fénúfan ra achocho le kútta, nge Sememi a silei pwe oua osupwangen ekkena mettóch.
31 Nge oupwe sópweeló le kúkkútta an we Mwú, me ekkena mettóch repwap kapach ngenikemi.
32 “Ámi mwiich kisikis, ousap niwokkus pún Sememi we a tipeeú ngeni an epwe ngenikemi ewe Mwú.
33 Améméló pisekimi kewe me fang liffangen úméúméch.* Féri pwotoun moni esap mesiló, eú wéú lón láng esap iteló, ikewe esap wor chón solá repwe kkan ngeni me pwétúr esap áni.
34 Pún ia wéúmi a nóm ie, letipemi epwe pwal nóm ie.
35 “Oupwe úféúf me mmólnetá* me ettina néúmi kewe lamp,
36 me oupwe ussun chék ekkewe mwán mi witiwiti néúr we masta an epwe liwin seni ewe apwúpwúlú, pwe atun a war me fichifich, repwe mwittir suuk ngeni i.
37 Ra pwapwa ekkewe slave, ekkewe néúr we masta a waroto nge a kúna ar mammas! Enlet úa erenikemi, epwe úféúfetá* úféúfen angang me amóótteretiw* ren ewe cheepel me feito rer me angang ngeniir.
38 Me iká a war lón ewe oruuen kinikinin fansoun,* are pwal mwo lón ewe aúlúngátin,* me kúner pwe ra mmólnetá, ra pwapwa!
39 Nge oupwe chechchemeni ei, iká ewe chón imw a silei menni kulók ewe chón solá epwe war lón, i esap mut ngeni an epwe tolong lón imwan we.
40 Pwal ámi, oupwe mmólnetá, pún ewe Néún aramas epwe war lón eú kulók ousap ekieki ngeni.”
41 Mwirin Piter a apasa: “Samol, ám chék ka erenikem ei kapas áwewe are pwal ngeni meinisin?”
42 Iwe, ewe Samol a erá: “Ié wesewesen ewe chón angang mi túppwél, ewe emén mi tipáchem, ewe néún we masta epwe ewisa ngeni an epwe túmúnú néún we kúmiin chón angang* pwe epwe ngengngeniir naféchún mwéngé lón fansoun mi fich?
43 A pwapwa ena chón angang iká néún we masta a waroto nge a kúna an féri ena!
44 Enlet úa erenikemi, i epwe ewisa ngeni an epwe túmúnú meinisin pisekin kewe.
45 Nge iká ena chón angang epwe apasa lón letipan, ‘Nei we masta a mmang le waroto,’ me poputá le awata ekkewe chón angang mwán me fefin me mwéngé me ún me sakawoló,
46 ewe mastaan ena chón angang epwe war lón ewe rán esap ekieki ngeni me lón ewe kulók esap silei, me i epwe fókkun eriáfféwú* me oturaalong i ren ekkewe rese túppwél.
47 Iwe, ena chón angang, ewe mi weweiti letipen néún we masta nge ese mmólnetá are féri minne a apasa,* epwe kawet ren wichiwich mi chómmóng.
48 Nge ewe emén ese weweiti nge a féri mettóch mi fich ngeni an epwe angei wichiwich, epwe chókúkkún kawetan. Pwúngún, emén mi angei chómmóng, epwe pwal chómmóng met aramas repwe kútta seni, nge emén mi kewis ngeni chómmóng, aramas repwe pwal kútta seni i met mi lap.
49 “Úa feito pwe úpwe ékúú eú ekkei wóón fénúfan, me met úpwe pwal mochen iká a fen kú?
50 Ren enletin, mi wor eú papatais úpwe papatais ren, me a ifa me riáfféúi tori an epwe wes!
51 Oua ekieki pwe úa feito pwe úpwe awora kinamwe wóón fénúfan? Úa erenikemi, aapw, nge fen kinikinfesen.
52 Pún seni iei, epwe wor kinikinfesen lón eú famili. Iká a wor nimmén aramas lón, úlúmén repwe ú ngeni rúúemén me rúúemén repwe ú ngeni úlúmén.
53 Repwe kinikinfesen, sam epwe ú ngeni néún át me át epwe ú ngeni sam, in epwe ú ngeni néún nengngin me nengngin epwe ú ngeni in, me inen ewe át epwe ú ngeni pwúlúwen néún we, me pwúlúwen ewe át epwe ú ngeni inen pwúlúwan we.”
54 Mwirin a pwal ereni ekkewe aramas: “Lupwen oua kúna eú kuchu a pwá me notou, oua mwittir apasa, ‘Epwele fis mélúmél,’ iwe a fis.
55 Me lupwen oua kúna pwe ásepwál a enito me éér, oua apasa, ‘Epwe fókkun pwichikkar,’ iwe a fis.
56 Ámi mi likótuputup, oua silei ifa ussun oupwe weweiti napanapen fénúfan me fán láng, nge pwata ouse silei ifa ussun oupwe weweiti weween minne a fiffis lón ei fansoun?
57 Pwata ouse weweiti met itá úrúrún oupwe féri?
58 Áwewe chék, atun en me ewe emén mi atourók ngeni kapwúng oua mwineló ngeni emén sounemenem, atun oua feffetál, kopwele ataweei ewe tipefesen pwe esap uweiukoló mwen ewe soukapwúng, me ewe soukapwúng esap uweiukoló ngeni ewe polis, me ewe polis esap oturukolong lón kalapus.
59 Úa erenuk pwe kosap fókkun towu seni ikena tori óm kopwe omusatiw óm liwinimmang, tori ewe sáingoon féúkúkkúnún moni.”*
Footnote
^ Are “esap kúna.”
^ Are ese mwáál, “mwen ekkewe sinakok.”
^ Are “tipemmóng.”
^ Are “lily.”
^ Krik, “Oupwe fétinúkú lukanapemi.”
^ Are “fétinúkú.”
^ Are “móót tiwiniin.”
^ Seni ina epwe 9:00 p.m. ngeni lukenipwin.
^ Seni lukenipwin ngeni ina epwe 3:00 a.m.
^ Are “chón angang lón imw.”
^ Krik, “epwe pékúfeseni lón ruu.”
^ Are “féri minne mi tipeeú ngeni letipan.”
