Me ren Luk 15:1-32
15 Iwe, meinisin ekkewe chón angei takises me chón tipis ra kan mwimmwicheto únúkkún pwe repwe rongorong ngeni.
2 Me ekkewe Farisi me soumak ra kan mwéngúnúngún: “Ei mwán a etiwa chón tipis me fitiir le mwéngé.”
3 Iwe, a ereniir ei kapas áwewe, a apasa:
4 “Ié me leimi ekkena mwán mi wor 100 néún siip, iká a mworukoló emén me leir, esap likitaaló ekkewe 99 lón ewe fénúpéén me ló kútta ewe emén mi mworukoló tori an epwe kúna?
5 Iwe, lupwen a kúna, a ekietá wóón afaran me pwapwa.
6 Me lupwen a tikeri leimwan, a kérfengeni chiechian kewe me chón órun, me ereniir, ‘Oupwe fitiei le pwapwa, pún úa kúna nei we siip mi mworukoló.’
7 Úa erenikemi pwe epwe pwal ina chék ussun, epwe wor watteen pwapwa lón láng ren emén chón tipis mi áier lap seni ekkewe 99 mi pwúng ese lamot repwe áier.
8 “Are ié fefin mi wor néún engol féún senis drachma,* iká a péút seni eféú me lein ekkewe drachma,* esap ettina eú lamp me pirumwei lón imwan me kúttafichi tori an epwe kúna?
9 Iwe, lupwen a kúna, a kérfengeni chiechian* kewe me chón órun me apasa, ‘Oupwe fitiei le pwapwa, pún úa kúna ewe féún senis drachma* mi péút seniei.’
10 Úa erenikemi, pwal ina chék ussun, epwe wor pwapwa lein néún Kot kewe chónláng ren emén chón tipis mi áier.”
11 Mwirin a apasa: “A wor emén mwán mi wor rúúemén néún át.
12 Iwe, ewe kúkkún a ereni seman we, ‘Semei, kopwe ngeniei wisei me lón ewe álemwir, ewe epwe itá ló ngeniei.’ Iwe, a inetifeseni mettóchun kewe lefiler.
13 Fitu rán mwirin, ewe naw kúkkún a ionfengeni meinisin mettóchun me sáiló ngeni eú fénú mi towaw, me ikena ie a ollusaaló álemwirian we ren an manaweni manaw mi limengaw.
14 Lupwen a eitaaló meinisin, eú watteen lengita a fis lón unusen ena fénú, me a turulong lón osupwang.
15 A pwal mwo nge ló me pwisin féri pwe emén me lein chón ena fénú epwe néúni chón angang, ewe a tiinaaló lón an we málámál pwe epwe túmún pik.
16 Me i a áneán an epwe mét ren enen ekkewe pik, ekkewe ra mwémmwéngé, nge ese wor emén a ngeni och.
17 “Lupwen a miritiló, a apasa, ‘A wor chómmóng néún semei we chón angang a somwoló ener pilawa, nge ngang úpwele má me ikeei ren echik!
18 Úpwele útá me sáiló ren semei we me ereni: “Semei, úa tipis ngeni láng me tipis ngonuk.
19 Ese chúen fich ngeniei ái úpwe iteni noum. Kopwe chék ekieki pwe ngang ussun emén me lein noum kewe chón angang.” ’
20 Iwe, a útá me ló ngeni seman we. Atun a chúen towaw, seman we a kúna i me a meefi an tongei me a ssá me turufaaló i* me kisi i fán pwetete.
21 Iwe, ewe naw a ereni, ‘Semei, úa tipis ngeni láng me tipis ngonuk. Ese chúen fich ngeniei ái úpwe iteni noum.’
22 Nge ewe sam a ereni néún kewe slave, ‘Mwittir! uwawu eché úf, ewe mi fókkun múrinné, me éúféúfa ngeni, me pacheetá efóch ring wóón péún me sikaalong ipwan wóón pechen.
23 Pwal uweato ewe nieniféén kou mi kitinnup, nieló me sipwe mwéngé me pwapwafengen,
24 pún nei ei a máló, nge a manawsefál. A mwálecheló nge a pwásefál.’ Iwe, ra poputá le apwapwa.
25 “Iwe néún we watte a nóm lón ewe tánipi, me atun a liwinsefál me kkan ngeni ewe imw, a rong ngingiin nikáttik me pwérúk.
26 Iwe, a kérato emén me lein ekkewe chón angang me eisini iká met a fis.
27 A ereni, ‘Pwiium we a war, me semom we a nieló ewe nieniféén kou mi kitinnup pokiten a liwinsefáliti lón an péchékkúl.’*
28 Nge a song me ese mochen tolong. Iwe, seman we a towu me poputá le tingormaw ngeni i.
29 Lón an pélúweni a ereni seman we, ‘Nengeni! Lón ekkeei fite fite ier úa angang ngonuk me esap fán eú ái úpwe álleasolapa óm allúk, nge esap mwo fán eú óm kopwe ngeniei emén nieniféén siike pwe áúpwe pwapwafengen me chiechiei kewe.
30 Nge atun chék noum ei át mi ollusaaló mettóchum kewe ngeni ekkewe fin lisowu a war, ka nieló ewe nieniféén kou mi kitinnup fán itan.’
31 Iwe a ereni, ‘Nei, ka nónnóm rei fansoun meinisin, me mettóchui meinisin, óm.
32 Nge mi lamot ousipwe féri apwapwaan an liwinsefál me chengel, pún pwiium we a máló, nge a manawsefál. I a mwálecheló nge a pwásefál.’ ”
