EWE Taropwe mi Pin a mak fán emmwenien Kot lón kapasen Ipru, Aramaik, me Krik. Ren án aramasen “mwú meinisin” repwe kúna feiéch seni án Kot Kapas, a lamot an epwe afféú lón chómmóng fós. (Mattu 24:14) Ekkewe rúwe me fisu puk, seni Mattu ngeni Pwáraatá ra iteni “néún Chón Kraist we Tesin Krik,” pún fán án Kot emmwen ekkewe Chón Kraist soumak lón fansoun ekkewe aposel ra makkeei lón kapasen Krik. Masouen ei Kapasen Kot—Paipelin Ótót Séfé a fitipachei ewe popun kapas ewe Paipel a áeúin mak lón.

Iten Kot we Jiowa mi kkóló aúchean, a pwá fán 241 lón ei Kapasen Kot—Paipelin Ótót Séfé (Mattu-Pwáraatá). Pokiten a fókkun aúchea pinilóón iten Kot we me a lamot án meinisin repwe kékkéri ena it pwe repwe kúna manaw, ina popun ei afféún Paipel a eliwinalóng ewe it Jiowa lón pwúkún leenian lón ewe Taropwe mi Pin.—Mattu 6:9; Rom 10:13.

Ei itelap, Kapasen Kot—Paipelin Ótót Séfé, a lóngólóng wóón án Kot we pwon ussun eú ótót séfé mi pwúng fán iten feiéchún meinisin aramas. (2 Piter 3:13) Ekkewe chón chiyakúúni ei puk mi tongei ewe Soumakken ei Taropwe mi Pin, ra meefi pwe eú wis mi fókkun aúchea ngeni I ar repwe atoura ekiekin me an pwóróus fán ewe napanap mi pwúng úkúúkún ar tongeni. Áúa iótek pwe ei afféún Paipel epwe fókkun álilliséch ngeni ekkewe chón állea mi letip wenechar mi achocho le “eáni ewe sile mi pwúng ussun ewe enlet.”—1 Timoty 2:4.