Ngeni Ekkewe Chón Rom 7:1-25
7 Pwii kaan, ouse silei pwe ewe Allúk a nemenem wóón emén aramas fansoun an manaw? (Pún ngang úa kapas ngeni chókkewe mi silei ewe allúk.)
2 Me ren ewe allúk, emén fefin mi pwúpwúlú a riri ngeni pwúlúwan we lón úkúúkún ránin manawen átena. Nge iká pwúlúwan na a máló, neminna a ngaseló seni án pwúlúwan na allúk.*
3 Ina minne, lupwen pwúlúwen neminna we a chúen manaw, i epwe iteni emén chón lisowumwáál iká a wiliiti pwúlúwen pwal emén mwán. Nge iká pwúlúwan na a máló, neminna a ngaseló seni an allúk, iwe esap i emén chón lisowumwáál iká a wiliiti pwúlúwen pwal emén mwán.
4 Iwe, ámi pwii kana, ussun nge ámi oua pwúpwúlú ngeni ewe Allúk, nge pokiten án Kraist we asor,* ena a muchúló. A iei ussun pwe oupwe nóm fán nemenien Kraist, ewe a manawetá pwe sipwe féri ekkewe mettóch mi apwapwaai Kot.
5 Pún lupwen sia manaw lón mochenin futuk, ewe Allúk a pwáraaló pwe ewe mochenin futuk mi ngaw a emmweni inisich* ngeni tipis, me ena tipis a emmwenikich ngeni máló.
6 Nge iei sia ngaseló seni ewe Allúk pokiten sia máló ngeni minne mi eppetikich. Iwe, sisap slave ngeni Kot fán emmwenien ewe Allúk minen lóóm mi makketiw, nge sipwe slave ngeni fán emmwenien ewe ngún mi fel.
7 Iwe, met sipwe apasa? Ewe Allúk mi tipis? Fókkun aapw! Ren enletin, iká esap pwúlún ewe Allúk úsapw silei ussun ewe mettóch tipis. Áwewe chék, úsapw tongeni silei ussun mochenia iká ewe Allúk ese apasa: “Kosap mochenia.”
8 Nge pokiten ewe allúk, tipis a kúna eú alen an epwe efisatá lón ngang sókkun mochenia meinisin, pún lupwen ese mwo wor ewe allúk, tipis mi máló.
9 Ren enletin, úa manaw lupwen ese mwo wor ewe allúk. Nge lupwen a war ewe allúk, a affata pwe ngang emén aramas tipis.
10 Iwe, ewe allúk itá epwe emmweniei ngeni manaw, úa kúna pwe a emmweniei ngeni máló.
11 Pokiten ewe allúk, tipis a kúna eú alen an epwe otupuei me nieiló.
12 Ina minne, ewe Allúkún Moses a pin, me met ei allúk a apasa a pin me pwúng me múrinné.
13 Iwe met, itá minne mi múrinné* epwe efisi ái máló? Aapw esap fókkun ina! Tipis, ewe a féri ena. Pokiten minne mi múrinné, tipis a nieiló pwe epwe pwáári met weween tipis. Ewe Allúk a pwáriéchú pwe tipis mi fókkun ngaw.
14 Sia silei pwe ewe Allúk án Kot, nge ngang aramas chék, úa mééló ren tipis.
15 Pún ngang úse weweiti met úa féri. Pún úse féfféri minne úa mochen, nge úa féri minne úa oput.
16 Iwe nge, iká úa féri met úse mochen féri, úa tipeeú ngeni pwe a éch ewe Allúk.
17 Nge iei esap chúen ngang ewe mi féri, nge fen ewe tipis mi nónnóm lón ngang.
18 Pún úa silei pwe ese wor och mi múrinné a nónnóm lón ngang, lón futukei, pún a wor ái mochen féri minne mi múrinné, nge ese wor ái tufich le féri.
19 Pún úse féri ewe mettóch mi múrinné úa mochen féri, nge ewe mettóch mi ngaw úse mochen féri, ina met úa féfféri.
20 Iwe, iká úa féri met úse mochen féri, esap chúen ngang ewe a féri, nge ewe tipis mi nónnóm lón ngang.
21 Iwe nge, mi wor ei allúk a nónnóm lón ngang: Lupwen úa mochen féri minne mi pwúng, minne mi ngaw a nónnóm rei.
22 Seni lón letipei úa fókkun pwapwaiti án Kot allúk,
23 nge úa kúna me lón inisi* pwal eú allúk mi ú ngeni allúkún ái ekiek me emmweniei ngeni ái úpwe fétek fán allúkún tipis ewe mi nóm lón inisi.*
24 Ngang emén aramas mi attong! Ié epwe angasaeiló seni ei inis epwe máló?
25 Kilisou ngeni Kot ren Jises Kraist ach Samol! Iwe, ren ái ekiek, ngang emén slave ngeni án Kot allúk, nge ren futukei, ngeni allúkún tipis.
Footnote
^ Are “nemenem.”
^ Krik, “inis.”
^ Krik, “kifetich.”
^ “Minne mi múrinné” a weneiti án Kot Allúk.
^ Krik, “kifeti.”
^ Krik, “kifeti.”
