Me ren Luk 23:1-56
23 Iwe, meinisin chón ewe mwichen aramas ra útá me emmwenaaló i ren Pailat.
2 Mwirin, ra poputá le tipimwáál ngeni, ra apasa: “Áúa kúna án ei mwán emmweningawa aramasen fénúem, a pinei kamétiwen takises ngeni Sisar, me a apasa pwe pwisin i Kraist, emén king.”
3 Iwe Pailat a eisini ei kapas eis: “En ewe Kingen chón Jus?” I a pélúweni: “En pwisin ka apasa.”
4 Mwirin, Pailat a ereni ekkewe souasor mi lap me ewe mwichen aramas: “Úse kúna och tipisin ei mwán.”
5 Nge ra ánicholó me apasa: “I a efisi án ekkewe aramas repwe ú ngeni mwú ren an asukul lón unusen Jutia, poputá seni lón Kalili pwal mwo tori ikeei.”
6 Atun Pailat a rong ena, a eis iká ewe mwán i emén re Kalili.
7 Lupwen a silei pwe i seni ewe leeni mi nóm fán án Erot nemenem, i a tiinaaló ngeni Erot, ewe mi pwal nóm lón Jerusalem lón ekkena rán.
8 Lupwen Erot a kúna Jises, a fókkun pwapwa. Pún a fen fansoun langattam an mochen kúna Jises pokiten a rong chómmóng mettóch ussun i, me a áneán an epwe kúna an féri och esissil.
9 Iwe, a poputá le kapas eis ngeni ren langattam fansoun, nge ese pélúweni mwo och.
10 Iwe nge, ekkewe souasor mi lap me ekkewe soumak ra kan soun útá me ánicholó le tipimwáál ngeni i.
11 Iwe, Erot fitifengen me néún kewe soufiu ra turunufasa i, me i a urumwotei ren an éúféúfa ngeni eché úf mi fókkun múrinné, iwe mwirin, a tiinsefálieló ren Pailat.
12 Lón ena atun Erot me Pailat ra wiliiti chiechi, pún me mwen ena, ra koputfengen lefiler.
13 Iwe, Pailat a kérfengeni ekkewe souasor mi lap, ekkewe sounemenem, me ekkewe aramas
14 me a ereniir: “Oua uweato rei ei mwán ussun emén mi efisi án aramas repwe ú ngeni ewe mwú. Nge nengeni! úa etittina i me mwemi nge úse kúna och mwáál úpwe tipi ngeni ren met ekkewe oua eáni kapasen ú ngeni.
15 Ren enletin, pwal Erot, pún a fen eliwinisefálieto i rech, me nengeni! ese wor met i a féri an epwe fich ngeni máló.
16 Iwe nge, ngang úpwe wichi i me epichaaló.”
17 * ——
18 Nge unusen ewe mwichen aramas ra púchérúwu: “Kopwe nieló ei mwán me omusawu ngenikem Parapas!”
19 (Ei mwán a kóturulong lón kalapus ren an álillis lón ewe angangen ú ngeni ewe mwú me ren an nimanaw.)
20 Pailat a kapassefál ngeniir pokiten a mochen omusawu Jises.
21 Iwe, ra poputá le púppúchér me apasa: “Epwe ninniiló wóón ewe irá! Epwe ninniiló wóón ewe irá!”
22 Ewe aúlúngátin fansoun, a ereniir: “Pwata? Met sókkun mettóch mi ngaw ei mwán a féri? Úse kúna och pwe epwe fich ngeni an epwe máló, iwe nge, úpwe wichi i me omusawu i.”
23 Ren ei, ra ánicholó fán léúwer mi léúwommóng, ra mochen epwe ninniiló* me ra fókkun púppúchér, ina minne
24 Pailat a apwúngaló pwe epwe fis minne ra eáni tingor.
25 A omusawu ewe mwán ra mochen, ewe a kóturulong lón kalapus ren an álillis lón ewe angangen ú ngeni ewe mwú me ren an nimanaw, nge i a ngeniir Jises ar repwe fér ngeni met ra mochen.
26 Iwe, atun ra emmwenaaló i, ra aúoló Simon seni Sairine, ewe mi feito seni lemal, me ra allúk ngeni an epwe mwárei ewe iráán ninni* me tapweló mwirin Jises.
27 Eú mwichemmóngun aramas ra tattapweló mwirin, kapachelong ekkewe fefin mi éfénú pwisin iir ren ar letipeta me kechiweiti i.
28 Jises a kul ngeni ekkewe fefin me apasa: “Fin Jerusalem, oupwe úkútiw le kechiweitiei. Oupwe fen pwisin kechiweitikemi me néúmi kewe,
29 pún nengeni! ekkewe rán repwe feito atun aramas repwe apasa, ‘Ra pwapwa ekkewe fefin mi riit, ekkewe leenien ménúkol rese néúnéú me ekkewe oupw ese wor a oupw seni!’
30 Mwirin, repwe poputá le apasa ngeni ekkewe chuuk, ‘Oupwe turutiw wóóm!’ me ereni ekkewe ppan, ‘Pwélúkemiló!’
31 Iká ra féri ekkeei mettóch atun ewe irá a núkúchéchchéén, met epwe fis atun a pwáseló?”
32 Ra pwal uwealó rúúemén mwán chón féfféringaw, pwe repwe eti i le ninniiló.
33 Iwe, atun ra tikeri ewe leeni itan Péénsékún Mékúr, ra chúfélúetá i wóón ewe irá ikena ie únúkkún ekkewe chón féfféringaw, emén peliefichin me emén pelieméngún.
34 Nge Jises a apasa: “Semei, kopwe omusereló, pún rese silei met ra féri.” Pwal och, ra eineti úfan kewe ren ar úttút wóór.
35 Me ekkewe aramas ra úkkúútá me kakkatol. Nge ekkewe sounemenem ra esiita me apasa: “A seláni ekkewe ekkóch, iwe iká pwe i ewe Kraist ewe Kot a filaatá, epwe seláni pwisin i.”
36 Pwal mwo ekkewe soufiu ra turunufasa i, ra feito me eiti ngeni wain mi mwóón
37 me apasa: “Iká pwe en ewe Kingen chón Jus, kopwe pwisin selánuk.”
38 A pwal wor kapas mi mak asen mékúran: “Iei i ewe Kingen chón Jus.”
39 Iwe, emén me lein ekkewe chón féfféringaw mi eitiwetá ikena a poputá le turunufasei i, a apasa: “En ewe Kraist, iká met? Kopwe pwisin selánuk me pwal ám!”
40 Ewe pwal emén a pélúweni ren an apwúngú i, a apasa: “Kese fókkun niwokkusiti Kot, nge iei ka kúna pwal chék ei esin kapwúng?
41 Me a pwúng ngenikich pún sia angei minne a fichiitikich ren ekkewe mettóch sia féri, nge ei mwán ese féri och mi mwáál.”
42 Mwirin a apasa: “Jises, kopwe chechchemeniei atun kopwe tolong lón Mwuum.”
43 Iwe, a ereni: “Enlet úa erenuk ikenái, kopwe nóm rei lón Paratis.”
44 Iwe iei, ina epwe ewe awonuen kulók,* nge eú kiroch a arochaaló unusen ewe fénú tori ewe etiuen kulók,*
45 pokiten a rocholó ttinen ewe akkar. Mwirin, kaatenin ewe imwenfel a kamwefesen me lukanapan.
46 Iwe, Jises a kékké fán léúwommóng me apasa: “Semei, úa lúkúolong manawei* lepoum.” Mwirin an apasa ei, a máló.*
47 Pokiten ewe meilapen soufiu a kúna minne a fis, a poputá le elingaaló Kot, a apasa: “Enlet, ei mwán emén mi pwúng.”
48 Iwe, lupwen meinisin ekkewe aramas mi kochufengen ikena pwe repwe katol an ninniiló ra kúna ekkeei mettóch mi fis, ra liwiniti imwer me éfénú fán mwáriir.
49 Me meinisin chókkewe mi sissilei i ra chék útááto me towaw. Pwal och, ekkewe fefin mi fen fiti i seni Kalili ra nóm ikena me kúna ekkeei mettóch.
50 Me nengeni! a wor emén mwán itan Josef, emén mi chóni án chón Jus we mwichen soukapwúng mi tekia, i emén mwán mi múrinné me pwúng.
51 (Ei mwán ese tipeeú ngeniir are álisaatá pwénútáán ar kókkót fán iten Jises.) I seni Arimatia, eú telinimwen chón Jutia, me a witiwiti ewe Mwúún Kot.
52 Ei mwán a tolong mwen Pailat me tingor inisin Jises.
53 Me a ettatiw me túkúmi lón mangaak mi fókkun múrinné, me waalong lón eú peiás mi ttu lón achaw, ese mwo piin áeá.
54 Iei ewe ránin Ammólnatá, me epwele poputá ewe Sapat.
55 Nge ekkewe fefin mi fiti i seni Kalili ra tapweló me katol ewe peiás me kúna ifa ussun inisin Jises we a akkonoló,
56 me ra liwinló pwe repwe ammólnatá lémmis. Nge lón ewe Sapat ra asésé, ussun minne ewe allúk a apasa.
Footnote
^ Are “ninniiló wóón ewe irá.”
^ Ina epwe 12:00 leolowas.
^ Ina epwe 3:00 p.m.
^ Are “ngasangasei.” Krik, “ngún.”
^ Are “kaúló le ngasangas.”
