Ka fen ketiw ngeni eú án Chón Pwáraatá Jiowa kewe mwich? Ika kesaamwo, iwe eli kopwe ekis pireir atun ka kerán fiti. Eli kopwe ekieki: ‘Met a fiffis lón ekkena mwich? Pwata ra aúchea? Pwata a lamot ai upwe fiti?’ Sipwe káé lón ei lesen pwata óm fiti ekkewe ekkóch lón ekkena mwich a tongeni eririéchuk ngeni Kot me álilliséch ngonuk.

1. Pwata Chón Pwáraatá Jiowa ra kan mwichfengen?

Iei alon emén soumakken Paipel usun akkaúchean popun ach mwichfengen. A erá: “Üpwe mwareiti ewe Samol mi Lapalap lon ewe mwich mi lap.” (Kölfel 26:12) A pwal ina usun ren Chón Pwáraatá Jiowa lón ei fansoun, ra fókkun pwapwa atun ra mwichfengen. Wóón unusen fénúfan ra mwichfengen iteiten wiik pwe repwe mwareiti Kot, kél ngeni, me iótek ngeni. Fán fitu lón eú ier, ra kan pwal chufengen lón ar kewe mwichelap pwe repwe fel ngeni Kot.

2. Met kopwe káé lón án Chón Pwáraatá Jiowa kewe mwich?

Lón ekkewe mwich sia rong áweween án Kot we Kapas. (Álleani Nehemia 8:8.) Atun ka fiti ekkena mwich, kopwe káé usun Jiowa me napanapan kewe mi echipwér. Atun epwe lapóló óm silei usun an tongeok, kopwe ririéch ngeni. Kopwe pwal káé ifa usun a tongeni álisuk le eáni eú manaw mi wor aúchean.​—Aisea 48:17, 18.

3. Ifa usun óm chiechi ngeni chón mwich a tongeni álisuk?

Jiowa a éúréúrakich ach sipwe “ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen.” (Ipru 10:24, 25) Lón ach kewe mwich kopwe chuuri chókkewe iir mi enletin tongefengeniir, me iir usum úchék ra pwal mochen alapaaló ar káé usun Kot. Kopwe rong ar eáni ar kewe afalafal, uwawu meefier, me pwal ar pwóppwóróusfengen mwan me mwirin mwich. (Álleani Rom 1:11, 12.) Ka pwal tongeni fós ngeni chókkewe iir mi sópwéch lón ar ataweei ekkewe osukosuk ekkewe lipich me ekkewe mi pwúpwúlú ra kúkkúna. Ikkena chék ekkóch me lein ekkewe popun pwata Jiowa a mochen ach sipwe kan mwimmwichfengen!

 KÚTTAFICHI

4. Án Chón Pwáraatá Jiowa kewe mwich

Lón fansoun ekkewe aposel, ekkewe Chón Kraist ra kan mwimmwichfengen pwe repwe fel ngeni Jiowa. (Rom 16:3-5) Álleani Kolose 3:16, me mwirin pwóróusfengen wóón ei kapas eis:

• Ifa usun ekkewe Chón Kraist lóóm ra fel ngeni Jiowa?

1. Lón ekkewe mwich a kan wor afalafal, video, me káit wóón ifa usun sipwe lipwákéch le afalafala aramas me asukuler. A kan poputá me sópwóló ekkewe mwich ren kél me iótek

2. Lón ekkóch ekkewe kinikin lón mwich, chón fiti ra ketiw le uwawu meefier

3.   Meinisin ra ketiw. Ekkewe famili, ekkewe mi lipich, chinnap, me ekkewe semirit

4. Ese kamé án Chón Pwáraatá Jiowa kewe mwich me ese wor assawen sepien asor

5. A lamot achocho ren óm kopwe fiti mwich

• Pwata a lamot ach sipwe fiffiti mwich iteitan?

 MENLAPAN

Óm fiffiti ekkewe mwich epwe álisuk le alapaaló óm silei usun Jiowa, apéchékkúlaló óm riri ngeni, me álisuk lón óm fiti ekkewe ekkóch le fel ngeni.

Enniwili

• Pwata Jiowa a pesekich ach sipwe mwichfengen?

• Met kopwe káé me lón án Chón Pwáraatá Jiowa kewe mwich?

• Óm ekiek nge ekkewe mwich ra tongeni álisuk lón pwal ekkóch mettóch?