Me ren Luk 20:1-47
20 Lón eú me lein ekkewe rán atun a asukula ekkewe aramas me lón ewe imwenfel me afalafala ewe kapas allim, ekkewe souasor mi lap me ekkewe soumak fitifengen me ekkewe néúwisin Jus ra feito
2 me ereni: “Kopwe erenikem, fán menni nemenem ka féri ekkeei mettóch? Are ié a ngonuk ei nemenem?”
3 A pélúweniir: “Úpwe pwal eisinikemi eú kapas eis, me oupwe pélúweniei:
4 Ewe papatais án Jon, seni láng are seni aramas?”
5 Iwe ra pwúngúpwúngfengen lefiler me apasa: “Iká sipwe erá, ‘Seni láng,’ i epwe apasa, ‘Pwata chék ouse lúkú i?’
6 Nge iká sipwe erá, ‘Seni aramas,’ ekkewe aramas repwe manei ngenikich faw, pún ra lúkú pwe Jon emén soufós.”
7 Iwe, ra pélúweni pwe rese silei iká seni ia.
8 Jises a ereniir: “Pwal ngang, úsapw pwal erenikemi fán menni nemenem úa féri ekkeei mettóch.”
9 Iwe, a poputá le apwóróusa ngeni ekkewe aramas ei kapas áwewe: “Emén mwán a fótuki eú tánipiin kreip me a ngeni ekkewe chón atake ar repwe túmúnú,* me a sáiló towaw ren langattam fansoun.
10 Lupwen a tori fansoun rásin kreip, a tiinaaló emén slave ren ekkewe chón atake pwe repwe ngeni ekkóch uwaan ewe tánipiin kreip. Iwe nge, ekkewe chón atake ra tiinaaló fán an aséúnapé mwirin ar awata.
11 Nge a tiinaaló pwal emén slave. Ra pwal awata me ásáwa* me tiinaaló fán an aséúnapé.
12 A pwal tiinaaló ewe aúlúménún, ra pwal efeiengawa me oturawu lúkún.
13 Ren ei, ewe minne an ewe tánipiin kreip a apasa, ‘Met ei úpwele féri? Úpwe tiinaaló nei ei mwán, ewe mi áchengicheng. Ese mwáál repwe súféliti ei emén.’
14 Atun ekkewe chón atake ra kúna i, ra pwúngúpwúngfengen lefiler me erá, ‘Iei i ewe chón álemwir. Ousipwe nieló pwe sipwe eáni ewe álemwir.’
15 Iwe, ra oturawu lúkún ewe tánipiin kreip me nieló i. Iwe, met ewe minne an ewe tánipiin kreip epwele fér ngeniir?
16 Epwe feiló me nieló ekkeei chón atake me epwe ngeni pwal ekkóch ewe tánipiin kreip.”
Atun ra rong ei, ra apasa: “Amwo esap fókkun fis ena!”
17 Nge a newenewen ngeniir me apasa: “Iwe, met weween ei mi makketiw: ‘Ewe faw ekkewe chón kaú ra péútaaló, iei a wiliiti eféú féún lepwokuku mi fókkun aúchea’?
18 Meinisin mi turuló wóón ena faw repwe tatakkis. Nge ren ewe emén ewe faw epwe turuiti, epwe apachchacha i.”
19 Atun ekkewe soumak me ekkewe souasor mi lap ra aúseling ngeni ena kapas áwewe, ra esilla pwe a fós ussur. Ina minne, lón chék ena atun ra mochen turufi i nge ra niwokkusiti ekkewe aramas.
20 Me mwirin ar nengenifichi i, ra tiinaaló ekkewe mwán ra mééniir lemonomon ar repwe napanapen aramas mi pwúng pwe repwe elliapa i lón an kapas, pwe repwe uwei i ngeni ewe mwú me ngeni nemenemen ewe governor.
21 Iwe, ra kapas eis ngeni, ra apasa: “Sense, áúa silei pwe óm kapas me asukul ra pwúng me kese lifilifil aramas, nge ka asukula ewe enlet ussun Kot:
22 Mi mumutá me ren allúk* ach sipwe méénatiw takisesin pépéén mékúr ngeni Sisar are ese?”
23 Nge i a esilla ar rawangaw me a ereniir:
24 “Oupwe ápwár ngeniei eféú denarius.* Liosun ié me iten ié ei?” Ra apasa: “Liosun Sisar me itan.”
25 A ereniir: “Ina minne, oupwe ngeni Sisar minne án Sisar, nge oupwe ngeni Kot minne án Kot.”
26 Iwe, rese tongeni ssárei i lón an kapas mwen ekkewe aramas, nge ra ingeló ren minne a pélúweni, iwe ra chék fanafaneló.
27 Iwe nge, ekkóch me lein ekkewe Satusi, chókkewe mi apasa pwe ese wor manawsefál, ra feito me eisini:
28 “Sense, Moses a mak ngenikich, ‘Iká pwiin emén mwán a máló, a likitaaló pwúlúwan we nge ese wor néún, pwiin we epwe angei pwúlúwan we me oupwatiw seni neminna mwirimwirin pwiin we.’
29 A wor fúmén pwipwi. Ewe áeménún a angei emén pwúlúwan, a máló nge ese wor néún.
30 Me ewe arúúeménún
31 me ewe aúlúménún ra pwúpwúlú ngeni neminna. Pwal ina chék ussun ren iir meinisin ekkewe fúmén, ra máló nge ese wor néúr.
32 Lesópwólóón, ewe fefin a pwal máló.
33 Ina minne, lón ewe manawsefál, ié epwe pwúlúwen neminnewe, pún ekkewe fúmén ra piin pwúlúweni?”
34 Jises a ereniir: “Néún ei ótóten fénúfan* kewe ra pwúpwúlú me apwúpwúlú,
35 nge chókkewe Kot a mut ngeniir ar repwe manaw lón ewe ótót epwe feito me ewe manawsefál seni máló, resap pwúpwúlú are pwal apwúpwúlú.
36 Ren enletin, resap tongeni chúen máló, pún ra ussun chék ekkewe chónláng, me pokiten repwe manawsefál iir repwe néún Kot.
37 Nge ren ekkewe mi máló repwe manawetá, pwal mwo Moses a pwáraaló me lón ewe pwóróus ussun ewe irá félúfél atun a kér ngeni Jiowa* ‘ewe Koten Eperiam me Koten Aisek me Koten Jekop.’
38 I emén Kot, án ekkewe mi manaw nge esap án ekkewe mi máló, pún me ren,* iir meinisin mi manaw.”
39 Iwe, ekkóch me lein ekkewe soumak ra pélúweni: “Sense, óm kapas mi múrinné.”
40 Pún ese chúen wor ar pwora le eisini eú kapas eis.
41 Mwirin a eisiniir: “Pwata ra erá pwe ewe Kraist i néún Tafit?
42 Pún pwisin Tafit a apasa lón ewe puken Kélfel, ‘Jiowa* a ereni ái Samol: “Kopwe móttiw peliefichi
43 tori ái úpwe isettiw chón oputom pwe leenien pecheom.” ’
44 Iwe nge, Tafit a kér ngeni Samol, iwe, ifa ussun pwe epwe i néún we?”
45 Iwe, atun meinisin ekkewe aramas ra akkaúseling, a ereni néún kewe chón káé:
46 “Oupwe túmúnúkemi seni ekkewe soumak iir kewe mi sani le fetálfeil fán úfer úféúfen lúkún mi langattam me sani án ekkewe ekkóch repwe kapwong ngeniir me lón ekkewe leenien amémé, me ekkewe leenien móót mi nóm mwan* me lón ekkewe sinakok, me ekkewe leeni fán iten ekkewe waséla mi iteféúló atun mwéngéén lekuniol,
47 me ekkewe ra angei* mettóchun ekkewe fefin mi má seniir pwúlúwer, me einga aramas ren ar iótekittam. Ekkeei repwe angei kapwúng mi fókkun chou.”
Footnote
^ Krik, “lease ngeni ekkewe chón atake.”
^ Are “ésúfélúngawa.”
^ Are “mi pwúng.”
^ Are “me ren ekiekin.”
^ Are “fókkun múrinné.”
^ Krik, “mwéngé imwen ekkewe fefin mi má seniir pwúlúwer.”
